​ លោក​ Stephen Peterson ​​អ្នក​ប្រឹក្សា​​ដែល​មាន​បទពិសោធន៍​​​​ជំនួញ ​និង​អាជីវកម្ម​​​​​​​​​​នៅ​កម្ពុជា​យូរ​ឆ្នាំ​បាន​ចូលរួម​​ធ្វើ​បទ​បង្ហាញ​​​ពាក់ព័ន្ធ​នឹង​ការ​បង្កើត​គំនិត​អាជីវកម្ម​ថ្មីៗ​​​​​ក្នុង​កម្មវិធី​ Startup Insight ​កាល​ពី​ពេល​ថ្មីៗ​ឲ្យ​អ្នក​ចូលរួម​ជាង ​១៥០ ​នាក់​បាន​យល់​ដឹង។

​អ្នក​ជំនាញ​ជនជាតិ​កាណាដា​​ដែល​រស់នៅ​ទឹកដី​កម្ពុជា​ជា​ច្រើន​ឆ្នាំ​បាន​លើក​យក​ចំណុច​មួយ​ចំនួន​ដែល​យុវជន​អាច​សម្លឹង​រក​ឱកាស​ដើម្បី​បង្កើត​អាជីវកម្ម​បាន។ ​​ចំណុច​ដំបូង​​គឺ​សម្លឹង​រក​ដំណោះស្រាយ​ចំពោះ​បញ្ហា​ដែល​កើត​មាន​នៅ​ក្នុង​សង្គម។ ​លោក​បាន​លើក​យក​​​​​​បញ្ហា​ការ​កកស្ទះ​ចរាចរណ៍ ​បញ្ហា​ចំណត​យានយន្ត​ជា​ឧទាហរណ៍។ «តើ​អ្នក​មាន​មធ្យោបាយ​ណា​ដែល​អាច​ដោះស្រាយ​បញ្ហា​នេះ​ល្អ​ប្រសើរ និង​ងាយស្រួល​ទេ? ​បើ​អាច​នោះ​ជា​ឱកាស​អាជីវកម្ម​​​ថ្មីមួយ»។

 លោក​ Stephen Peterson ​​អ្នក​ប្រឹក្សា​ប្រចាំ​សាកលវិទ្យាល័យ​ជាតិ​គ្រប់គ្រង

​​​បង្កើត​ក្រុមការងារ​ដែល​មាន​ជំនាញ​ចម្រុះ ​និង​ចក្ខុវិស័យ​ដូចគ្នា​ជា​អ្វី​ដែល​​​ជួយ​​​ឲ្យ​​​​អ្នក​ជោគជ័យ​បាន។ ​​​នេះជា​ការ​លើក​ឡើង​របស់​អ្នក​ជំនាញ​ដដែល។​ ​​ត្រង់​ចំណុច​នេះ​លោក​និយាយ​ថា ​​មិន​មែន​ចង់​ធ្វើ​អ្វី​មួយ​​​ ​​​ចេះ​តែ​ជំនាញ​មួយ​នោះ​គ្រប់គ្រាន់​ទេ ​បើ​មាន​សមាជិក​ក្រុម​ដែល​មាន​ជំនាញ​ខុសៗ​មក​​រួម​បញ្ចូល​គ្នា​នោះ​វា ​អាច​នឹង​បង្កើត​ស្នាដៃ​ថ្មី​មិន​ធ្លាប់​មាន​ និង​ល្អ​ជាង​អ្វី​ដែល​អ្នក​ដទៃ​ធ្វើ​ទៅ​ទៀត។ ​​​​លោក​បាន​លើក​យក​ហាង​កាហ្វេ ​Brown ​មក​ធ្វើ​ជា​ឧទាហរណ៍ «អ្នក​ឃើញ​ហើយ​ថា ​ហាង​កាហ្វេ​ Brown ​ជា​ហាង​កាហ្វេ​ផ្ដួចផ្ដើម​ដោយ​ស្ថាបនិក​ខ្មែរ​ដែល​មាន​ជំនាញ​ខុសៗ​គ្នា​ ខ្លះ​ជំនាញ​ខាង​ស្ថាបត្យកម្ម ​ខ្លះ​ខាង ​IT ​ខ្លះ​ខាង​​អាហារ​​មក​ចាប់​ដៃ​គ្នា។​​ ​ពេល​នេះ​ ហាង​កាហ្វេ​មួយ​នេះ​បាន​ក្លាយ​ជា​ហាង​កាហ្វេ​ដែល​​នាំ​មុខ​គេ​ក្នុង​ស្រុក​ផ្តើម​ចេញ​ពីការ​បញ្ចូល​ជំនាញ​ខុសៗ​គ្នា​ទាំង​នោះ​រួមគ្នា»។

​​នៅ​មាន​បួន​ចំណុច​ទៀត​ដែល​លោក​បាន​បង្ហាញ​គឺ ​​ត្រូវ​ពូកែ​សួរ​សំណួរ ​​​សង្កេត ​​ពិសោធន៍ ​និង​ចុងក្រោយ​គឺ​​ការ​ប្រាស្រ័យ​ទាក់ទង​ល្អ​ជាមួយ​មនុស្ស​ជុំវិញ។ ​លោក​ថា ​ជន​ល្បីៗ​​ដូចជា​ស្ថាបនិក​ Apple ​លោក​ Steve Jobs ​ចូល​ចិត្ត​សួរ​សំណួរ​​ខ្លាំងៗ​ដូចជា ​«មាន​វិធី​ណា​ដែល​ល្អ​ជាង​នេះ​ទេ?» ​ឬ​ «យើង​អាច​ធ្វើ​អ្វី​ខុស​ពី​អ្វី​ដែល​កំពុង​មាន​ឬ​ទេ?» ​ជាដើម។ ​​

ងាក​មក​ការ​សង្កេត ​​​បើ​អ្នក​ពូកែ​សង្កេត​​ក៏​អាច​សម្លឹង​មើល​ឃើញ​ឱកាស​ថ្មីៗ​ដែរ ​ដូចជា​​​ទំនោរ​របស់​អតិថិជន​នៅ​ក្នុង​ទីផ្សារ​អ្វី​មួយ​គឺ​មាន​ការ​ប្រែប្រួល​ទៅ​តាម​ពេល​វេលា។ ​បើ​អាច​សង្កេត​រក​ឃើញ​អ្វី​ដែល​អាច​បំពេញ​តម្រូវការ​របស់​អតិថិជន​នោះ​អ្នក​អាច​ទទួល​បាន​ឱកាស​ជោគជ័យ​ទៅ​តាម​នោះ​ដែរ។

​ងាក​មក​ការ​ពិសោធន៍​វិញ ​អ្នក​បង្កើត​គំនិត​ច្នៃ​ប្រឌិត​ប្លែកៗ​ចូលចិត្ត​ការ​ពិសោធន៍​នេះ​ណាស់។ ​ឧទាហរណ៍​ជាក់​ស្ដែង​មួយ ​​បើ​មាន​ទូរសព្ទ​ច្រើន​​នៅ​កន្លែង​តែ​មួយ​ត្រូវ​ការ​បញ្ចូល​ថ្ម ​នោះ​កន្លែង​នោះ​ប្រាកដ​ជា​មើល​ទៅ​រញ៉េរញ៉ៃ​ដោយសារ​ខ្សែ​ច្រើន​ត្រូវ​ដោត​ក្នុង​ពេល​តែ​មួយ។ ​ចុះ​បើ​អ្នក​អាច​រក​ឃើញ​វិធី​ងាយ​ជាង​នេះ​ដូចជា ​រក​វិធី​សាក​ថ្ម​ដោយ​មិន​ប្រើ​ខ្សែ​ ហើយ​ពិសោធន៍​វា​ឲ្យ​បាន​សម្រេច​នោះ​ប្រាកដ​ជា​​ឱកាស​ដ៏​ល្អ​មួយ។

​​ចំណុច​ចុងក្រោយ​គឺ​ការ​ប្រាស្រ័យ​ទាក់ទង។ ​​ការ​ប្រាស្រ័យ​ទាក់ទង​ជាមួយ​មនុស្ស​ផ្សេងៗ​គ្នា​អាច​ឲ្យ​អ្នក​សម្លឹង​ឃើញ​ឱកាស​ថ្មីៗ។ ​អ្នក​នឹង​ដឹង​ថា​ ​អ្វី​កំពុង​កើត​ឡើង ​អ្នក​នេះ​កំពុង​ត្រូវ​ការ​នេះ ​អ្នក​នោះ​កំពុង​ត្រូវ​ការ​នោះ។ ​​គំនិត​ដែល​អ្នកទទួល​បាន​ពី​មនុស្ស​ជុំវិញ​អាច​ឲ្យ​​អ្នក​មើល​ឃើញនូវ​​​ឱកាស​ថ្មី​ណាមួយ​ ​ហើយ​អ្នក​ទាំង​នោះ​ក៏​អាច​ជា​អតិថិជន​គោលដៅ​នៃ​ជំនួញ​ថ្មី​នោះ​តែម្ដង៕

អត្ថបទ៖ ​ប្រាក់ ចាន់សីហា​​

​