Mad Max ល្បីថាល្អមើលពេញពិភពលោក ឥលូវមានបញ្ចាំងហើយ

2015-05-21 22:30:11
ចំនួនមតិ 0 | ចំនួនចែករំលែក 0

ចន្លោះមិនឃើញ

Mad Max: Fury Road ខ្សែភាពយន្តសង្គ្រាមរថយន្តលើដងផ្លូវរបស់អូស្ត្រាលីដែលកំពុងល្បីថាល្អមើលពេញពិភពលោកនោះ ឥលូវនេះមានបញ្ចាំងនៅកម្ពុជាហើយ បន្ទាប់ពីដាក់បញ្ចាំងសម្ពោធដំបូងនៅផ្លាទីនៀម កាលពីថ្ងៃអង្គារកន្លងទៅ។

ខ្សែភាពយន្តដែលចូលរួមសម្ដែងដោយតារាល្បីឈ្មោះអង់គ្លេស Tom Hardy (Mad Max) និងនាង Charlize Theron (Furiosa) តារាសម្ដែងអាហ្វ្រិកខាងត្បូងកាត់អាមេរិក នេះ បង្ហាញពីឈុតឆាកសង្គ្រាមបាញ់គ្នាជាមួយនឹងរថយន្តប្រដេញលើវាលខ្សាច់មិនធ្លាប់មានពីមុន។

ពិភពលោកជួបសង្គ្រាមនុយក្លេអ៊ែរ។ មនុស្សជាតិ សត្វ និងរុក្ខជាតិស្លាប់ស្ទើរផុតពូជ ខណៈអ្នកដែលនៅសេសសល់មានជំងឺ ពិការ និងត្រូវបញ្ចូលឈាមដើម្បីរស់ ហើយត្រូវរស់លើវាលខ្សាច់រហោឋានខ្សត់ទឹក និងធនធានធម្មជាតិ។ មនុស្សទាំងនោះត្រូវរស់នៅក្រោមការគាបសង្កត់របស់មេដឹកនាំសាសនាម្នាក់ Immortan Joe ដែលមានប្រពន្ធស្អាតៗ៥នាក់ សម្រាប់បន្តពូជមនុស្សថ្មី។ Max ត្រូវក្រុម Joe ចាប់ខ្លួនធ្វើជាប្លោកឈាម។

Max និង Furiosa រួមដៃគ្នាសង្គ្រោះនារីទាំង៥នាក់នោះ ដោយបើករថយន្តចម្បាំងគេចខ្លួនទៅរកពិភពថ្មីមានពណ៌បៃតងគេចពីការជិះជាន់ បង្កជាសង្គ្រាមរថយន្តចម្បាំងច្នៃគ្រប់ប្រភេទប្រដេញគ្នាយ៉ាងសាហាវ ព្រោះក្រុម Joe តាមចាប់ប្រពន្ធគេមកវិញឲ្យខាងតែបាន។ សាច់រឿងទាំងមូលពេញដោយសង្គ្រាមប្រដេញរថយន្តយ៉ាងក្ដៅគគុកតាំងពីដើមដល់ចប់។