យុវជនជាង ៣០០០ នាក់ នឹងចូលរួមសង្កេតការណ៍ប្រលងបាក់ឌុបលើកទី២

2014-10-09 15:43:07
ចំនួនមតិ 0 | ចំនួនចែករំលែក 0

ចន្លោះមិនឃើញ

អង្គភាពប្រឆាំងអំពើពុករលួយ គ្រោងដាក់ពង្រាយអ្នកសង្កេតការណ៍ប្រមាណ ៣១០០ នាក់ ដើម្បីតាមដានដំណើរការប្រលងបាក់ឌុបលើកទី២។ ការប្រលងបាក់ឌុបលើកទី២ នឹងប្រព្រឹត្តិទៅនៅថ្ងៃទី១៣ ដល់ថ្ងៃទី១៤ ខែតុលា ឆ្នាំ២០១៤។

ចំនួននេះមានការកើនឡើង បើប្រៀបធៀបនឹងការប្រលងលើកទី១ ដែលមាន ២៧១៥ នាក់។ ឯកឧត្តម ឱម យ៉ិនទៀតប្រធានអង្គភាពប្រឆាំងអំពើពុករលួយ នៅវិទ្យាស្ថានបច្ចេកវិទ្យាស្ថានបច្ចេកវិទ្យាកម្ពុជា ក្នុងពិធីសំណេះសំណាលជាក្រុមអ្នកសង្កេតការណ៍បានលើកឡើងពីការចូលរួមចំណែកយ៉ាងធំធេងរបស់យុវជន ក្នុងកិច្ចការងារសង្គមនៅ និងជាផ្នែកមួយជំរុញឲ្យដំណើរការប្រលងបាក់ឌុបលើកទីមួយប្រព្រឹត្តិទៅ ដោយរលូន។ "ឥឡូវជោគជ័យការប្រលងបាក់ឌុបលើកទី១ វាជាប្រវត្តិសាស្រ្ត។ ក្មួយៗ ស្តាប់មើលទៅមតិសាធាណៈ មតិសង្គម និងមតិអ្នកការសែតគេសរសេរច្បាស់ថា ពាក្យចចាមអារ៉ាម ពាក្យអាក្រក់ទាំងប៉ុន្មាន មកលើការប្រលងបាក់ឌុបត្រូវបានបញ្ចប់ ហើយចុងក្រោយនេះឥទ្ធិពលអ្នកមានអំណាច និងបុណ្យស័ក្កិធំចូលយកប្រយ៉ុងឲ្យកូនក៏ត្រូវបញ្ចប់ដូចគ្នា។ ដូច្នេះនេះគឺជាផ្នែកមួយនៃការចូលរួមរបស់អ្នកសង្កេតការណ៍”។

ទោះយ៉ាងណា ឯកឧត្តម ក៏បានស្នើទៅអ្នកសង្កេតការណ៍ត្រូវគោរពតាមបទបញ្ជាផ្ទៃ ក្នុងរបស់អង្គភាពប្រឆាំងអំពើពុករលួយ និងត្រូវមានការឱនលំទោន ព្រមទាំងសហការណ៍ល្អជាមួយលោកគ្រូ-អ្នកគ្រូអនុរក្ស។

មានមានបេក្ខជន ៦៧០០០ នាក់ ចែកជា១១៧មណ្ឌល រាជធានីភ្នំពេញមាន១៥មណ្ឌល ក្នុងការប្រលងលើកទី២ នេះ។ ដោយឡែកការប្រលងលើកទី១ មានបេក្ខជនប្រលងសរុប ៩៣.៩៣៧នាក់ មាន១៥១មណ្ឌល។ ការប្រលងលើកទី២ នេះក្រសួងអប់រំចំណាយថវិកាជាង២ លានដុល្លារ ខណៈការប្រលងលើកទី១ ចំណាយអស់ជិត៤ លានដុល្លារ៕