ជ័យ សោភា៖ យុវជនខ្មែរយល់ដឹងពីអាស៊ានកាន់តែច្រើនឡើង

2015-08-14 16:24:27
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជ័យ សោភា អគ្គនាយករងទូរទស្សន៍ជាតិកម្ពុជា (ទទក) បានប្រាប់ Sabay ឱ្យដឹងថា យុវជនខ្មែរមានការយល់ដឹងច្រើនជាងមុនអំពីចំណេះដឹងទូទៅដែលទាក់ទងនឹងអាស៊ាន។

លោកថា សន្ទុះនៃការយល់ដឹងរបស់យុវជនខ្មែរមានការកើនឡើង ដោយសារពួកគេអាចឆ្លើយសំណួរបានក្នុងកម្មវិធី «សំណួរ ចម្លើយសម្រាប់ការយល់ដឹងអំពីអាស៊ាន» ដែលក្រសួងការបរទេស និង សហប្រតិបត្តិការអន្តរជាតិ សហការជាមួយ ទូរទស្សន៍ជាតិកម្ពុជា បង្កើតឡើង។ លោកបានលើកឡើងថា « យើងអាចសម្គាល់ថា កើនឡើងបានដោយសារពេលដាក់សំណួរទៅពួកគេឆ្លើយបាន ហើយពួកគេប្រហែលជាបានស្រាវជ្រាវ លើវេបសាយមួយចំនួន ដែលទាក់ទងនឹងអាស៊ាន ដោយសារតែការសិក្សារបស់ពួកគេបែបងាយនេះហើយ ទើបពួកគេចេះដឹងច្រើនណាស់»។

កាលពីឆ្នាំមុនៗ ក្រសួងព័ត៌មាន ក៏ធ្លាប់បានរៀបចំកម្មវិធី បែបនេះដើម្បីវាស់ស្ទង់ សមត្ថភាពសិស្សវិទ្យាល័យ នៅក្នុងប្រទេស។ អ្នកដែលជាប់ជយលាភី អាចបន្តទៅប្រកួតជាមួយប្រទេស ដែលជាសមាជិកអាស៊ានទាំង ១០ ដូចជាឆ្នាំ ២០១១ កម្ពុជាធ្វើជាម្ចាស់ផ្ទះ និង ទទួលបានជយលាភីលេខ ២ ឆ្នាំ ២០១៣នៅប្រទេសវៀតណាម និង ឆ្នាំ២០១៦ ខាងមុខនេះ ឡាវនឹងធ្វើជាម្ចាស់ផ្ទះ។

លោកអគ្គនាយកក៏បានសំណូមពរឱ្យយុវជនខ្មែរទាំងអស់គួរតែស្រវាស្រទេញ សិក្សាស្វែងយល់ និង បង្កើនចំណេះដឹងទាក់ទងនឹង អាស៊ាន ពីព្រោះ កម្ពុជាត្រូវអនុវត្តតាមគោលការណ៍ផ្សេងៗ ទៀតរបស់អាស៊ាន ជាពិសេសដើម្បីត្រៀមខ្លួនសមាហរណកម្មអាស៊ាន ពីសមាគមអាស៊ាន ទៅជា សហគមអាស៊ាន ដែលគ្រោងធ្វើឡើងនៅចុងឆ្នាំ ២០១៥ ខាងមុខ៕

អត្ថបទ៖ ណេង ណេង