អ្នកមានបទពិសោធន៍ប្រាប់វិធីមើលលុយ១០០ដុល្លារនិង២០ដុល្លារពិតឬក្លែងក្លាយ

2015-06-05 21:39:19
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកធ្វើការក្នុងវិស័យធនាគារមួយរូបបានចែករំលែកនូវវិធីខ្លះៗ ដើម្បីមើលក្រដាសដុល្លារពិតនិងក្លែងក្លាយ ក្នុងករណីគ្មានប៊ិចគូសដុល្លារ(ប៊ិចម្យ៉ាងដែលគូសដឹងក្រដាសពិត ឬក្លែងក្លាយ) ឬក៏ម៉ាស៊ីនពិនិត្យ។

កញ្ញាគង់ ច័ន្ទវណ្ណី ជាបេឡាធិការនៃធនាគារអេស៊ីលីដាភីអិលស៊ីបានប្រាប់ពីលក្ខណៈ នៃលុយ១០០ដុល្លារស៊េរីឆ្នាំ១៩៩៦ ពិតប្រាកដ និងក្លែងក្លាយមានដូចតទៅ៖

១) រូបបណ្ដុះនៅលើក្រដាសពិតមានលក្ខណៈច្បាស់ជាង រូបបណ្ដុះនៅលើក្រដាសក្លែងក្លាយ។

២) ក្រដាសពិតមានសរសៃតូចៗពណ៌ខៀវ និងក្រហម(ខ្សែសយ)ច្រើនហើយរាងកោងៗ រីឯក្រដាសក្លែងក្លាយមានសរសៃពណ៌ខៀវ និងក្រហមតិច ហើយរាងត្រង់ៗ។

៣) ក្រដាសពិត លេខ «100» ប្រែទៅជាពណ៌បៃតងចាស់ ឯក្រដាសក្លែងក្លាយ លេខ «100» ប្ដូរទៅជាពណ៌បៃតងខ្ចី។

៤)ក្រដាសពិត មានបន្ទាត់ព័ទ្ធជុំវិញ «100» ពណ៌ដិតជាងហើយមានលក្ខណៈដិតច្បាស់ល្អ ចំណែកក្រដាសក្លែងក្លាយ មានបន្ទាត់ព័ទ្ធជុំវិញ «100» ពណ៌មិនសូវដិតហើយមិនច្បាស់ល្អទេ។

៥)ក្រដាសពិត នៅក្នុងអក្សរ «N» របស់ពាក្យ «UNITED» មានប្រហោងតូចមើលសឹងតែមិនចង់ឃើញ ឯក្រដាសក្លែងក្លាយ នៅក្នុងអក្សរ «N» នៃពាក្យ «UNITED» មានប្រហោងធំមើលទៅដូចជាមានបន្ទាត់ពណ៌ស។

៦)ក្រដាសពិត អក្សរពុម្ពតូចៗ «USA100» ស្ថិតនៅចំកណ្ដាលនៃខ្សែការពារសុវត្ថិភាព រីឯក្រដាសក្លែងក្លាយ អក្សរពុម្ព «USA100» មិនស្ថិតចំកណ្ដាល នៃខ្សែការពារសុវត្ថិភាពទេ។

៧)ក្រដាសពិត ក្បាលនៃអក្សរ S មានរាងរាបស្មើហើយមិនជាប់នឹងសំណាញ់ពណ៌សទេ ចំណែកក្រដាសក្លែងក្លាយ ក្បាលនៃអក្សរ S មានរាងជាកន្ទុយត្រី ហើយជាប់នឹងសំណាញ់ពណ៌ស។

៨)ក្រដាសពិត នៅក្នុងអំពូលភ្លើងនៃរូប Independent Hall មានបន្ទាត់ពីរស្របគ្នា ចំណែកក្រដាសក្លែងក្លាយ នៅក្នុងអំពូលភ្លើង មានបន្ទាត់បីស្របគ្នា។

៩)ជើងនៃសសរដងគោមផ្នែកខាងឆ្វេងមានលក្ខណៈប្រហោង មិនជាប់និងសសររបងផ្ទះទេ ចំណែកក្រដាសក្លែងក្លាយ ជើងនៃសសរដងគោមផ្នែកខាងឆ្វេង មានលក្ខណៈជាប់ ហើយមានបន្ទាប់ជាប់ទៅនឹងសសររបងផ្ទះទៀត។

១០)ក្រដាសពិតកំពូលវិមានផ្នែកខាងឆ្វេងមើលមិនសូវច្បាស់ តែក្រដាសក្លែងក្លាយ កំពូលវិមានផ្នែកខាងឆ្វេង មានរាងជាបន្ទាត់មើលឃើញច្បាស់ល្អ។

លក្ខណៈពិតនិងក្លែងក្លាយនៃលុយ២០ដុល្លារស៊េរីឆ្នាំ 1996-2003 មានដូចតទៅ៖

១)ក្រដាសពិតមានលក្ខណៈគ្រើមហើយស្វិត ឯក្រដាសក្លែងក្លាយ ក្រាស់ហើយខ្មៅព្រាលៗ។

២)ក្រដាសពិត លេខមាលា មានស្នាមថ្នាំជក់នៅខាងៗ (ប្រើកែវពង្រីក) ឯក្រដាសក្លែងក្លាយ គ្មានស្នាមថ្នាំជក់នៅខាងៗទេ។

៣)ក្រដាសប្រាក់ពិតរូបបណ្ដុះ ពេលលើកបញ្ចាំងនឹងពន្លឺ មើលឃើញច្បាស់ដូចរូបពិត ឯក្រដាសក្លែងក្លាយ ពេលបញ្ចាំងនឹងពន្លឺវាមានរាងស្រមោលមើលសឹងតែមិនឃើញ។

៤)ក្រដាសពិត ខ្សែការពារសុវត្ថិភាពមើលនឹងភ្នែកមិនឃើញទេ ទាល់តែលើកបញ្ចាំងពន្លឺ ចំណែកក្រដាសក្លែងក្លាយ ខ្សែការពារសុវត្ថិភាព មើលនឹងភ្នែកឃើញច្បាស់ (នៅផ្នែកខាងក្រោយនៃក្រដាសប្រាក់)។

លក្ខណៈពិតនិងក្លែងក្លាយនៃក្រដាស ២០ ដុល្លារស៊េរីឆ្នាំ 2004-2009 មានដូចជា៖

១)ក្រដាសពិត គ្រើមហើយស្វិត និង មានសរសៃឆ្មារៗ ពណ៌ខៀវ-ក្រហម ច្រើននៅលើផ្ទៃក្រដាសប្រាក់ ឯក្រដាសក្លែងក្លាយ រលោង ហើយស្រអាប់ និងមានសរសៃឆ្មារៗពណ៌ខៀវក្រហម តិច។

២)ក្រដាសពិតពេលផ្អៀងចុះឡើងលេខ 20 ប្ដូរពណ៌ ពីទង់ដែង ទៅ ជាពណ៌បៃតង ឯ ក្រដាសក្លែងក្លាយ ពេលផ្អៀងចុះឡើង លេខ 20 មិនប្ដូរពណ៌ ពីទង់ដែងទៅជាងពណ៌បៃតងទេ។

៣)ក្រដាសពិត រូបបណ្ដុះពេលបញ្ចាំងនឹងពន្លឺ មើលឃើញច្បាស់ដូចរូបពិត រីឯ ក្រដាសក្លែងក្លាយពេលលើកបញ្ចាំងនឹងពន្លឺវាមានរាងជាស្រមោល មើលមិនច្បាស់។

៤)ក្រដាសពិត ត្រារតនាគារ និង ផ្កាយទាំង ១៣ មានលក្ខណៈច្បាស់ល្អ ឯក្រដាសក្លែងក្លាយ ត្រារតនាគារនិងផ្កាយទាំង១៣ មានលក្ខណៈមិនច្បាស់ល្អទេ។

៥)ក្រដាសពិត នៅផ្នែកខាងក្រោយនៃក្រដាសប្រាក់ ទឹកថ្នាំបោះពុម្ព នៅលើរូបភាពមានលក្ខណៈច្បាស់ល្អ ចំណែកក្រដាសក្លែងក្លាយ នៅផ្នែកខាងក្រោយទឹកថ្នាំបោះពុម្ពនៅលើរូបភាពមានលក្ខណៈមិនសូវច្បាស់ល្អទេ។

ក្រដាស១០០ និង២០ ដុល្លារក្លែងក្លាយជាក្រដាសដែលជួបញឹកញាប់ជាងគេហើយមនុស្សមួយចំនួនកំពុងទិញដូរលុយដុល្លារក្លែងក្លាយ ទាំងមិនដឹងខ្លួន។ អ្នកខ្លះយកមកផ្ញើនៅធនាគារតែត្រូវបានបដិសេធដោយសារលុយនោះជាលុយក្លែងក្លាយ។ កញ្ញាគង់ ច័ន្ទវណ្ណី បានឱ្យយោបល់ថាមុននឹងទទួលលុយត្រូវពិនិត្យមើលឱ្យបានច្បាស់សិនចៀសវាងការខាតប្រាក់កាស៕

បានដឹងហើយសាកយកលុយរបស់ប្រិយមិត្តមកមើល ចង់ដឹងថាលុយនេះក្លែងក្លាយឬក៏ពិត?

អត្ថបទ៖ គង់ ច័ន្ទវ៉ាន់ណេង