សុនខគួរឲ្យអាណិត គេពិសោធហើយទុកចោលមិនមើលថែ

2015-12-08 20:12:45
ចំនួនមតិ 0 | ចំនួនចែករំលែក 0

ចន្លោះមិនឃើញ

សត្វសុនខជាច្រើនក្បាលត្រូវបានគេទុកចោល មិនមើលថែក្រោយពេលសាកលវិទ្យាល័យវេជ្ជសាស្ត្រមួយបានយកសត្វទាំងនោះមកប្រើប្រាស់សម្រាប់ពិសោធន៍វេជ្ជសាស្ត្ររួចមក។

ប្រភពព័ត៌មាន Shanghaiist បានឲ្យដឹងថា ក្រុមអ្នកជួយសង្គ្រោះសត្វបានថតបង្ហោះរូបសុនខដែលត្រូវគេទុកចោលលើដំបូលអគារនៃសាកលវិទ្យាល័យវេជ្ជសាស្ត្រ Weiyang ក្នុងទីក្រុង Xi'an ខេត្ត Shaanxi ប្រទេសចិន។ ស្ថានភាពសត្វសុនខទាំងនោះ ត្រូវបានគេដឹងថា ខ្លះមានរបួស និងហូរឈាម ខ្លះទៀតងាប់។ សុនខខ្លះត្រូវបានគេរុំមាត់ និងរុំជើងផងដែរ ចំណែកពោះរបស់វាត្រូវគេកាត់ ហើយទ្រូងរបស់វាមានស្នាមឆេះខ្លោច។

ក្រោយពេលទិដ្ឋភាពខាងលើត្រូវបានបង្ហោះតាមប្រព័ន្ធអ៊ីនធឺណិត មនុស្សជាច្រើនបានសម្ដែងក្ដីអាណិតទៅដល់សុនខទាំងនោះ។ អ្នកលេងបណ្ដាញសង្គមចិន Weibo ឈ្មោះ Naomiko បានសរសេរបង្ហាញពីអារម្មណ៍ខ្លួនថា "តើសិស្ស និងគ្រូៗសាលាពេទ្យអាចធ្វើបែបនេះទៅរួចដែរ ហេតុអ្វីបានជាមើលងាយជីវិតសត្វបែបនេះ?"។

បន្ទាប់ពីទិដ្ឋភាពសត្វសុនខត្រូវគេទុកចោលមិនមើលថែក្រោយពិសោធន៍រួចបានកើតឡើង និងលេចឮដល់សាធារណជន តំណាងសាកលវិទ្យាល័យវេជ្ជសាស្ត្រ Weiyang បានចេញមុខសូមទោស មជ្ឈដ្ឋានជាច្រើនដែលបានឃើញ និងទទួលស្គាល់ចំពោះបញ្ហានោះកាលពីថ្ងៃចន្ទម្សិលមិញនេះ។

និស្សិតមិនបញ្ចេញឈ្មោះម្នាក់បានឲ្យដឹងថា ចំពោះសត្វសុនខទាំងនោះត្រូវបានគេយកទៅវះកាត់បើកខ្នែងពោះវៀនសម្រាប់ការពិសោធន៍និស្សិតដេរថ្នេរមុខរបួស។

ជាធម្មតាក្នុងប្រទេសចិន សត្វសុនខក្រោយពេលគេប្រើប្រាស់សម្រាប់ការពិសោធវេជ្ជសាស្ត្ររួចគឺត្រូវគេប្រើថ្នាំឲ្យវាងាប់តាមសម្រួល។ ចំពោះសាលាវេជ្ជសាស្ត្រ Weiyang ក្រោយពីមានលេចឮទង្វើមិនសមរម្យចំពោះសត្វសុនខបែប ក៏បានប្រកាសផ្អាកការពិសោធវេជ្ជសាស្ត្រជាបណ្ដោះអាសន្ន៕