អ៊ីចឹងតើបាន លឹម ម៉េងសាយ ជាប់និទ្ទេស A និង ជាសិស្សឆ្នើមប្រចាំខេត្តតាកែវ

2015-09-17 12:00:49
ចំនួនមតិ 0 | ចំនួនចែករំលែក 0

ចន្លោះមិនឃើញ

លឹម ម៉េងសាយ ជាសិស្សឆ្នើមជាប់និទ្ទេស A មួយរូប ក្នុងចំណោមសិស្សបាក់ឌុបនិទ្ទេស A ចំនួន ១០៨ នាក់ ដោយមានលំដាប់ពិន្ទុសរុប ៩៩.៩៧៤ ជាពិន្ទុខ្ពស់ជាងគេប្រចាំខេត្តតាកែវ។

ម៉េងសាយ មានប្រវត្តិសិក្សាបែបណា? កត្តាអ្វីខ្លះដែលជំរុញឱ្យសិស្សរូបនេះក្លាយជាសិស្សពូកែ?

ជំនួបជាមួយ Sabay ព្រឹកមិញសិស្សវ័យ ១៧ ឆ្នាំបានលាតត្រដាងថា ខ្លួនមិនដែលស្គាល់រសជាតិលេខ ២ ម្ដងណាឡើយ ចាប់តាំងពីថ្នាក់ទី១ រហូតដល់ថ្នាក់ទី១២។ ចាប់ពីថ្នាក់ទី ១-៦ នៃមឋមសិក្សា ហ៊ុន សែន អង្គតាសោម និងដល់ទី ១០ នៃវិទ្យាល័យសម្ដេចអគ្គមហាសេនាបតីតេជោ ហ៊ុនសែន អង្គតាសោម យុវសិស្សតែងដាក់ពាក្យប្រឡងសិស្សពូកែ ពានរង្វាន់លោកឧកញ៉ាាបណ្ឌិត ច័ន្ទ សារុន ដោយទទួលចំណាត់ថ្នាក់លេខ ១ រាល់ឆ្នាំ។

គ្រួសារជាកត្តាសំខាន់មួយជួយឱ្យអ្នកភូមិព្រៃរំដេងរៀនពូកែ។ គ្រួសារបានផ្ដល់ភាពកក់ក្ដៅ ការមើលថែ ផ្ដល់ពេលវេលា និងជួយទំនុកបម្រុងគ្រប់បែបយ៉ាង ជាពិសេសសិស្សវ័យក្មេងនេះ មានលោកឪពុកដ៏ពូកែជាអ្នកបង្ហាត់បង្រៀន និងណែនាំបន្ថែម។

"ពេលរៀនថ្នាក់ទី ១ ប៉ាបង្រៀនខ្ញុំថ្នាក់ទី ២ ទើបខ្ញុំទម្លាប់ខ្លួនរហូតដល់ថ្នាក់ទី ១២ អ៊ីចឹងហើយខ្ញុំតែងឆ្ងល់មុនគេ ពេលរៀនក្នុងថ្នាក់។ ប៉ាជាជាងឡាន និងជាអតីតសិស្សពូកែម្នាក់ តែគាត់នៅចាំបានច្រើន"។

សិស្សវិទ្យាល័យសម្ដេចអគ្គមហាសេនាបតីតេជោ ហ៊ុនសែន អង្គតាសោមបញ្ជាក់ថា ចំណុចស្នូលមួយទៀតគឺ «ការដាក់គោលដៅ» ថាចង់បានអ្វី? ដើម្បីសម្រេចគោលដៅ ត្រូវរៀបចំខ្លួនរបៀបណា និងរៀនយ៉ាងដូចម្ដេច?

កត្តាមួយផ្សេងទៀត ដែលអ្នករស់នៅឃុំអង្គតាសោមទទួលបានការសិក្សាល្អ ខេត្តរបស់គេតែងមានគ្រូល្អៗមកបង្រៀនណែនាំបំប៉ន នៅពេលចុះឈ្មោះប្រឡងសិស្សពូកែថ្នាក់ខេត្ត និងថ្នាក់ជាតិម្ដងៗ។

ម៉េងសាយ មានរបៀបរៀន និងស្វ័យសិក្សាដូចម្ដេច?

ដូចជាការបញ្ជាក់ខាងលើ ម៉េងសាយ តែងរៀនមុនគ្រូជានិច្ច ដើម្បីឱ្យឆាប់យល់ និងចាំ ចំណែកម៉ោងស្វ័យសិក្សា អ្នកស្រុកត្រាំកក់ បានកំណត់ម៉ោងរៀន ចាប់ពីពេលបាយល្ងាចដល់ម៉ោង ១២ យប់ ឬអាចលើសនេះ បើមានសំណៅឯកសារច្រើនត្រូវធ្វើ ប៉ុន្តែរូបគេកម្រក្រោកពីព្រលឹមណាស់។ ចំណែកម៉ោងដ៏ល្អមួយទៀតនោះ គឺពេលថ្ងៃដោយម៉េងសាយថា ជាវេលាដែលខ្លួនរៀនឆាប់ចេះ។

ម៉េងសាយ យល់យ៉ាងណាចំពោះការប្រឡងបាក់ឌុបឆ្នាំសិក្សា ២០១៤ – ២០១៥?

"ខ្ញុំគិតថាឆ្នាំនេះវិញ្ញាសាចេញធូរមែនទែន ហើយនៅមានកំហុសបច្ចេកទេសទៀត។ ជាក់ស្តែងលំហាត់រូបវិទ្យា និងគីមីវិទ្យាមានផ្នែកខ្លះឱ្យពិន្ទុពេញតែម្ដង"។

ប្អូនលើកឡើងថា រូបវិទ្យាចេញតែមួយជ្រុង ឯគណិតវិទ្យាក៏មិនគ្រប់ស្តង់ដារ ដែលធ្លាប់មានដូចពីមុន (ធរណីមាត្រ)។ ប្អូនបន្តថា ការចេញវិញ្ញាសាបែបនេះនឹងធ្វើឲ្យគុណភាពសិក្សារបស់សិស្សជំនាន់ក្រោយថយចុះ ដោយពួកគេអាចគិតថា មិនចាំបាច់ខំប្រឹងប្រែងខ្លាំង ព្រោះវិញ្ញាសាចេញតែមេរៀន និងផ្នែកងាយស្រួល។

ម៉េងសាយ មានអារម្មណ៍បែបណា ពេលមិនបានជាប់និទ្ទេស A ពិន្ទុខ្ពស់លើសគេ?

ជុំវិញសំណួរនេះកូនទី ២ ក្នុងចំណោម ៤ នាក់ក្នុងគ្រួសារជីវភាពមធ្យម មិនដែលគិតថាបានពិន្ទុខ្ពស់លើកគេទេ គឺរំពឹងបានត្រឹម B ប៉ុណ្ណោះ ព្រោះប្អូននៅមានចំណុចខ្វះខាត ជាក់ស្ដែងមុខវិជ្ជា ខ្មែរ ប្រវត្តិ និងភាសាអង់គ្លេស។

ទោះបីជាយ៉ាងណា ម៉េងសាយ បានពេញចិត្តចំពោះលទ្ធផលរបស់ខ្លួន ព្រោះជាការខំប្រឹងប្រែង និងរីករាយពេលឃើញសិស្សផ្សេងៗទៀត ទទួលបានពិន្ទុខ្ពស់ និងជាប់ច្រើន។

សិស្សនិទ្ទេស A ដដែលបានបន្ថែមថា សិស្សខ្លាំងខ្សោយមិនសំខាន់លើមានឬក្រឡើយ ឱ្យតែខិតខំ មានពេលគ្រប់គ្រាន់ កំណត់គោលដៅឱ្យបានច្បាស់ ជាពិសេសសុខភាព។

ម៉េងសាយ ធ្លាប់ប្រលងអ្វីខ្លះ?

តាមការបញ្ចេញឱ្យដឹងរបស់សាមីខ្លួន ក្នុងកាលពីថ្នាក់ទី ១០ និង ១១ យុវជនសប្បុរស ធ្លាប់ប្រឡងគណិតវិទ្យា SUKEN Test រៀបចំដោយអ្នកសមាគមគណិតវិទ្យាកម្ពុជា សហការជាមួយវិទ្យាស្ថានគណិតវិទ្យាជប៉ុន។

ថ្នាក់ទី ១១ ឆ្នាំ២០១៤ ម៉េងសាយ ចូលរួមប្រកួត FERMAT Contest ដើម្បីវាស់ស្ទង់សមត្ថភាពគណិតវិទ្យា (ត្រូវស្តង់ដារពិភពលោកអត់) ដែលរៀបចំដោយសាកលវិទ្យាល័យ Waterloo ប្រទេសកាណាដា ដែលមានបេក្ខជនជាង ៩ ម៉ឺននាក់លើពិភពលោកចូលរួមប្រកួត។ ជាលទ្ធផលប្អូនជាជយលាភីម្នាក់ ក្នុងចំណោមអ្នកទទួលបានពិន្ទុខ្ពស់បំផុត ២៥% ដំបូងនៃបេក្ខជនជាងម៉ឺននាក់ និងបានមេដាយបញ្ជាក់ថា បានពិន្ទុខ្ពស់នៅកម្ពុជា។

ថ្នាក់ទី ១២ ឆ្នាំ ២០១៥ នេះ ម៉េងសាយ បានទទួលមេដាយមាសទូទាំងប្រទេសផ្នែកគណិតវិទ្យា ដែលធ្វើឡើងនៅខេត្តកំពត កាលពីខែមេសា។ មិនតែប៉ុណ្ណោះ ម៉េងសាយជាបេក្ខជនតំណាងឱ្យកម្ពុជា ទៅចូលរួមការប្រឡងគណិតវិទ្យាអូឡាំព្យាដលើកទី ៥៦ នៅប្រទេសថៃ កាលពីថ្ងៃ ៨ ដល់ ១៦ ខែកក្កដា និងជាយុវជនត្រូវបានជ្រើសតាំងដោយក្រសួងអប់រំ ទៅចូលរួមវេទិកាយុវជនអាស៊ាន កាលថ្ងៃទី ៨ ដល់ ១១ ខែកញ្ញា ឆ្នាំ២០១៥ នាពេលកន្លងទៅ។

ម៉េងសាយ ចង់រៀនជំនាញអ្វី? នៅសាកលវិទ្យាល័យណា?

ក្រោយទទួលនិទ្ទេស A ភ្លាម គឺមានសាកលវិទ្យាល័យជាច្រើនផ្ដល់ឱកាសអាហារូបករណ៍ ប៉ុន្តែ យុវជនមិនទាន់សម្រេចថា នឹងចូលសាលាមួយណានោះទេ។ យ៉ាងណាកូនជាងឡានរូបនេះ បានសម្លឹងឃើញជំនាញដែលខ្លួនចង់រៀនហើយ គឺវិទ្យាសាស្ត្រកុំព្យូទ័រ និង សេដ្ឋកិច្ចដែលពាក់ព័ន្ធនឹង IT ដូចជាគ្រប់គ្រងទិន្នន័យជាដើម ព្រោះជំនាញទាំងនេះ ត្រូវការអ្នកចេះគណិតវិទ្យាខ្លាំង និង មិនចង់ឱ្យអ្វីដែលខ្លួនបានរៀនបាត់បង់ចោលឥតប្រយោជន៍៕