បរទេសយកស្បែកនិងច្រមុះ រដ្ឋា យកទាំងជីវិតបញ្ជាក់ពីសមត្ថភាពការងារ

2015-12-01 13:30:52
ចំនួនមតិ 0 | ចំនួនចែករំលែក 0

ចន្លោះមិនឃើញ

"បរទេសខ្លះយកស្បែកនិងច្រមុះទៅធ្វើការតែប៉ុណ្ណោះ ឯខ្ញុំយកទាំងជីវិតបន្ថែមពីសមត្ថភាពក្នុងការបំពេញការងារ"។

ជាវិស្វករខ្មែរមួយរូបដែលមានឱកាសធ្វើការនៅក្រុមហ៊ុនបច្ចេកវិទ្យាដ៏ធំមួយរបស់អាមេរិកនៅប្រទេសភូមា ជិន លីរដ្ឋា បានជម្នះការមាក់ងាយពីមិត្តរួមការងារ ដើម្បីបញ្ជាក់ពីសមត្ថភាពការងារដែលអាចធ្វើការបានមិនថាការងារតូចឬធំ។

ជាវិស្វករនិងជាអ្នកត្រួតពិនិត្យការងារ (Progress Control Specialist) នៅក្រុមហ៊ុន Pan Asia Tower ជាក្រុមហ៊ុនបច្ចេកវិទ្យាជំនាញផ្នែកដំឡើងអង់តែនទូរសព្ទ រដ្ឋា ប្រាប់ថា បានទៅធ្វើការទីនោះដោយសារមានការណែនាំពីមិត្តភ័ក្ដិ និងដោយសារក្រុមហ៊ុនមើលឃើញសមត្ថភាពនិងលក្ខណៈសម្បត្តិ ដែលគេអាចធ្វើការងារនៅក្រុមហ៊ុននេះបាន។

ក្រុមហ៊ុនដែល រដ្ឋា ធ្វើការជាមួយជាក្រុមហ៊ុនលំដាប់អន្តរជាតិ មានសុទ្ធតែបុគ្គលិកចំណានៗចម្រុះជាតិសាសន៍។ ជាអ្នកជំនាញការខ្មែរមួយរូបដែលបានទៅក្រុមហ៊ុនដ៏ធំនេះ រដ្ឋា ប្រាប់ថា ដំបូងមានការមាក់ងាយពីបុគ្គលិកបរទេសមួយចំនួន ដោយពួកគេមិនសូវឲ្យតម្លៃអ្នកជំនាញការខ្មែរទេ ដោយគិតថាមិនមានសមត្ថភាព អាចប្រកួតប្រជែងការងារជាមួយពួកគេបាន។ តែដោយសារមានការជឿជាក់លើសមត្ថភាពខ្លួនឯង រួមទាំងការប្រឹងប្រែងទើបធ្វើឲ្យអ្នកជំនាញការបរទេសទាំងនោះទទួលស្គាល់ថាជនជាតិខ្មែរក៏មានធនធានមនុស្សពូកែៗ មានសមត្ថភាពអាចធ្វើការនិងសម្រេចលទ្ធផលការងារបានជោគជ័យ។

"បរទេសមិនចង់បានបុគ្គលិកខ្មែរទេ ដោយសារតែពួកគេមើលស្រាលសមត្ថភាពអ្នកជំនាញការខ្មែរថាធ្វើការមិនកើត ប៉ុន្តែពួកគេមួយចំនួនសមត្ថភាពក៏មិនពូកែអីដែរយកតែរូបរាងខាងក្រៅទៅធ្វើការប៉ុណ្ណោះ ចុងក្រោយពួកគេទទួលស្គាល់ថា អ្នកជំនាញខ្មែរក៏មានសមត្ថភាពនិងធ្វើការប្រកបដោយវិជ្ជាជីវៈខ្ពស់"។

យុវជនរូបនេះបន្តទៀតថា ការធ្វើការនៅក្នុងក្រុមហ៊ុនដ៏ធំបែបនេះមានការប្រកួតប្រជែងគ្នាខ្លាំង ការធ្វើការទាមទារភាពច្បាស់លាស់និងទំនួលខុសត្រូវខ្ពស់។

ការងាររបស់រដ្ឋាចាំបាច់ត្រូវមានភាពច្បាស់លាស់លើភាសា ដោយសារបុគ្គលិកចម្រុះជាតិសាសន៍ដែលភាសាអង់គ្លេសត្រូវបានប្រើប្រាស់ជាទូទៅ ដើម្បីងាយស្រួលទំនាក់ទំនងគ្នា។

ជិន លីរដ្ឋា បានបញ្ចប់ការសិក្សាជំនាញវិស្វករសំណង់ស៊ីវិលនៅវិទ្យាស្ថាន NTTI នៅឆ្នាំ២០០៦។ មានស្រុកកំណើតនៅភ្នំពេញ រដ្ឋាធ្លាប់មានបទពិសោធន៍ការងារជាច្រើនដូចជាធ្លាប់ធ្វើជាអ្នករចនាប្លង់ក្នុងគម្រោងសាងសង់ផ្លូវមួយរបស់គម្រោង ADB នៅប្រទេសកម្ពុជា និងជាអ្នកគ្រប់គ្រងទូទៅការដ្ឋានសាងសង់បុរីមួយ មុនពេលមានឱកាសស្វែងរកបទពិសោធន៍ការងារថ្មីជាវិស្វករនៅក្រុមហ៊ុន Pan Asia Tower នៅប្រទេសភូមា។