ចាប់ពីខែធ្នូដល់ខែមេសានៅអន្លង់ផ្សោតទឹកសាបឈើទាលខេត្តស្ទឹងត្រែងមានភ្ញៀវទេសចរទៅលេងកម្សាន្តច្រើន

2016-01-03 17:12:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីបានទៅដល់សហគមន៍អេកូទេសចរណ៍អន្លង់ផ្សោតឈើទាលនោះ គឺចាំបាច់ភ្ញៀវទេសចរទាំងអស់ត្រូវធ្វើដំណើរចេញពីទីរួមខេត្តស្ទឹងត្រែង តាមផ្លូវជាតិលេខ៧លុះមកដល់អន្លង់មរកត ហើយត្រូវបន្តដំណើរដោយការជិះទូកប្រហែលជា២០នាទីទៀតនោះនឹងបានទៅដល់អន្លង់ផ្សោតឈើទាលជាមិនខាន ឬក៏លោកអ្នកអាចធ្វើដំណើរទៅតាមផ្លូវមុំបីក៏បាន ប៉ុន្តែភាគច្រើនភ្ញៀវទេសចរចូលចិត្តទៅតាមផ្លូវទឹកជាង ព្រោះងាយស្រួលក្នុងការធ្វើដំណើរ។

សូមជម្រាបថា ស្ទឹងត្រែងជាខេត្តមួយដែលមានសម្រស់ធម្មជាតិដ៏ស្រស់បំព្រងមានទីតាំងនៅលើខ្ពង់រាបតាមបណ្តោយទន្លេមេគង្គ ដែលប្រសប់នឹងទន្លេសេកុង ហើយខេត្តនេះក៏សម្បូរទៅដោយតំបន់ទេសចរណ៍ជាច្រើនដែលធ្វើឲ្យអ្នកទេសចរចាប់អារម្មណ៍ផងដែរ ជាពិសេសសោភ័ណភាពតាមដងទន្លេមេគង្គ និងតំបន់អេកូទេសចរណ៍នៃដែនជម្រកទឹកសាបដ៏កម្រនោះ។ ជាក់ស្តែងនៅសហគមន៍អេកូទេសចរណ៍អន្លង់ផ្សោតឈើទាលក្នុងរដូវប្រាំងចាប់ពីខែធ្នូដល់ខែមេសានោះមានភាពទាក់ទាញជាងរដូវវស្សាដោយមានអ្នកទេសចរទៅទស្សនា និងលេងកម្សាន្តយ៉ាងច្រើនកុះករដែលបានធ្វើឲ្យតំបន់នេះមានភាពល្បីល្បាញខ្លាំង។

សហគមន៍អេកូទេសចរណ៍អន្លង់ផ្សោតឈើទាលមានទីតាំងស្ថិតនៅជាប់ព្រំប្រទល់ដែនដីខ្មែរ-ឡាវ ក្នុងទឹកដីឃុំព្រះរំកិល ស្រុក ថាឡាបរិវ៉ាត់ ខេត្តស្ទឹងត្រែងប ហើយច្ចុប្បន្នសហគមន៍ទេសចរណ៍មួយនេះកំពុងមានការចាប់អារម្មណ៍យ៉ាងខ្លាំងពីសំណាក់ភ្ញៀវទេសចរជាតិនិងអន្តរជាតិ។ ភ្ញៀវទេសចរអាចទស្សនាបានជាមួយនឹងសត្វផ្សោតទឹកសាបដែលបានបង្ហាញខ្លួនឡើងលើផ្ទៃទឹកទន្លេមេគង្គដ៏ស្រស់បំព្រង ក៏ដូចជាជិះទូកគយគន់ព្រៃលិចទឹកផងដែរ។ ភ្ញៀវទេសចរភាគច្រើនដែលចូលមកលេងកម្សាន្តនៅរមណីយដ្ឋានអន្លង់ផ្សោតឈើទាលនេះ គឺគេចូលទៅទឹកដីនៃខេត្តចំប៉ាសក្តិប្រទេសឡាវជាមុនទើបធ្វើដំណើរតាមទូកមកកាន់តំបន់នេះជាក្រោយ។ នេះក៏ព្រោះតែការធ្វើដំណើរនៅខាងទឹកដីខ្មែរយើងទៅកាន់ទីនោះនាពេលសព្វថ្ងៃមានសភាពលំបាកបន្តិច ហើយបើតាមគម្រោងនៅក្នុងពេលឆាប់ៗខាងមុខនេះយើងនឹងធ្វើការអភិវឌ្ឍផ្លូវគោកដើម្បីងាយស្រួលក្នុងការធ្វើដំណើរមកកាន់អន្លង់ផ្សោតនេះផ្ទាល់នៅក្នុងទឹកដីប្រទេសកម្ពុជាយើងតែម្តង។

លោក យាន យុទ្ធី ជាប្រធានសាខាអភិរក្សសត្វផ្សោតខេត្តស្ទឹងត្រែងបាននិយាយប្រាប់ឲ្យដឹងថា អន្លង់ផ្សោតឈើទាលមានជម្រៅប្រមាណជា៣០ម៉ែត្រដែលបច្ចុប្បន្នមានឃើញសត្វផ្សោតទឹកសាបប្រហែលជិត១០ក្បាលប៉ុណ្ណោះ ក្នុងនោះមានសត្វផ្សោតធំប្រមាណជា៦ក្បាលដែលមានទម្ងន់ពី៨០ទៅ១០០គីឡូក្រាមនិងប្រវែងជា២ម៉ែត្រ។ សហគមន៍អេកូទេសចរណ៍អន្លង់ផ្សោតឈើទាលនេះគឺត្រូវបានរៀបចំបង្កើតឡើងក្លាយជាតំបន់ទេសចរណ៍កាលពីអំឡុងឆ្នាំ២០០៧ក្រោមការជួយជ្រោមជ្រែងពីអង្គការម្លប់បៃតងផងដែរ។ ប្រធានសាខា អភិរក្សសត្វផ្សោតខេត្តស្ទឹងត្រែងរូបនេះនិយាយបន្ថែមឲ្យដឹងទៀតថា សព្វថ្ងៃចំនួន សត្វផ្សោតនៅខេត្តស្ទឹងត្រែងមានការកើនឡើងជាលំដាប់ នេះក៏ដោយសារតែ មានការអភិរក្សយ៉ាងយកចិត្តទុកដាក់បំផុត៕

អត្ថបទ៖ វិសិទ្ធ

ប្រភព៖ Khmerdaily