ទៅ បុប្ផាណា បានទស្សនាកុនស្នាព្រះហស្តសម្ដេចតាដោយសេរី

2015-10-27 17:56:29
ចំនួនមតិ 0 | ចំនួនចែករំលែក 0

ចន្លោះមិនឃើញ

មានសមិទ្ធផលភាពយន្តមួយចំនួនជាស្នាព្រះហស្តរបស់សម្ដេចតា ត្រូវបាននាំយកទៅតម្កល់ទុកជាឯកសារនៅមជ្ឈមណ្ឌលធនធានសោតទស្សន៍ បុប្ផាណា ហើយបើកឱ្យមហាជនចូលទស្សនាដោយសេរីទៀតផង។

លោក ជា សុភាព អនុប្រធានមជ្ឈមណ្ឌលបានបញ្ជាក់ថា ភាពយន្តទាំងនោះធ្លាប់មានភាពល្បីល្បាញនាពេលកន្លងមកហើយដូចជារឿង "រស់ដោយសប្បាយ" ផលិតក្នុងឆ្នាំ ១៩៦៩ បង្ហាញពីជីវិតរស់នៅក្នុងភាពសប្បាយរីករាយក្នុងសម័យនោះ និងបង្កប់នូវរឿងរ៉ាវផ្សេងទៀតជាច្រើន។

លោកបន្តថា ចំពោះរឿង"អប្សរា" នៅឆ្នាំ ១៩៦៦ បង្ហាញពីសម្រស់ទីក្រុងភ្នំពេញពោរពេញដោយសំណងស្ថាបត្យកម្មដូចជា ចតុមុខ អគារប៊ូឌីង និងស្ថាបត្យកម្មផ្សេងៗទៀត ដោយមានសម្ដេចព្រះរាម បុប្ផាទេវី ជាតួឯកផងនោះ។ លោកបន្តថា អធិរាជសំឡេងមាស ស៊ីន ស៊ីសាមុត ក៏បានបង្ហាញមុខនៅក្នុងរឿងនោះផងដែរ ដោយបកស្រាយបទចម្រៀងមានចំណង "រាត្រីជួបភក្ដិ" ដែលចាត់ទុកថា ជារឿងកម្រមួយ។

ដោយឡែករឿង "កូលាបបូកគោ" ផលិតឡើងនៅក្នុងឆ្នាំ ១៩៦៩ និយាយរៀបរាប់ពីប្រវត្តិ ពេលដែលជប៉ុនចូលមកប្រទេសកម្ពុជា ខណៈបារាំងធ្វើអាណានិគម។ ហើយរឿង "សិទ្ធិប្រកាស" និយាយពីទំនាក់ទំនងខ្មែរជាមួយឥណ្ឌាសម្ដែងដោយព្រះអង្គផ្ទាល់ និងសម្ដេចម៉ែ។ ក្រៅពីនេះក៏មានរឿង "ស្រមោលអង្គរ" និយាយពីការធ្វើរដ្ឋប្រហាររបស់ ដាប ឈួន នៅក្នុងសម័យសង្គមរាស្ត្រនិយមផងដែរ។

លោក ស៊ិន ស៊ីសាមុត និងអ្នកម្នាង សៀង ឌី ក្នុងរឿង"អប្សរា"

នៅមានភាពយន្តរបស់សម្ដេចតាខ្លះមិនទាន់រកឃើញនោះទេ ខណៈក្រុមការងារកំពុងបន្តស្វែងរក។ ប៉ុន្តែក្រៅពីភាពយន្តបែបប្រឌិតខាងលើ សម្ដេចតាក៏បានបន្សល់ទុកវីដេអូឯកសារជាច្រើនទៀតរួមមានឯកសារនិយាយពីរបាំខ្មែរ ឯកសារបង្ហាញពីស្ត្រីខ្មែរក្នុងសម័យសង្គមរាស្ត្រនិយម និងមានឯកសារជាច្រើនទៀត ដែលត្រូវបានថែរក្សាយ៉ាងត្រឹមត្រូវនៅក្នុងមជ្ឈមណ្ឌលមួយនេះ។

ទោះបីជាយ៉ាងណា អនុប្រធានមជ្ឈមណ្ឌលដដែលអះអាងថា ក្រៅពីស្នាព្រះហស្តរបស់សម្ដេចតា ក៏មានភាពយន្តជាច្រើនទៀតរបស់សមិទ្ធិករជើងចាស់នានាដូចជា អ្នកស្រី ឌី សាវ៉េត លី ប៊ុនយីម និងលោក អ៊ី វ៉ុងហែម ជាដើម ដែលសុទ្ធសឹងតែធ្លាប់មានភាពល្បីល្បាញក្នុងអតីតកាល៕