អាជ្ញាធរវេជ្ជសាស្ត្រហ្វីលីពីន កាលពីថ្ងៃអង្គារ ទី៣ ខែមិថុនា ឆ្នាំ២០២៥ បានព្រមានអំពី "ភាពអាសន្ននៃសុខភាពសាធារណៈ" ដែលកំពុងខិតជិតមកដល់ ខណៈករណីឆ្លងជំងឺអេដស៍ (HIV) បានកើនឡើងយ៉ាងគំហុកក្នុងឆ្នាំនេះ ជាពិសេសក្នុងចំណោមបុរសវ័យក្មេង។ យោងតាមទិន្នន័យរបស់ក្រសួងសុខាភិបាល ជាមធ្យមមានករណីថ្មី ៥៧ ករណីក្នុងមួយថ្ងៃត្រូវបានកត់ត្រានៅក្នុងប្រទេសដែលមានប្រជាជន ១១៧ លាននាក់ ក្នុងរយៈពេលបីខែដំបូងនៃឆ្នាំ២០២៥ ដែលជាការកើនឡើង ៥០០ ភាគរយធៀបនឹងឆ្នាំមុន។

រដ្ឋមន្ត្រីសុខាភិបាល លោក ថេអូដូរ៉ូ ហឺបូសា (Teodoro Herbosa) បាននិយាយនៅក្នុងសារវីដេអូមួយកាលពីពេលថ្មីៗនេះថា៖ «ឥឡូវនេះ យើងមានចំនួនករណីថ្មីខ្ពស់បំផុតនៅតំបន់ប៉ាស៊ីហ្វិកខាងលិច។ អ្វីដែលគួរឱ្យភ័យខ្លាចនោះគឺ យុវជនរបស់យើងជាចំណែកធំនៃករណីថ្មីទាំងនេះ។» លោកបានបន្ថែមថា៖ «វាជាផលប្រយោជន៍របស់យើងក្នុងការប្រកាសអាសន្នសុខភាពសាធារណៈថ្នាក់ជាតិសម្រាប់ជំងឺអេដស៍ ដើម្បីជំរុញសង្គមទាំងមូល និងរដ្ឋាភិបាលទាំងស្រុងឱ្យចូលរួមក្នុងយុទ្ធនាការកាត់បន្ថយចំនួនករណីថ្មីនៃជំងឺអេដស៍។»

យោងតាមក្រសួងសុខាភិបាល ករណីថ្មីដែលបានរាយការណ៍ ៩៥ ភាគរយគឺជាបុរស ដោយ ៣៣ ភាគរយមានអាយុចន្លោះពី ១៥ ទៅ ២៤ ឆ្នាំ និង ៤៧ ភាគរយមានអាយុចន្លោះពី ២៥ ទៅ ៣៤ ឆ្នាំ។ ការឆ្លងតាមរយៈទំនាក់ទំនងផ្លូវភេទនៅតែជាមធ្យោបាយចម្លងដ៏សំខាន់ ដោយភាគច្រើននៃករណីចាប់តាំងពីឆ្នាំ២០០៧ ត្រូវបានសន្មតថាកើតចេញពីការរួមភេទរវាងបុរសនិងបុរស។

ទិន្នន័យបានបង្ហាញថា មានតែ ៥៥ ភាគរយនៃអ្នករស់នៅជាមួយជំងឺអេដស៍នៅហ្វីលីពីនប៉ុណ្ណោះដែលត្រូវបានធ្វើរោគវិនិច្ឆ័យ ហើយមានតែ ៦៦ ភាគរយនៃអ្នកដែលត្រូវបានធ្វើរោគវិនិច្ឆ័យទទួលបានការព្យាបាលដោយថ្នាំប្រឆាំងមេរោគ (antiretroviral therapy) ដែលជួយសង្គ្រោះជីវិត។ លោក ហឺបូសា បានសង្កត់ធ្ងន់ថា ទោះបីជាមានការកើនឡើងនៃករណីឆ្លង ជំងឺអេដស៍លែងជាការប្រឈម ឱ្យស្លាប់ទៀតហើយ ហើយអាចគ្រប់គ្រងបានជាមួយនឹងការព្យាបាលត្រឹមត្រូវ។ «ជំងឺអេដស៍ឥឡូវនេះអាចព្យាបាលបាន ដរាបណាអ្នកទទួលការធ្វើតេស្ត និងទទួលបានថ្នាំប្រឆាំងមេរោគ» លោកបាននិយាយ។

ក្រសួងសុខាភិបាលបានជំរុញឱ្យសាធារណជនធ្វើតេស្តអេដស៍ដែលផ្តល់ជូនដោយឥតគិតថ្លៃ និងរក្សាការសម្ងាត់។ ដើម្បីទប់ស្កាត់ការឆ្លង ក្រសួងបានណែនាំឱ្យប្រើប្រាស់ស្រោមអនាម័យ និងថ្នាំ សម្រាប់ការបង្ការមុនការប៉ះពាល់ (PrEP)។ លើសពីនេះ អ្នកដែលតេស្តវិជ្ជមានត្រូវបានអំពាវនាវឱ្យពិគ្រោះជាមួយគ្រូពេទ្យដើម្បីទទួលការព្យាបាលសមស្រប។ ស្ថាប័នធានារ៉ាប់រងសុខភាពហ្វីលីពីន (PhilHealth) ក៏បានផ្តល់ជូនកញ្ចប់ព្យាបាលអេដស៍សម្រាប់អ្នករស់នៅជាមួយជំងឺនេះ។

ការកើនឡើងនេះបានរារាំងកិច្ចខិតខំប្រឹងប្រែងរបស់រដ្ឋាភិបាលហ្វីលីពីន ក្នុងការសម្រេចគោលដៅសកលដែលកំណត់ដោយយុទ្ធនាការអង្គការសហប្រជាជាតិ ដើម្បីបញ្ចប់ជំងឺអេដស៍នៅត្រឹមឆ្នាំ២០៣០៕