ឌីជេ ឡាយអិន ត្រូវភរិយាប្ដឹងសុំលែងលះ

2014-10-14 00:42:52
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ហែម បូរិទ្ធ ដែលត្រូវបានគេស្គាល់ថាជា ឌីជេ ឡាយអិន នោះ ស្ងាត់ៗស្រាប់តែធ្លាយព័ត៌មានចេញមកថា ភរិយាលោក គឺអ្នកនាង សន សុម៉ាលីនដា បានដាក់ពាក្យបណ្ដឹងទៅកាន់សាលា ដំបូងរាជធានីភ្នំពេញ ដោយសុំលែងលះផ្ដាច់សមគ្គសង្វាសជាមួយគ្នាពីឥឡូវនេះទៅ។

ឌីជេ ឡាយអិន បានទម្លាយដោយផ្ទាល់ ដោយលោកបានបង្ហោះលិខិតប្ដឹងលែងលះនោះនៅលើបណ្ដាញសង្គមរបស់លោក។ តាមរយៈបណ្ដឹងលែងលះនោះ គឺភរិយារបស់លោក លើកយកហេតុផលអស់និស្ស័យជាមួយស្វាមីឈ្មោះ ហែម បូរិទ្ធ គឺលោក ឡាយអិន។ ចំណុចសំខាន់មួយទៀតដកស្រង់ចេញពីបណ្ដឹងរបស់អ្នកនាង សុម៉ាលីនដា គឺអ្នកនាងលើកឡើងពីការចាប់ដៃគ្នាប្រមាណ៤ឆ្នាំ ពោលគឺតាំងពីបានរៀបការស្របច្បាប់ជាមួយនឹងលោក ហែម បូរិទ្ធ ហៅ ឡាយអិន បានចុះសំបុត្រអាពាហ៍ពិពាហ៍ លេខ០៦ ខែកុម្ភៈ ឆ្នាំ២០១១ មក ការរស់នៅមិនមានសល់ទ្រព្យសម្បត្តិអ្វីឡើយ មានតែបំណុលធនាគារប៉ុណ្ណោះ។

ក្នុងបណ្ដឹងលែងលះដដែលនេះ គឺ អ្នកនាង សុម៉ាលីនដា អះអាងទទួលខុសត្រូវលើបំណុលទាំងអស់ ព្រមទាំងសុំសិទ្ធិចិញ្ចឹមកូនទាំងបី ដោយមិនទាំងសុំអាហារកិច្ចសម្រាប់ចិញ្ចឹមកូនពីលោក ឡាយអិន ថែមទៀតផង។

ពាក់ព័ន្ធនឹងបញ្ហានេះ លោក ឡាយអិន បានឆ្លើយប្រាប់ Sabay តាមទូរសព្ទយ៉ាងខ្លីថា ពួកលោកពិតមានរឿងរកាំរកូសមែន។ "មានរឿងរកាំរកូសបង ប៉ុន្តែប្អូនសុំចិត្តបងមុនណា ឥឡូវនេះប្អូនកំពុងរវល់រើផ្ទះ ចាំ១ម៉ោងអីទៀតចុះណាបង ប្អូនសុំទោស!”។

វិលមកអ្នកនាង សុន សុម៉ាលីនដា វិញ មិនអាចសុំការអធិប្បាយបានទេរសៀលនេះ ដោយទូរសព្ទមិនអាចភ្ជាប់ទំនាក់ទំនងបាន។

ខាងក្រោមជាឯកសារពាក្យបណ្ដឹងរបស់អ្នក សុម៉ាលីនដា ប្ដឹងសុំលែងលះជាមួយលោក ឡាយអិន។