ដួង ស្រីពេជ្រ ថ្វីត្បិតមានការរិះគន់មែន តែការងាររឹតតែសម្បូរធ្វើ

2015-06-12 16:11:11
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាតារាម៉ូដែល ដួង ស្រីពេជ្រ នាឱកាសជាភ្ញៀវកិត្តិយសក្នុងពិធីបើកសម្ពោធរឿង “កំពូលអង្គរក្សស្រី” នៅរោងភាពយន្ត Major Cineplex by Cellcard បានឲ្យដឹងថាត្បិតតែមួយរយៈមុនមានការរិះគន់លើការស្លៀកពាក់លើរូបនាងក៏ពិតមែន តែការងារសិល្បៈឥឡូវរឹតតែមមាញឹកលើសដើម។

“ចាប់តាំងពីនាងខ្ញុំបានបកស្រាយរឿងស្លៀកពាក់សិចស៊ីនោះរួចមកឃើញថាបងប្អូនទស្សនិកជនពួកគាត់បានយល់ថាការស្លៀកពាក់បែបនោះមិនមែនជាចេតនារបស់នាងខ្ញុំទេ។ ឥឡូវមានអ្នកគាំទ្រខ្ញុំច្រើនមែនទែន ដោយពីមុនមានតែទស្សនិកជននៅក្នុងរាជធានីភ្នំពេញប៉ុណ្ណោះដែលស្គាល់នាងខ្ញុំ តែឥឡូវសូម្បីនៅបណ្ដាខេត្តឆ្ងាយៗក៏គេស្គាល់ និងគាំទ្រ ធ្វើឲ្យខ្ញុំទទួលបានការងាររឹតតែច្រើនដែរ"។ ស្រីពេជ្រ រៀបរាប់ប្រាប់ Sabay។

តាមសាមីខ្លួន គ្រាន់តែខែនេះ នាងបានថត៤រឿង ក្នុងនោះតួឯកបានពីរ និងតួរងពីរដូចគ្នា គឺរឿង "ផ្កាបួនទង" "ចិត្តស្អប់បង្កប់ស្នេហ៍" "អាមោកលក់ម៉ាំ" និងមួយទៀតនាងភ្លេចចំណងជើង។ ស្រីពេជ្រ បន្ថែមថា ក្នុងចំណោមរឿងទាំងអស់មានតែមួយទេដែលគេទាក់ទងមកមុន ហើយបីរឿងទៀតក្រោយធ្លាយរូបសិចស៊ី។ ចំណែកខែមុននាង ទើបថតចប់រឿងទី១៣ដែរ។

ចំពោះគូរអនាគតវិញតារាម៉ូដែលខាងលើបាននិយាយថា"រាល់ថ្ងៃគឺរវល់ខ្លាំងណាស់សូម្បីតែពេលវេលាសម្រាប់ខ្លួនឯងក៏គ្មានផង មានពេលណាទៅគិតដល់រឿងនោះ តែបើគូព្រេងដល់មែនពេលណាពេលហ្នុងចុះ"។ ជាចុងក្រោយ ស្រីពេជ្រ បានសំណូមពរឲ្យពុកម៉ែបងប្អូនទាំងអស់នៅក្នុងប្រទេស ក៏ដូចជានៅក្រៅប្រទេសសូមជួយរិះគន់ក្នុងន័យស្ថាបនា តែកុំប្រើពាក្យអសុរស៕

អត្ថបទ៖ទ្រី រ៉ាវី