ស្ទង់មតិ៖ប្រជាជនអាមេរិក១០នាក់ មានតែម្នាក់ស្គាល់ Messi និង Ronaldo

2015-06-11 13:15:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Lionel Messi និង Cristiano Ronaldo ត្រូវបានគេទទួលស្គាល់ថាជាបុគ្គលល្បីល្បាញជាងគេក្នុងវិស័យបាល់ទាត់។ ប៉ុន្តែបើងាកទៅមើលនៅសហរដ្ឋអាមេរិកវិញ ពួកគេមិនសូវមានឈ្មោះល្បីល្បាញនោះទេ ដោយក្នុងចំណោមប្រជាជន១០នាក់មានតែម្នាក់ប៉ុណ្ណោះ ដែលសួរទៅស្គាល់ខ្សែប្រយុទ្ធ២នាក់នេះ។

ការស្ទង់មតិមួយបានបង្ហាញឱ្យឃើញថា ប្រជាជនអាមេរិកមួយចំនួនមិនសូវជាស្គាល់កីឡាករ Messi និង Ronaldo ទេ ទោះជាកីឡាករ២រូបនេះល្បីល្បាញពាសពេញពិភពលោកយ៉ាងណាក៏ដោយ។ ក្នុងការសាកសួរនោះ ខ្សែប្រយុទ្ធក្រុម Real Madrid ត្រូវបានគេទទួលស្គាល់ថាមានរូបសង្ហាពិតមែន តែមានតែបុរសម្នាក់គត់ដែលស្គាល់រូបគេថាជាកីឡាករបាល់ទាត់ ក្រៅពីនោះមិនស្គាល់នោះទេ ហើយថែមទាំងមាននារីម្នាក់គិតថាកីឡាករវ័យ៣០ឆ្នាំរូបនេះជាសមាជិកក្រុម One Direction ដែលចាកចេញពីក្រុមទៀតផង។

ដោយឡែកបើខ្សែប្រយុទ្ធក្រុម Barcelona វិញ ក៏គេមិនស្គាល់ច្បាស់ថាជានរណាដែរ ពោលគឺសួរមនុស្ស១០នាក់ មានតែម្នាក់គត់ដែលស្គាល់កីឡាកររូបនេះថាលេងនៅក្លិប Barcelona ។ ក្រៅពីនេះគឺគិតថាកីឡាករជម្រើសជាតិអាហ្សង់ទីនរូបនេះជាបុគ្គលម្នាក់ឈ្មោះ Lionel Liebowitz ឯណាណោះវិញ។

ចំពោះលទ្ធផលនៃការស្ទង់មតិនេះ គឺត្រូវបានគេសន្និដ្ឋានថានៅអាមេរិកប្រជាជនភាគច្រើនមិនសូវជាខ្វល់រឿងបាល់ទាត់នោះទេ ទោះជាបច្ចុប្បន្នក្នុងប្រទេសនេះកំពុងព្យាយាមពង្រីកវិស័យកីឡាបាល់ទាត់ឱ្យខ្លាំងដូចនៅអឺរ៉ុបក៏ដោយ។

សូមបញ្ជាក់ផងដែរថា នៅសហរដ្ឋអាមេរិកកីឡាដែលពេញនិយមជាងគេគឺ បាល់អោបអាមេរិក (American football) លេខ១ , បាល់បោះលេខ២ , កីឡា Baseball លេខ៣និងកីឡាបាល់ទាត់លេខ៤៕

ចុចអានSir Alex ថាគ្មាននរណាល្អជាង Ronaldo និង Messi ទេ

ប្រែសម្រួល៖ មុន្នី រម្យ ប្រភព៖ mirror