ភាពមិនប្រក្រតី ពេលប្រលងបាក់ឌុបលើកទី១ ត្រូវបានលាតត្រដាងដោយ អង្គភាពប្រឆាំងអំពើពុករលួយ
- 2014-09-27 00:06:51
- ចំនួនមតិ 0 | ចំនួនចែករំលែក 0
ភាពមិនប្រក្រតី ពេលប្រលងបាក់ឌុបលើកទី១ ត្រូវបានលាតត្រដាងដោយ អង្គភាពប្រឆាំងអំពើពុករលួយ
ចន្លោះមិនឃើញ
ទោះការប្រលងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំនេះត្រូវបានកត់សំគាល់ ពីមជ្ឈដ្ឋាននានាថា មានភាពល្អប្រសើរយ៉ាងណា។ ប៉ុន្តែភាពមិនប្រក្រតីមួយចំនួន ពេលប្រលងត្រូវបានអង្គភាពប្រឆាំងអំពើពុករលួយលាតត្រដាង ក្នុងរបាយការណ៍របស់ខ្លួនចំនួន ៩ ទំព័រ ដែលត្រូវបានផ្សព្វផ្សាយនៅថ្ងៃនេះ។
ភាពមិនប្រក្រតីទាំងនោះមាន ការលួចធ្វើអាជីវកម្មថតចម្លងចំនួនតួច ពិសេសនៅម៉ោង ៤ និង៥ ទៀបភ្លឺ បេក្ខជនចូលមណ្ឌលប្រលងមុនម៉ោងកំណត់ធ្វើឲ្យឆកល្វែង ក្នុងការឆែកឆេរ ច្រកទ្វាបើកធំ បេក្ខជនប្រមូលផ្តុំគ្នា សម្រុកចូល ក្នុងមណ្ឌលប្រលង ធ្វើឲ្យការឆែកឆេរមិនបានល្អិតល្អន់ មណ្ឌលប្រលងខ្លះគ្មានអនុរក្សស្រី សម្រាប់ឆែកឆេរបេក្ខនារី ការឆែកឆេរនៅមណ្ឌលខ្លះមិនបានម៉ត់ចត់។ ចំណែកពេលរសៀលមិនសូវមានការឆែកឆេរតឹងរឹង។ អប្បមាទ ប្រធានមណ្ឌល អនុប្រធានមណ្ឌល និងគណៈកម្មាធិការត្រួតពិនិត្យ តាមអគារមួយចំនួនមិនសកម្ម ច្រើនអង្គុយតែមួយកន្លែង មិនឧស្សាហ៍ត្រួតពិនិត្យ នៅក្នុងមណ្ឌលប្រលងខ្លះមានលក់ដូរនំចំណី និងទឹក។ អនុរក្សនៅតាមមណ្ឌលខ្លះ មានទូរសព្ទ មិនសូវសកម្ម គ្មានការរាំងស្កាត់កុំឲ្យបេក្ខជនមិនឲ្យចម្លងគ្នា ហើយមណ្ឌលប្រលងមួយចំនួនរៀបតុឲ្យបេក្ខជនអង្គុយជិតៗ គ្នា បេក្ខជនមានប្រ៊ីយ៉ុងចូល និងយកទូរសព្ទចួលបាន(តែមិនអាចយកមកប្រើបាន)។ បន្ទប់ប្រលងខ្លះមានពន្លឺមិនគ្រប់គ្រាន់ បន្ទប់ប្រលងខ្លះមានធូលីដីហុយចូល និងមានសម្លេងរំខានពីខាងក្រៅ និងតុប្រលងតូចទាបទាល់ចង្អៀតទាល់ជើង។
មណ្ឌលប្រលងខ្លះខ្វះសន្លឹកកិច្ចការបេក្ខជន និងសន្លឹកប្រធានវិញ្ញាសាប្រលង មានការកំណត់មិនច្បាស់លាស់នូវសន្លឹកកិច្ចការ ដែលត្រូវផ្តល់ឲ្យបេក្ខជនសរសេរចម្លើយ។ នៅតាមមណ្ឌលប្រលងមួយចំនួនមានអាកប្បកិរិយា និងពោលពាក្យមិនសមរម្យ ព្រមទាំងបង្កការលំបាកដល់អ្នកសង្កេតការណ៍ពីអង្គភាពប្រឆាំងអំពើពុករលួយដូចជាមានប័ណ្ណសម្គាល់ខ្លួនហើយទាមទារលិខិតឧទ្ទេសនាមទៀត និងកំណត់តំបន់សង្កេតការណ៍ជាដើម។ ដោយឡែកអ្នកសង្កេតការណ៍ស្ម័គ្រចិត្តមួយចំនួនតូចបានមកដល់មណ្ឌលប្រលងយឺតយ៉ាវ ប្រមូលផ្តុំគ្នាជជែកភ្លេចការងារ ចូលចាប់ព្រីយ៉ុង ក្នុងបន្ទប់ប្រលង ដោយខ្លួនឯងផ្ទាល់(ជាគោលការណ៍ត្រូវរាយការណ៍ជូនអនុរក្ស)។
ទាក់ទងរបាយការណ៍ខាងលើ លោក រស់ សាលីន អ្នកនាំពាក្យក្រសួងអប់រំយុវជន និងកីឡាបានឲ្យដឹងថា ភាពអសកម្មតិចតួចតែងកើតមានជៀសមិនផុតទេ។ ប៉ុន្តែយ៉ាងណាក៏ដោយក្រសួងអប់រំ តែងចាត់វិធានការទប់ស្កាត់ភ្លាមៗ។ តួយ៉ាងដូចនៅខេត្តតាកែវ ដែលមានពាក្យចចាមអារ៉ាមបែកធ្លាយវិញ្ញាសា ការចាប់ខ្លួនបេក្ខជនប្រលងជំនួសបាននៅតាមមណ្ឌលមួយចំនួន ព្រមទាំងចាត់ការចំពោះបេក្ខជន យកទូរសព្ទចូលជាដើម គឺយើងសហការណ៍ ជាមួយអង្គភាពប្រឆាំងអំពើពុករលួយផ្ទាល់តែម្តង។
ទោះយ៉ាងណា ក្នុងរបាយការណ៍ បានធ្វើការសន្និដ្ឋានថា ការប្រលងសញ្ញាបត្រមធ្យមសិក្សាទុតិយភូមិ(បាក់ឌុប) ឆ្នាំ២០១៣-២០១៤ សម័យប្រលង ៤ សីហា ឆ្នាំ២០១៤ បានដំណើរការទៅដោយរលូន និងមានតម្លាភាព យុត្តិធម៌ត្រឹមត្រូវ ស្របតាមពាក្យស្លោក អ្នកចេះ គឺជាប់របស់សម្តេច ហ៊ុន សែន និងរដ្ឋមន្រ្តីក្រសួងអប់រំយុវជន និងកីឡាបានបំផុសឡើង។
ការសង្កេតការណ៍របស់ អ ប ព និងអ្នកស្ម័គ្រចិត្តមិនគ្រាន់តែចូលរួមចំណែកបង្ការ ទប់ស្កាត់ភាពមិនប្រក្រតីមួយនានាប៉ុណ្ណោះទេ គឺបានទាំងជួយពង្រឹងនូវការប្រើប្រាស់សិទ្ធិអំណាច ក្នុងការបំពេញតួនាទីរបស់មេប្រយោគគ្រប់រូប ព្រមទាំង ព្រមទាំងធ្វើឲ្យមជ្ឈដ្ឋានជាតិ និងអន្តរជាតិ មានជំនឿពិតប្រាកដលើដំណើរការ និងលទ្ធផលប្រលង។
មានបេក្ខជនប្រមាណ ២៥,៧២% ប៉ុណ្ណោះបានប្រលងជាប់សញ្ញាបត្រមធ្យមសិក្សាទុតិយភូមិ(បាក់ឌុប) ក្នុងនោះមានបេក្ខជនជាប់និទ្ទេស A ចំនួន ១១ នាក់។ ចំពោះការប្រលងលើកទី២ នឹងប្រព្រឹត្តិទៅនៅថ្ងៃទី១៣ ខែតុលា ឆ្នាំ២០១៤៕
អានអត្ថបទ៖ស្ប៉តកន្លះនាទីបាចសាចទេសចរណ៍ខ្មែរទៅពិភពលោកតាម CNN ចំណាយជិតលានដុល្លារ ចុចត្រង់នេះ
អត្ថបទ៖មៃ សុខលីម