តំបន់ទេសចរណ៍១០កន្លែង ទាក់ទាញបំផុតនៅវៀតណាម

2016-01-11 23:28:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ទេសចរបរទេសភាគច្រើនទៅទស្សនាប្រទេសវៀតណាម ព្រោះពួកគេមើលឃើញសម្រស់ធម្មជាតិដ៏សំបូរបែប និងតំបន់ប្រវត្តិសាស្ត្រនានា។ រាប់គិតចាប់តាំងពីវាលស្រែខៀវខ្ចីនៅភាគខាងជើងប្រទេស រហូតដល់ដីសណ្ដទន្លេមេគង្គនៅភាគខាងត្បូង។ វៀតណាមក៏ជាប្រទេសមានប្រវត្តិសាស្ត្រយូរលង់ ប្រពៃណីទំនៀមទម្លាប់តាំងពីបុរាណ និងទីសក្ការបូជាចំណាស់ៗច្រើនដែរ។ កន្លែងខាងក្រោមទាំង១០នេះ ជាតំបន់ដ៏ទាក់ទាញដែលមានភ្ញៀវទេសចរជាតិ និងអន្តរជាតិចូលចិត្តទៅលំហែឥតដាច់ពីមួយខែទៅមួយខែ៖

១០. ឆ្នេរសមុទ្រ Nha Trang នៅខេត្ត Nha Trang

ជារមណីយដ្ឋានឆ្នេរសមុទ្រដ៏ពេញនិយមមួយ ដែលមានឆ្នេរស្អាត ទឹកថ្លា និងបរិស្ថានស្អាត។ ប្រជាជននៅទីក្រុងមាត់សមុទ្រនេះមានចំនួនជាង ៣០ម៉ឺននាក់ និងមានភាពទាក់ទាញដូចកោះត្រល់ និងឆ្នេរខ្សាច់ Mui Ne ដែរ។

៩. រូង Cu Chi

រូងនេះមានផ្លូវជាបណ្ដាញដ៏ច្រើនក្រោមដី ដែលមានទីតាំងប្រមាណ ៤០គីឡូម៉ែត្រ ពីភាគពាយ័ព្យ ទីក្រុងហូជីមិញ។ រូង Cu Chi ត្រូវបានប្រើប្រាស់ដោយទ័ពព្រៃវៀតកុង ជាកន្លែងលាក់ខ្លួនពីកងទ័ពអាមេរិកក្នុងអំឡុងសម័យសង្គ្រាមវៀតណាម។

៨. ដីសណ្ដទន្លេមេគង្គ

តំបន់ដីសណ្ដនេះស្ថិតនៅភាគខាងត្បូងប្រទេសវៀតណាម ដែលដីសម្បូរជីវជាតិ និងមានទេសភាពព្រៃតូចៗដុះអមគួរឲ្យចាប់អារម្មណ៍។ ទឹកទន្លេនៅតំបន់នេះបានស្រោចស្រពផ្ទៃដីកសិកម្មជាច្រើនហិចតា និងមានផលិតស្រូវស្មើពាក់កណ្ដាលនៃទិន្នផលសរុបរបស់ប្រទេស។

៧. ឆ្នេរខ្សាច់ Mui Ne

ឆ្នេរខ្សាច់ដែរមានប្រជាជនរស់នៅតិចកាលពី១៥ឆ្នាំមុន ពេលនេះមានការអភិវឌ្ឍគួរឲ្យកត់សម្គាល់។ ដោយសារតែមានជំនោរសមុទ្របោកបក់ ខ្លាំងៗ វាបានក្លាយជាតំបន់ទេសចរណ៍ដ៏ពេញនិយមនៅវៀតណាម សម្រាប់ជិះទូកក្ដោង និងបង្ហោះខ្លែង។

៦. វាលស្រែតាមចង្កេះភ្នំ នៅSa Pa

Sa Pa ជាទីក្រុងមួយស្ថិតនៅភាគពាយ័ព្យវៀតណាម និងនៅមិនឆ្ងាយប៉ុន្មានពីព្រំដែនប្រទេសចិនឡើយ។ ការធ្វើស្រូវរបៀបនេះ មានច្រើននៅជ្រលង Muong Hoa ចន្លោះក្រុង Sa Pa និងភ្នំ Fansipan ។ អ្នកទេសចរចូលចិត្តទៅថតរូបខៀវស្រងាត់ និងមានរាងជាថ្នាក់ៗដ៏ប្លែកភ្នែក។

៥. កោះ Phu Quoc (កោះត្រល់)

កោះត្រល់មានទីតាំងស្ថិតនៅពីមុខឆ្នេរសមុទ្រកម្ពុជា ចម្ងាយប្រមាណ ១៥គីឡូម៉ែត្រ និងពីវៀតណាមប្រមាណ ៤៥គីឡូម៉ែត្រ (វៀតណាមគ្រប់គ្រងបច្ចុប្បន្ន)។ លើកោះ មានព្រៃត្រូពិកដ៏ស្រស់ស្អាត ថ្មប៉ះប្រះទឹកនៅល្អឥតខ្ចោះ និងឆ្នេរសមុទ្រដ៏សស្អាត។ ភាពល្បីល្បាញរបស់កោះមួយទៀត គឺខាងផលិតទឹកត្រី និងសិប្បកម្មនានា។

៤. ភូមិនេសាទ Hoi An

ភូមិនេសាទនេះបានក្លាយជាតំបន់ទេសចរណ៍ដ៏ទាក់ទាញ ដែលមានទីតាំងស្ថិតនៅតាមឆ្នេរ សមុទ្រចិនខាងត្បូង។ Hoi An បានក្លាយជាផែអន្តរជាតិចាប់តាំងពីសតវត្សទី ១៦ និងមានជំនួញដឹកជញ្ជូនតាមផ្លូវទឹកជាច្រើនធ្វើដំណើរទៅកាន់ទីក្រុង Da Nang ផ្ទាល់។ ផ្ទះ និងហាងនៅទីនេះមានម៉ូតដូចផ្ទះចិន។

៣.បឹង Hoan Kiem Lake 

បឹងនេះមានទីតាំងនៅចំកណ្ដាលមជ្ឈមណ្ឌលប្រវត្តិសាស្ត្រទីក្រុងហាយណូយ ដែលភ្ញៀវទេសចរទៅគយគន់សម្រស់ទីក្រុងពីមាត់ទឹក។

២. វត្ត Thien Mu 

វត្តនេះមានកម្ពស់៧ជាន់ ស្ថិតនៅទីក្រុង Hue ខេត្ត Thừa Thiên–Huế និងជាវត្តខ្ពស់បំផុតនៅវៀតណាម។ វត្តខាងលើ បានសាងសង់នៅឆ្នាំ ១៦០១ ក្នុងអំឡុងពេលការគ្រប់គ្រងដោយអធិរាជ Nguyen ។

១. ឆកសមុទ្រ Ha Long

ឆកសមុទ្រនេះមានទីតាំងស្ថិតនៅភាគខាងជើងប្រទេសវៀតណាម មានវែងជាង ១២០គីឡូម៉ែត្រ។ តំបន់ទេសចរណ៍ដែលទាក់ទាញភ្ញៀវបានច្រើនកំពូលគេនេះ មានទៅដោយកោះតូចៗ រាប់ពាន់ និងព្រៃសំបូរបន្លែផ្លែឈើ។ កោះជាច្រើនមានរូងខាងក្រោមធំៗ ដែលជាជម្រកអ្នកភូមិបណ្ដែតទឹករបស់ក្រុមអ្នកនេសាទយ៉ាងសុខស្រួលទៀតផង៕

ចុចអាន៖ ១០កន្លែង រួមចំណែកធ្វើឲ្យថៃក្លាយជាទិសដៅទេសចរណ៍ពេញនិយមនៅអាស៊ី

ប្រែសម្រួល៖ ឡេង ភារុណ ប្រភព៖ Touropia