ស្ប៉តកន្លះនាទីបាចសាចទេសចរណ៍ខ្មែរទៅពិភពលោកតាម CNN ចំណាយជិតលានដុល្លារ

2014-09-26 17:48:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីទាញកំណើនសន្ទុះឧស្សាហកម្មគ្មានផ្សែងមកកម្ពុជា ក្រសួងទេសចរណ៍បានដាក់ស្ពតផ្សព្វផ្សាយលើទូរទស្សន៍ពិភពលោក ដែលមានមូលដ្ឋានមេនៅរដ្ឋអាតាឡង់តា សហរដ្ឋអាមេរិកគឺ CNN តាំងពី ២០១១មកម៉្លេះ។

ប្រជាជនខ្មែរនិយមមើលប៉ុស្តិ៍ទូរទស្សន៍មានឥទ្ធិពលលើលោកដែលប្រតិបត្តិការតាំងពីឆ្នាំ១៩៨០មួយនេះ ប្រាកដជាធ្លាប់ឃើញវីដេអូពាណិជ្ជកម្មខ្លី ដែលបង្ហាញពីបណ្ដុំស្នូលទេសចរណ៍ដែនសុវណ្ណភូមិ ដូចជាសម្រស់ធម្មជាតិដ៏បំព្រង ប្រាសាទបុរាណមានក្បូរក្បាច់វិចិត្រ ឆ្នេរកោះ ម្ហូបអាហារ និងវប្បធម៌នៃបដិសណ្ឋារកិច្ចទន់ភ្លន់ ជាដើម ក្នុងវីដេអូដ៏ទាក់ទាញនោះ។ វីដេអូសំញែងសម្រស់កម្ពុជានេះ ក៏ជាយុទ្ធសាស្ត្រស្នូលរបស់កម្ពុជា ដើម្បីឆកយកភ្ញៀវទេសចរណ៍ឲ្យកើនផុតឆ្នាំ២០១៣ទៅមិញ ដែលបានបំបែកកំណត់ត្រាទាញបានភ្ញៀវ ៤,២លាននាក់ និងស្រូបចំណូលជាង ២,៥ពាន់លានដុល្លារ ស្មើនឹង១៦% នៃ GDP ជាតិ។

អានអត្ថបទ៖ បន្ទាយឆ្មារ ស្ថិតក្នុងចំណោមរតនសម្បត្តិពិភពលោកទាំង៥ដែលគេមើលរំលង

ប៉ុន្តែមិត្តអ្នកអានខ្លះ ប្រហែលមិនដឹងទេថាតើ កម្ពុជា ត្រូវចំណាយប៉ុណ្ណា ដើម្បីប្រើប្រាស់វីដេអូ៣០វិនាទីនេះបាចសាចទៅក្រសែភ្នែក ប្រជាជនលើលោកទាំងមូល?

អានអត្ថបទ៖ ៥ឆ្នេរស្អាតដាច់គេនៅកម្ពុជាណែនាំទៅពិភពលោកដោយ CNN

បើតាមការរាយការណ៍ របស់កាសែត ភ្នំពេញប៉ុស្តិ៍ កាលពីពេលកន្លងទៅថា គម្រោងថវិកាដែលកម្ពុជាចំណាយទៅការផ្សព្វផ្សាយទេសចរណ៍លើ CNN ឆ្នាំ២០១៤នេះមាន ៨០ម៉ឺនដុល្លារ។ ថ្វីបើចំណាយនេះតិចធៀបនឹងប្រទេសជិតខាង តែវាកើនលើសឆ្នាំទៅមិញ ដែលចាយ៧០ ម៉ឺនដុល្លារ។

រីឯគម្រោងថវិកាសរុបសម្រាប់ផ្សព្វផ្សាយទេសចរណ៍ជាតិឆ្នាំ២០១៤ មាន ៣,៥ លានដុល្លារ។ ខ្ទង់ចំណាយនេះរ៉ាប់រងដល់ការរៀបចំនិងចូលរួមព្រឹត្តិការណ៍នានាដែលទាក់ទងនឹងការផ្សព្វផ្សាយទេសចរណ៍កម្ពុជា ទាំងក្នុងនិងក្រៅប្រទេស ពិសេសការរៀបចំពិព័រណ៍ PATA Travel Mart 2014។

បើតាមទីភ្នាក់ងារសារព័ត៌មានរដ្ឋចិន Xinhua ថាជាលទ្ធផលបរិមាណភ្ញៀវទេសចរណ៍អន្តរជាតិចូលមកកម្ពុជានៅ ៧ខែដើមឆ្នាំ២០១៤នេះមាន ២,៤៥លាននាក់ ដែលនេះបានស្ទុះលើសឆ្នាំមុនចំនួន ៤,៥ ភាគរយ បើគិតពេលវេលាដូចគ្នា៕

ស្ពតផ្សព្វផ្សាយលើ CNN ឆ្នាំ២០១៤

http://youtu.be/pEjkURA5iuI

អត្ថបទ៖ ប៉ែន សុផាន់ណា