របស់១០យ៉ាង នារីៗគួរមានតាមខ្លួនក្នុងរដូវភ្លៀង

2015-07-16 18:06:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ចូលដល់រដូវភ្លៀង ប្រិយមិត្តប្រហែលជាមានបញ្ហាខ្លះៗ ជាពិសេសអ្នកដែលត្រូវចេញទៅខាងក្រៅញឹកញាប់។ ប៉ុន្តែកុំបារម្ភ របស់១០យ៉ាងខាងក្រោមនេះ នឹងអាចផ្ដល់ឲ្យអ្នកទាំងសុវត្ថិភាព ទំនុកចិត្ត និងភាពស្រស់ស្អាត សម្រាប់រដូវភ្លៀងនេះ៖

១. ឆត្រ

ឆត្រគឺជាសម្ភារៈការពារភ្លៀងបានល្អបំផុត សម្រាប់អ្នកថ្មើរជើង។ មិនត្រឹមអាចការពារភ្លៀងនោះទេ ការបាំងឆត្រក៏បង្កើនភាពទាក់ទាញមួយកម្រិតដែរសម្រាប់នារីៗ។

២. អាវភ្លៀង

សម្ភារៈចាំបាច់មួយទៀតនោះគឺអាវភ្លៀងនេះហើយ។ អ្នកគួរដាក់វាតាមកាបូប ឬកែបម៉ូតូដើម្បីការពារកុំអាវខោអាវទទឹក ពេលចេញដំណើរតាមផ្លូវ។

៣. ខោខ្លី

រដូវភ្លៀង បើអ្នកស្លៀកខោវែង ឬសំពត់វែង វានឹងងាយប្រឡាក់ មិនថាអ្នកដើរ ឬជិះម៉ូតូ។ ដូច្នេះខោខ្លីៗគឺជាជម្រើសល្អ ប្រសិនបើអ្នកមិនចង់លំបាកច្រើននៅពេលបោកគក់។

៤. អាវដៃវែង

ក្នុងរដូវភ្លៀង នារីគួរមានអាវដៃវែងពាក់ជាប់នឹងខ្លួន។ ធ្វើបែបនេះអាចការពារខ្លួនអ្នកពីអាកាសធាតុត្រជាក់ដែលងាយបង្កជាជំងឺផ្ដាសាយ។

៥. កន្សែងរុំក

កន្សែងរុំក ក៏ជារបស់សំខាន់មួយដែរ ដែលអាចការពារខ្លួនអ្នកពីអាកាសធាតុត្រជាក់ និងផ្ដាសាយ។ ម្យ៉ាងទៀត វាក៏ជាការលេងម៉ូដទាក់ទាញ សក្ដិសមនឹងរដូវកាលផងដែរ។

៦. ស្បែកជើងជ័រ

ប្រសិនបើអ្នកចង់ធ្វើដំណើរកាត់ភ្លៀង ឬផ្លូវទទឹក ដោយមិនចាំបាច់ព្រួយបារម្ភពីការសើម ឬខូចស្បែកជើង អ្នកគួរជ្រើសរើសស្បែកជើងជ័រ។ បច្ចុប្បន្នស្បែកជើងប្រភេទនេះមានម៉ូដសម្បូរបែប ដែលអ្នកអាចជ្រើសរើសមកពាក់ និងមានភាពទាក់ទាញមិនចាញ់ស្បែកជើងថ្លៃៗនោះទេ។

៧. ស្បែកជើងកវែង

សម្រាប់ថ្ងៃណាដែលមានភ្លៀងធ្លាក់ខ្លាំង រហូតដល់លិចផ្លូវ ប្រាកដជាគ្មានស្បែកជើងណាល្អជាងស្បែកជើងកវែងនោះឡើយ ព្រោះវានឹងអាចការពារជើងរបស់អ្នកពីទឹកកខ្វក់។

៨. កាបូបមិនជ្រាបទឹក

កាបូបជារបស់សំខាន់ដែលនារីច្រើនយកតាមខ្លួន ដូច្នេះក្នុងរដូវភ្លៀងអ្នកគួរជ្រើសរើសកាបូបណាដែលមិនជ្រាបទឹក ទុកគ្រាន់ដាក់របស់របរ ក៏ដូចជាទូរសព្ទដៃកុំឲ្យត្រូវភ្លៀង។

៩. គ្រឿងសម្អាងមិនជ្រាបទឹក

នាររដូវភ្លៀង អ្នកគួរជ្រើសរើសគ្រឿងសម្អាងណាដែលធន់នឹងទឹក ដើម្បីការពារកុំឲ្យមានស្នាមប្រឡាក់ប្រតេកប្រតាក។

១០.កន្សែងដៃ

នៅពេលមុខនិងខ្លួនអ្នកសើមទទឹកដោយសារភ្លៀង អ្នកប្រាកដជាត្រូវការរបស់ម្យ៉ាងដើម្បីជូតឲ្យស្ងួត។ ដូច្នេះអ្នកគួរមានកន្សែងដៃតូចមួយតាមខ្លួន ដើម្បីងាយយកមកប្រើឲ្យបានទាន់ចិត្ត ៕