លោក Ohara៖ ក្រុមអាហ្វ្រិកនៅខ្មែរមានអំណោយផលជាងក្រុមកម្ពុជាយប់មិញ

2015-05-29 18:15:29
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកគ្រូបង្វឹកក្រុមជម្រើសជាតិកម្ពុជាលោក Kazunori Ohara យល់ឃើញថា ក្រុមកីឡាករអាហ្វ្រិកដែលប្រកបអាជីពនៅកម្ពុជាមានផលចំណេញច្រើនលើកម្ពុជាសម្រាប់ការប្រកួតមិត្តភាពនៅពហុកីឡដ្ឋានជាតិអូឡាំពិកកាលពីយប់មិញដែលបញ្ចប់ដោយលទ្ធផលស្មើ២-២។

តាមរយៈគ្រូជំនួយការលោក ឈូក ពិសិដ្ឋ ដែលបានបកប្រែឲ្យលោក Kazunori Ohara ដែលជាគ្រូបង្វឹកជនជាតិជប៉ុនថា ប្រសិនបើក្រុមកម្ពុជាអាចគ្រប់គ្រងបាល់បានច្រើននោះ លោកគិតថា ក្រុមកម្ពុជានឹងទទួលបានជ័យជម្នះសម្រាប់ការប្រកួតនេះ ប៉ុន្តែក្រុមកម្ពុជាមិនអាចគ្រប់គ្រងបានច្រើនឡើយដោយសារក្រុមកីឡាករអាហ្វ្រិកមានអំណោយផលខាងកម្ពស់ខ្ពស់ និងមាឌធំជាងកីឡាករកម្ពុជា។

សូមទស្សនាបទសម្ភាសន៍ខ្លីរវាង Sabay ជាមួយលោក Kazunori Ohara

សម្រាប់ការកាលពីយប់មិញ ក្រុមជម្រើសជាតិកម្ពុជាបានបើកការនាំមុខមុន បន្ទាប់ពី ឃឹម បូរី បានស៊ុតបាល់ប៉េណាល់ទីបានសម្រេចក្រោយពេលកីឡាកររបស់ក្រុម African Selection Team បានបង្កកំហុសនៅប្រអប់គ្រោះថ្នាក់។ ប៉ុន្តែប៉ុន្មាននាទីក្រោយមកសមាជិករបស់ African Selection Team គឺ សមាជិកស្វាយរៀង Dzarma Bata បានតែតចួលទីតាមស្មើកម្ពុជា មុនពេល Obioh Julius ស៊ុតបាល់ពីចម្ងាយដើម្បីនាំមុខកម្ពុជា ២-១ តែយ៉ាងណាចប់តង់ទីមួយលទ្ធផល ២-២ ក្រោយពេលខ្សែប្រយុទ្ធបឹងកេត ឃួន ឡាបូរ៉ាវី ស៊ុតចូលទីបានសម្រេចមួយគ្រាប់វិញ ខណៈតង់ទីពីរគ្មានគ្រាប់បាល់ចូលទីគ្នាឡើយ។

នៅថ្ងៃទី២ ខែមិថុនា ខាងមុខនេះ ក្រុមក្រុមជម្រើសជាតិកម្ពុជានឹងប្រកួតមិត្តភាពអន្តរជាតិជាមួយប្រទេសឡាវដែលនេះជាការប្រកួតអន្តរជាតិដំបូងរបស់ក្រុមជម្រើសជាតិក្រោមការដឹកនាំរបស់លោក Kazunori Ohara៕