YG បកស្រាយព័ត៌មានបែកបាក់ក្រុម 2NE1

2015-06-09 18:29:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម YG Entertainment បានចេញសេចក្ដីថ្លែងការណ៍មួយកាលពីថ្ងៃទី៦ ខែមិថុនា ដើម្បីបកស្រាយពីពាក្យចចាមអារ៉ាមនិយាយថា ក្រុមចម្រៀងនារី 2NE1 នឹងត្រូវរំសាយចោល។

“ខ្ញុំមិនដឹងថាពាក្យចចាមអារ៉ាមទាំងនេះមានប្រភពពីណាទេ ប៉ុន្តែដែលថា 2NE1 ត្រូវរំសាយនោះ គឺមិនមែនជាការពិតទេ"។ អ្នកនាំពាក្យរបស់ផលិតកម្ម YG ម្នាក់បាននិយាយក្នុងសេចក្ដីថ្លែងការណ៍។

ពាក្យចចាមអារ៉ាមអំពីការបែកបាក់ក្រុម 2NE1 បានលេចឮតាំងពីឆ្នាំ២០១៤ ប៉ុន្តែព័ត៌មាននេះបានរើឡើងវិញម្ដងទៀតនាក្នុងខែមិថុនានេះ បន្ទាប់ពីសារព័ត៌មានកូរ៉េ Chic News បានអះអាងថាបុគ្គលិកផលិតកម្ម YG ម្នាក់បានផ្ដល់ព័ត៌មានលម្អិតពីការរំសាយក្រុម 2NE1។ របាយការណ៍នោះបាននិយាយថា សមាជិក Dara នឹងទៅចាប់អាជីពសម្ដែងវិញ ហើយ CL នឹងក្លាយជាតារាចម្រៀងទោលក្នុងផលិតកម្មនៅអាមេរិក។ ចំណែក Park Bom និង Minzy គឺមិនត្រូវបានបញ្ជាក់ក្នុងរបាយការណ៍មួយនេះឡើយ។

ឆ្លើយតបនឹងព័ត៌មាននេះ ផលិតកម្ម YG បាននិយាយថា “ថ្វីបើ BOM កំពុងពិចារណាឡើងវិញពីសកម្មភាពរបស់នាង ហើយសមាជិកផ្សេងៗកំពុងមមាញឹកនឹងសកម្មភាពជាតារាទោល ប៉ុន្តែក្រុម 2NE1 នឹងចេញបទចម្រៀងថ្មីក្នុងឆ្នាំនេះ"។

រយៈពេលជាងមួយឆ្នាំហើយ ដែលក្រុមចម្រៀង 2NE1 បានផ្អាកសកម្មភាពទាំងអស់នៅប្រទេសកូរ៉េខាងត្បូង។ BOM បានបាត់មុខក្រោយរងការចោទប្រកាន់ពីបទនាំចូលគ្រឿងញៀនខុសច្បាប់កាលពីខែមិថុនា ឆ្នាំមុន។ អំឡុងពេលនេះ 2NE1 បានចេះសម្ដែងខ្លះៗក្នុងការប្រគំតន្ត្រីនៅក្រៅប្រទេស ហើយភាគច្រើនមានតែសមាជិកតែ ៣រូបប៉ុណ្ណោះដែលបង្ហាញមុខក្នុងកម្មវិធីផ្លូវការ។ អាល់ប៊ុមចុងក្រោយរបស់ពួកគេ គឺអាល់ប៊ុម "Crush” ដែលចេញកាលពីដើមឆ្នាំ ២០១៤ ៕