កំពុងមានចម្រូងចម្រាស ម៉ៅ ហាជី បញ្ចេញតម្លៃខ្លួន
- 2015-12-03 17:31:52
- ចំនួនមតិ 0 | ចំនួនចែករំលែក 0
កំពុងមានចម្រូងចម្រាស ម៉ៅ ហាជី បញ្ចេញតម្លៃខ្លួន
ចន្លោះមិនឃើញ
មុនមានរឿងប្ដឹងផ្ដល់គ្នា ជុំវិញការចូលរួមជាមួយផលិតកម្មថោន ទាំងមិនទាន់ផុតកុងត្រាជាមួយកម្មវិធី Cambodian Idol ហើយត្រូវហង្សមាសប្រកាសប្ដឹង លោក ម៉ៅ ហាជី បេក្ខភាពវគ្គផ្ដាច់ព្រ័ត្រកម្មវិធី Cambodian Idol ធ្លាប់បានប្រាប់ Sabay ថា ការច្រៀងរបស់លោកក្នុងមួយកម្មវិធី បច្ចុប្បន្នស៊ីថ្លៃចាប់ពី៥០០ដុល្លារឡើង។
ការថ្លែងបែបនេះគ្រាដែលលោកទៅច្រៀងក្នុងពិធីបើកសម្ពោធភោជនីយដ្ឋានមួយមានឈ្មោះថា “Les Cocktails, Bar & Tapas ” ស្ថិតក្នុងសង្កាត់ បឹងកេកង១ ខណ្ឌដូនពេញ រាជធានី ភ្នំពេញ កាលពីពេលកន្លងទៅ ជាមួយ លោក នី រតនា និង កញ្ញា ឱក សុគន្ធកញ្ញា ។
លោក ម៉ៅ ហាជី បានឲ្យដឹងថា ចាប់តាំងពីលោកមានមុខក្នុងវគ្គផ្ដាច់ព្រ័ត្រកម្មវិធី Cambodian Idolមក ទីផ្សារសិល្បៈរបស់លោកមានសន្ទុះខ្លាំងគួរសម ដោយមានក្រុមហ៊ុនទទួលរៀបចំកម្មវិធី ឬហៅម្យ៉ាងទៀតថា Agency ទាក់ទងលោកទៅច្រៀងជាបន្តបន្ទាប់មិនដាច់ឡើយ។ ចំពោះតម្លៃវិញ គឺស្ថិតតាមការចរចារគ្នាជាមួយគ្នានោះលោកបានទម្លាយឲ្យដឹងថា ទទួលចាប់ពី៥០០ ដុល្លារឡើង ដែលតម្លៃនេះ គឺខុសគ្នាឆ្ងាយខ្លាំងមុនលោកមានមុខក្នុងកម្មវិធីCambodian Idol ។
ក្នុងបទសម្ភាសកាលនោះលោក ម៉ៅ ហាជី ថ្លែងថា ប្រសិនក្រុមហ៊ុន ឬagency ចង់បានលោកទៅច្រៀង អាចទាក់ទងមកលោកផ្ទាល់ ព្រោះតារារូបនេះមិនទាន់ជាប់កុងត្រាផលិតកម្មមួយណាឡើយ ហើយចំពោះការចុះកុងត្រាជាមួយផលិតកម្មលោក មិនទាន់គិតគូរឡើយ ដោយហេតុរវល់ពេក។
មិនបានប៉ុន្មានផង ស្រាប់តែលោក ម៉ៅ ហាជី ត្រូវបានសារព័ត៌មានបរិយាយថា ក្លាយជាតារាចម្រៀងរបស់ផលិតកម្ម ថោន ស្របពេលដែល លោកមិនទាន់ផុតកុងត្រាជាមួយកម្មវិធី Cambodian Idol នៅឡើយ។ យ៉ាងណាក៏ដោយ ម្សិលមិញនេះ សាមីខ្លួនអ្នកស្រុកបាត់ដំបងរូបនេះ បានប្រាប់សារព័ត៌មានក្នុងស្រុកមួយចំនួនវិញថា លោកមិនទាន់បានចុះកុងត្រាជាមួយផលិតកម្មណាមួយឡើយ ហើយលោកក៏មិនបានធ្វើអ្វីខុសជាមួយហង្សមាសដែរ។
ហាជី ចេញមកអះអាងដូច្នេះបន្ទាប់ពីហង្សមាសដែលមានលោក មាស រិទ្ធី ជាអគ្គនាយករង បានចេញមកប្រកាសថា ផលិតកម្មរបស់លោកបានសម្រេចដាក់ពាក្យបណ្ដឹងប្ដឹងអតីតបេក្ខភាពកម្មវីធី Cambodian Idol រូបនេះហើយ ក្រោយតារារូបនេះ បានគេចវេសពីវេលាទុកពេលឲ្យចូលខ្លួនមកដោះស្រាយ។ ទោះយ៉ាងនេះក្ដី ហាជី ប្រាប់ថា លោកគ្មានភាពចាំបាច់ត្រូវចូលខ្លួនឡើយ ព្រោះលោកមិនបានធ្វើអ្វីខុស។
ងាកមកផលិតកម្មថោន ដែលបានប្រកាសលើទំព័រហ្វេសប៊ុកផ្លូវការរបស់ខ្លួនកន្លងមកថា ហាជី បានចុះកុងត្រាជាមួយខ្លួនរយៈពេល ៥ឆ្នាំហើយនោះ ក៏បានដកថយមួយជំហានដែរ។ លោក មាស សុខរតនៈ អ្នកចាត់ការទូទៅរបស់ផលិតកម្មនេះ ប្រាប់ថា លោកមិនទាន់ដឹងថា ផលិតកម្មលោកនឹងលុបកុងត្រា ឬដោះស្រាយយ៉ាងណាដើម្បីឲ្យបានហាជី ក្លាយជាតារាចម្រៀងពេញសិទ្ធិនៅឡើយទេ។
លោកថា “ឥឡូវហ្នឹងខ្ញុំអត់ដឹងរឿងហ្នឹង តើមេគិតយ៉ាងម៉េចទេ ប៉ុន្តែធម្មតាបើបុគ្គលមួយបើមានបញ្ហានៅកន្លែងចាស់ គឺទាល់តែដោះស្រាយ ទើបកន្លែងថ្មីគេអាចទទួលយកបាន!”៕
អត្ថបទ៖ ខុត សីហា