ក្រុមហ៊ុនធំៗ ៣ ប្រាប់ថា វិស័យបង្ហាញម៉ូដនៅកម្ពុជាកំពុងរីកចម្រើន

2015-04-22 17:14:14
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នវិស័យបង្ហាញម៉ូដនៅកម្ពុជាកំពុងមានការរីកចម្រើនទៅមុខគួរឲ្យកត់សម្គាល់ មិនដូចពីពេលមុនឡើយ។ ក្នុងនោះដែរអ្នកដែលធ្វើឲ្យវិស័យមួយនេះ រលូនបានត្រូវបានគេស្គាល់ឃើញថា មានក្រុមហ៊ុនជាច្រើន ហើយក្រុមហ៊ុនដែលល្បីជាងគេ គឺមានបី ដែលជាអ្នកបណ្ដុះបណ្ដាលតារាម៉ូដែល។ ចង់ដឹងថា មានក្រុមហ៊ុនណាខ្លះ ទស្សនាខាងក្រោម៖

១.Sapors Modeling Agency

សាព៌ណ គឺជា ទីភ្នាក់ងារបង្ហាញម៉ូដរបស់ប្រទេសកម្ពុជា ដែលបានបង្កើតឡើងតាំងពីឆ្នាំ ១៩៩៦ មក និង ជាម៉ូដែលភ្នាក់ងារក្របខ័ណ្ឌ Premier ប្រចាំប្រទេសកម្ពុជា ដោយមានមូលដ្ឋានទេពកោសល្យជាយូរមកហើយក្នុងប្រទេស។ អ្នកស្រីសាព៌ណរ៉េនដល អគ្គនាយក Sapors Modeling Agency ជាអ្នកនាំអាជីពបង្ហាញម៉ូដមកកម្ពុជាមុនគេ និង បានបណ្ដុះបណ្ដាលមនុស្សជាច្រើនក្នុងវិស័យនេះ ព្រោះគាត់ធ្លាប់បានរៀនផ្នែកនេះទាំងនៅក្នុងស្រុក និង នៅបរទេស។ អ្នកស្រីបានឲ្យដឹងថា វិស័យបង្ហាញម៉ូដនៅកម្ពុជាឥឡូវមានការរីកចម្រើនគួរឲ្យកត់សំគាល់ ព្រោះយុវវ័យបច្ចុប្បន្នចូលចិត្តលេងស្ទីលខោអាវ ថតរូប និង ចង់មានកេរ្តិ៍ឈ្មោះ។

ចំពោះអ្នកបង្ហាញម៉ូដខ្លួនឯងវិញ គឺមានទំនុកចិត្តពេលបានឡើងសម្ដែង ចេះថែរក្សាសម្ផស្សឲ្យនៅតែស្រស់ស្អាត នេះជាកត្តាសំខាន់ធ្វើឲ្យវិស័យបង្ហាញម៉ូដរីកចម្រើន។ ក្រុមរបស់អ្នកស្រីក៏ធ្លាប់នាំតារាទៅកាន់ឆាកអន្តរជាតិដែរ ដូចជា ប្រទេសចិន កូរ៉េ អូស្ត្រាលី ប៉ូឡូញ និង ប្រទេសជាច្រើនទៀត។

២.Cambodia Super Model

ក្រុម Cambodia Super Model ត្រូវបានបង្កើតឡើងនៅដើមឆ្នាំ ២០០៩ ដែលអ្នកគ្រប់គ្រងផ្ទាល់ ដោយកញ្ញា ឌួង ហ្សូរីដា ដែលជាតារាសម្ដែង ពិធីការិនី និង ជាម្ចាស់ហាងកាត់សម្លៀកបំពាក់។ "វិស័យបង្ហាញម៉ូដនៅកម្ពុជាបច្ចុប្បន្ននេះមានការរីកចម្រើនខ្លាំងមែនទែន។ ចំពោះមូលហេតុដែលធ្វើឲ្យមានភាពលូតលាស់ទៅមុខបានដូចនេះក៏ដោយសារតែ សេដ្ឋកិច្ចជាតិយើងមានការរីកចម្រើន មាន Fashion ច្រើន ជាពិសេសមាន Brand ល្បីៗនាំចូលដែលជាកត្តាសំខាន់ព្រោះគេត្រូវការតារាម៉ូដែលទៅបង្ហាញ មានព្រឹត្តិការណ៍ធំៗ និង ការបណ្ដាក់ទុនពីបរទេស ជាដើម"។ ឌួង ហ្សូរីដា ប្រាប់ Sabay ។

ក្រុមនេះ ក៏ធ្លាប់បានបញ្ជូនតារាម៉ូដែលទៅបង្ហាញខ្លួននៅក្នុងព្រឹត្តិការណ៍ជាតិ និង អន្តរជាតិជាច្រើនរួចមកហើយដូចជា ប្រទេស ថៃ ចិន វៀតណាម អូស្ត្រាលី និង ម៉ាឡេស៊ី ជាដើម។

៣.SUN Supper Model Cambodia

SUN Supper Model Cambodia ត្រូវបានបង្កើតឡើងកាលពីខែ សីហា ឆ្នាំ ២០១០ ហើយ លោក ម៉ែន និមលរតន៍ គឺជា ប្រធានក្រុមបង្ហាញម៉ូដនេះ។ "វិស័យមួយនេះឥឡូវមានការរីកចម្រើនគួរសមព្រោះម៉ូដែលម្នាក់ៗទទួលបានកម្រៃសមរម្យ។ មូលហេតុធ្វើឲ្យវាមានភាពរីកចម្រើនមកពីសេដ្ឋកិច្ច ការវិនិយោគទុនពីបរទេស ការនាំចូល និង ការផលិតក្នុងស្រុកច្រើនដែលជាមូលហេតុត្រូវការតារាទៅផ្សព្វផ្សាយផលិតផលថ្មី"។ នេះជាសំដីមេ SUN Supper Model ថ្លែងប្រាប់ Sabay។ ក្រុមរបស់លោក ម៉ែន និមលរតន៍ ធ្លាប់បានបញ្ជូនម៉ូដែលរបស់ខ្លួនទៅប្រកួតកម្មវិធី និង ដើរជាលក្ខណៈអន្តរជាតិច្រើនប្រទេសដែរដូចជា ម៉ាឡេស៊ី ចិន ហុងកុង សិង្ហបុរី កូរ៉េ និង ថ្ងៃស្អែកនឹងបញ្ជូនតារាម៉ូដែលទៅប្រកួតនៅប្រទេសហ្វីលីពីនទៀតផង៕

អត្ថបទ៖ទ្រី រ៉ាវី