Ronaldo ជិះយន្តហោះផ្ទាល់ខ្លួនទៅស្រុកកំណើត និងចេញផលិតផលថ្មីមួយ

2015-10-06 21:03:25
ចំនួនមតិ 0 | ចំនួនចែករំលែក 0

ចន្លោះមិនឃើញ

Cristiano Ronaldo បានជិះយន្តហោះឯកជនផ្ទាល់ខ្លួន ធ្វើដំណើរពីអេស្ប៉ាញ ទៅប្រទេសព័រទុយហ្គាល់កាលពីម្សិលមិញ និងបានចេញផលិតផលថ្មីរបស់ខ្លួនមួយ មុនពេលចូលរួមជាមួយក្រុមជម្រើសជាតិ ដែលនឹងលេង២ប្រកួត នៅវគ្គជម្រុះ Euro 2016 សប្ដាហ៍នេះ។

Ronaldo បានធ្វើដំណើរតែម្នាក់ឯង បន្ទាប់ពីលេងឲ្យ Real Madrid មិនអាចស្វែងរកគ្រាប់បាន ធ្វើឲ្យស្ដេចស បញ្ចប់លទ្ធផលត្រឹមស្មើ ១-១ ទល់ Atletico Madrid នៅកីឡដ្ឋាន Vicente Calderon កាលពីយប់ថ្ងៃអាទិត្យ។

បន្ទាប់ពីទៅដល់ស្រុកកំណើតភ្លាម តារាឆ្នើមក្រុម Real Madrid រូបនេះ បានឆ្លៀតពេលចេញនូវផលិតផលថ្មីរបស់ខ្លួនមួយ គឺស្បែកជើងដ៏ប្រណិតបែបស៊ីវិល័យ យីហោ CR7 នៅក្នុងទីក្រុង Guimaraes ភាគខាងជើងនៃប្រទេសព័រទុយហ្គាល់។ កន្លងមក Ronaldo ធ្លាប់ចេញផលិតផលជាច្រើនមកហើយដែរ ដូចជាខោក្នុង CR7, អាវ CR7 និងទឹកអប់ CR7 ជាដើម។

សម្រាប់ក្រុមជម្រើសជាតិព័រទុយហ្គាល់ ដែលមាន CR7 ជាប្រធានក្រុម ពួកគេនឹងត្រូវប៉ះដាណឺម៉ាក និងស៊ែប នៅប្រកួតជម្រុះ Euro 2016 សប្ដាហ៍នេះ ប៉ុន្តែក្រុមនេះត្រូវការតែ១ពិន្ទុទៀតប៉ុណ្ណោះ នឹងអាចកក់កៅអីទៅលេងនៅប្រទេសបារាំងហើយ បន្ទាប់ពីប្រកួត៦លើក មាន១៥ពិន្ទុ ឈរកំពូលតារាងពូល I បច្ចុប្បន្ន៕