អាយុ១៥ឆ្នាំ ចូលលេងយប់មិញ បំបែកកំណត់ត្រានៅ Euro

2014-10-14 17:14:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ Martin Odegaard បានក្លាយជាកីឡាករក្មេងជាងគេបំផុតក្នុងប្រវត្តិសាស្ត្រពានរង្វាន់ទ្វីបអឺរ៉ុប ឬ Uefa Euro វគ្គជម្រុះ ក្រោយចូលលេងឲ្យជម្រើសជាតិន័រវែសយប់មិញ ដោយមានអាយុត្រឹមតែ១៥ឆ្នាំ និង៣០០ថ្ងៃ។

ការប្ដូរចូលលេងនៅនាទី៦៣ជំនួស Mats Moller បានធ្វើឲ្យយុវជនរូបនេះ បំបែកកំណត់ត្រាចាស់របស់កីឡាករ Sigurdur Jonsson នៃក្រុមអ៊ីស្លង់ ដែលចូលលេងក្នុងវ័យ១៦ឆ្នាំ ២៥១ថ្ងៃ កាលពីនៅវគ្គជម្រុះ Euro ឆ្នាំ១៩៨៤។

Odegaard (លេខ៩) ប្ដូរចូលលេងយប់មិញ

នៅក្នុងការប្រកួតយប់មិញនេះ ន័រវែសបានយកឈ្នះប៊ុលហ្គារី ២-១ ស៊ុតបញ្ចូលទីដោយ Tarik Elyounoussi និង Havard Nielsen ខណៈ១គ្រាប់របស់ប៊ុលហ្គារីធ្វើបានដោយ Nikolay Bodurov។ ជ័យជម្នះនេះធ្វើឲ្យន័រវែសមាន៦ពិន្ទុ ក្នុង៣ប្រកួត ពូល H។

សម្រាប់កំណត់ត្រាកីឡាករក្មេងជាងគេនៅជុំផ្ដាច់ព្រ័ត្រ Euro វិញ គឺកំពុងកាន់ដោយកីឡាករហុល្លង់ Jetro Willems ដែលចូលលេងក្នុងអាយុ១៨ឆ្នាំ ៧១ថ្ងៃ កាលពីនៅ Euro 2012 វគ្គសន្សំពិន្ទុតាមពូល។ ប្រសិនបើន័រវែសអាចបន្តទម្រង់លេងល្អ ហើយអាចឡើងទៅលេងជុំផ្ដាច់ព្រ័ត្រនៅឆ្នាំ២០១៦ នោះ Odegaard នឹងអាចបំបែកកំណត់ត្រាបានមួយទៀតមិនខាន។

Odegaard បានចូលលេងឲ្យក្រុមឈុតធំ Stromsgodset របស់ន័វែស ក្រោយលេងឲ្យឈុតយុវជនរបស់ក្រុមនេះតាំងពីកុមារភាព។ ទោះមានអាយុត្រឹម១៥ឆ្នាំ ប៉ុន្តែរូបគេអាចជាប់ក្នុងឈុតជម្រើសជាតិ ទាំង U-17, U-21 និងឈុតធំ។ ដោយសារតែសមត្ថភាពលេចធ្លោបែបនេះ ធ្វើឲ្យក្លឹបធំៗជាច្រើនចង់បានរូបគេ ដែលមានដូចជា Bayern Munich, Barcelona, Real Madrid និង Liverpool ជាដើម។ កីឡាករដែលមានឪពុកជាអ្នកគាំទ្រស្មោះស្ម័គ្ររបស់ Liverpool រូបនេះ ក៏ធ្លាប់ទៅហ្វឹកហាត់នៅ Man Utd និងក្លឹបមួយចំនួននៅអាល្លឺម៉ង់ផងដែរ៕