Audi Q7 ស៊េរី ០១៦ តម្លៃ ១៤ ម៉ឺនដុល្លារប្រើសាំងលក់ប្រជែងហាងនាំចូល

2015-12-14 23:07:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Audi បានប្រកាសរថយន្តទំនើប Audi Q7 ស៊េរី ០១៦ប្រភេទ SUV សម្រាប់ដាក់លក់លើទីផ្សារកម្ពុជា ដោយក្នុងមួយគ្រឿងមានតម្លៃ ១៤ម៉ឺនដុល្លារ។

Audi Q7 ស៊េរី ០១៦ ដែលទើបតែប្រកាសនេះបំពាក់ដោយម៉ាស៊ីន V6 ទំហំ 3.0 លីត្រ ចង្កឹះលេខ ៨វគ្គ កម្លាំងម៉ាស៊ីន ៣៣៣សេះ និងអាចរត់បានក្នុងល្បឿន ២៥០គីឡូម៉ែត្រក្នុងមួយម៉ោង។ Audi Q7ស៊ីប្រេងប្រមាណ ៧,៩លីត្រ/១០០គ.ម សម្រាប់ផ្លូវក្នុងក្រុង និង ១០,៩លីត្រសម្រាប់ផ្លូវឆ្ងាយ។

ផ្នែកកាងមុខរបស់ Audi Q7 ត្រូវបានរចនាទៅជារាងជ្រុង រីឯភ្លើងក្រោយជាប្រភេទ LED។ នៅលើតាប្លូខាងមុខរបស់ Audi Q7 នេះមានផ្ទាំង Touchscreen តូចមួយសម្រាប់បង្ហាញរូបភាពនិងវីដេអូ ដែលទទួលបានពីកាមេរ៉ាសុវត្ថិភាពនៃរថយន្ត។

កាមេរ៉ាសុវត្ថិភាពនៅខាងក្រោយរបស់ Audi Q7 អាចបង្ហាញរូបភាពបានទំហំ ៣៦០ដឺក្រេ ដែលផ្តល់សុវត្ថិភាពខ្ពស់ដល់អ្នកបើកបរ ជាពិសេស ពេលត្រូវការចូលចតកន្លែងចង្អៀត។

ផ្នែកខាងក្នុងនៃរថយន្តដ៏ឡូយឆាយនេះអាចផ្ទុកអ្នកដំណើរបានរហូតដល់ទៅ ៧នាក់ ហើយសម្រាប់កៅអីជួរទី២ និងទី៣ នៃរថយន្ត អាចបត់ចុះក្រោមបាន ដើម្បីមានចន្លោះទំនេរធំសម្រាប់ផ្ទុកឥវ៉ាន់បានច្រើន។

ខាង Audi បានឱ្យដឹងថា ក្រុមហ៊ុននឹងមិនបារម្ភចំពោះការប្រកួតប្រជែងពីសំណាក់ហាងមួយចំនួននៅភ្នំពេញដែលបានដាក់លក់ Audi Q7 ស៊េរីថ្មីមុនក្រុមហ៊ុននាំចូលឡើយ ដោយសារ Audi Q7 ដែលក្រុមហ៊ុននាំចូលផ្ទាល់គឺជាប្រភេទរថយន្តប្រើសាំង ហើយមានគុណភាពនិងមានការធានាត្រឹមត្រូវតាមស្តង់ដារ មិនដូចរថយន្តប្រើម៉ាស៊ូតដាក់លក់តាមបណ្តាហាងនានានៅភ្នំពេញទេ៕