Lumia 950XL ដែល​ជា​កំពូល​ស្មាត​ហ្វូន​ស៊េរី​ក្រោយ​និង​ទំនើប​របស់​ក្រុមហ៊ុន Microsoft ពេល​នេះ​បាន​ដាក់​លក់​លើ​ទីផ្សារ​កម្ពុជា​ហើយ ដោយ​ក្នុង​មួយ​គ្រឿង​តម្លៃ ៦៥០ដុល្លារ។

បើ​តាម លោក សុខ លី ម្ចាស់​ហាង​លក់​ទូរសព្ទ សុខ លី ដែល Sabay បាន​សាក​សួរ ​ឱ្យ​ដឹង​ថា ទូរសព្ទ​ត្រកូល Lumia ស៊េរី​ថ្មី​នេះ​ទើប​មក​ដល់​ប៉ុន្មាន​ថ្ងៃ​ប៉ុណ្ណោះ ហើយ​ក៏​មាន​អតិថិជន​ប៉ុន្មាន​នាក់​ដែរ បាន​មក​ទិញ​យក​ទៅ​ប្រើ។

ម្ចាស់​ហាង​រូប​នេះ​បន្ថែម​ថា តាម​ពិត​ទៅ Lumia ស៊េរី​ថ្មី​ដែល​បំពាក់​កាមេរ៉ា​ដល់​ទៅ 20MP នេះ​មាន​ដល់​ពីរ​​ម៉ូដែល​ឯណោះ គឺ​ Lumia 950/950 XL តែ​បច្ចុប្បន្ន​ហាង​លោក​លក់​តែ​ម៉ូដែល 950XL ប៉ុណ្ណោះ​ រី​ឯ​​ Lumia 950 ក្រុមហ៊ុន​ផ្លូវ​ការ​ក្នុង​ស្រុក​មិន​ទាន់​នាំ​ចូល​ទេ។

950XL មាន​អេក្រង់ ៥,៧អ៊ីញ ប្រើ Windows 10 Mobile OS និង​បំពាក់​ដោយ​កាមេរ៉ា​ធំ​ទំហំ 20MP ដែល​អាច​ថត​​វីដេអូ​បាន​កម្រិត 4K។ ទូរសព្ទ​នេះ​មាន​អង្គ​ផ្ទុក​ទិន្នន័យ​ទំហំ 32GB (អាច​បន្ថែម microSD Card បាន​ទំហំ 200GB) និង RAM ​3GB ចំណែក​ឯ​ថ្ម​របស់​វា​មាន​ថាមពល 3340mAh និង​​អាច​ដោះ​​បាន។

បច្ចេកវិទ្យា​ថ្មី​ដែល​បំពាក់​លើ Lumia ថ្មី​នេះ​ គឺ​មុខងារ​បើក​សោ​ដោយ​ការ​ស្កេន​ប្រស្រី​ភ្នែក (Iris Scanner) ដែល​​​ផ្តល់​សុវត្ថិភាព​ខ្ពស់​ក្នុង​ការ​រក្សា​ព័ត៌មាន​ផ្ទាល់​ខ្លួន​លើ​ទូរសព្ទ​របស់​អ្នក​ប្រើ​ប្រាស់។ លើស​ពី​នេះ Lumia ស៊េរី​មួយ​នេះ​ក៏​អាច​​ប្រើ​​ជា​ PC បាន​ដោយ​គ្រាន់​តែ​ភ្ជាប់​ទៅ​នឹង Microsoft Display Dock និង​ PC ប្រើ Windows 10 នោះ​ជា​ការ​ស្រេច​។​

https://www.youtube.com/watch?v=QpkBebbNbq8

អត្ថបទ៖ ប៉ែត ផាន់និត