PNC សាលាជំនាញ IT ដែលសិស្សក្រីក្រណាក៏មានការងារល្អធ្វើពេលរៀនចប់

2014-10-22 23:16:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ឈរលើបេសកកម្មបណ្ដុះជំនាញ បច្ចេកវិទ្យាព័ត៌មានទៅដល់សិស្សដាច់ស្រយាលក្រីក្រខ្មែរ អង្គការមួយបានចាប់កំណើតឡើងក្នុងទីក្រុងភ្នំពេញនៅឆ្នាំ២០០៥ នោះគឺ មជ្ឈមណ្ឌលបណ្ដុះបណ្ដាលប្រព័ន្ធព័ត៌មាន CIST និងបានប្រែឈ្មោះទៅជាមជ្ឈមណ្ឌល Passerelles Numeriques Cambobida (PNC) នៅឆ្នាំ២០១០។

ប្រតិបត្តិការរបស់ PNC ដែលទទួលជំនួយស្ទើរទាំងស្រុងពីបរទេស គឺការផ្ដល់អាហារូបករណ៍មួយចប់រយៈពេល២ឆ្នាំ ដល់សិស្សបញ្ចប់បាក់ឌុប ដែលគ្មានលទ្ធភាពបន្តថ្នាក់មហាវិទ្យាល័យចំនួន១០០នាក់ រាល់ឆ្នាំ ឲ្យសិក្សាឯកទេសព័ត៌មានវិទ្យា ដោយមិនបង់ប្រាក់ និងមិនបាច់ព្រួយរឿងស្នាក់នៅ។

ក្រុមហ៊ុនក្រុមក្នុងស្រុកមួយចំនួនក៏បានងាកទៅចូលរួមក្នុងបេសកកម្មផ្ដល់ឱកាសនិងលទ្ធភាពដល់កូនកសិករក្រលំបាកមួយនេះ។ ក្នុងនោះ Sabay Digital ក៏ជាផ្នែកមួយដែលបានគាំទ្រជាហិរញ្ញវត្ថុ ដល់កម្មវិធីរបស់ PNC ជំនាន់ទី៨ ដែលទើបទទួលសញ្ញាប័ត្របញ្ចប់ការសិក្សានៅព្រឹកថ្ងៃទី២២តុលានេះ។

កញ្ញា ជា ចរិយា ប្រធានផ្នែកយីហោប្រចាំក្រុមហ៊ុន Sabay បញ្ជាក់ពីអ្វីដែល Sabay បានច្រៀកប្រាក់ចំណេញរបស់ខ្លួនមួយផ្នែក រួមចំណែកផ្គត់ផ្គង់ដល់ការបណ្ដុះបណ្ដាលធនធានមនុស្សផ្នែក IT របស់កម្ពុជាជាមួយ PNC នេះថា៖ «សំខាន់គឺយើងជាក្រុមហ៊ុនដែលធ្វើការលើផ្នែក ICT។ អីចឹងហើយ វាមានសារៈសំខាន់ក្នុងការជួយដល់ការបណ្ដុះបណ្ដាលធនធានមនុស្សខាងហ្នឹង»។

លោក រុន សារឹម មន្ត្រីគ្រប់គ្រងគម្រោងប្រចាំ PNC បង្ហាញពីគុណតម្លៃនៃការរួមចំណែកក្នុងកិច្ចការបណ្ដុះបណ្ដាលបណ្ដាយុវជនមកពីគ្រួសារជីវភាពខ្សត់ខ្សោយមួយនេះថា៖ «វាមានតម្លៃ ព្រោះថាគាត់បានចូលរួមជាមួយអង្គការមួយដែលផ្ដល់ជំនាញពិតប្រាកដដល់យុវជនខ្មែរ។ ពួកគាត់បានជួយបង្កើតឱកាសដល់សិស្សក្រីក្រ ដែលគ្រួសារពួកគេមិនមានលទ្ធភាពឲ្យរៀនបន្តមហាវិទ្យាល័យឡើយ»។

រាល់សិស្សចប់ថ្នាក់ទី១២ដែលអាចទទួលបានអាហារូបករណ៍ពី PNC ដែលមជ្ឈមណ្ឌលស្ថិតក្រោមការគ្រប់គ្រងរបស់អង្គការបារាំង Passerelles Numeriques និងកំពុងមានយុទ្ធការផ្ដល់ជំនាញព័ត៌មានវិទ្យាដល់យុវជនក្រីក្រនៅ វៀតណាម ហ្វីលីពីន និង ហុងកុងផងនោះ លុះត្រាតែជាសិស្សក្រីក្រពិត និងអាចឆ្លងកាត់ តេស្ត។

លោក រុន សារឹម ថាការបណ្ដុះបណ្ដាលរបស់ មជ្ឈមណ្ឌលនេះគឺផ្ដោតបំផុតលើការផ្ដល់ជំនាញ ព័ត៌មានវិទ្យាពិតៗឲ្យសិស្សក្រីក្រ។ សិស្សត្រូវរៀនមួយថ្ងៃ៨ម៉ោង និងមិនតម្រូវឲ្យមានភាពសម្ភារៈនិយមឡើយ។ និយាយរួមគ្មានទេសិស្សប្រើប្រាស់ទូរសព្ទ ឬម៉ូតូ គឺជិះតែកង់។

លោកថាទីនេះ គឺយកការអនុវត្តជាចម្បង គឺច្រើនជាងទ្រឹស្ដី។ ដូច្នេះសិស្សត្រូវតែប្រើវេលាដើម្បីអនុវត្ត។ ជាលទ្ធផលគឺកោយបញ្ចប់ការសិក្សា២ឆ្នាំ សិស្សមានការងារល្អធ្វើស្ទើរតែទាំងអស់ ក្រោយគ្រប់ជំនាន់។

ដើម្បីដឹងច្បាស់ថា PNC ដែល Sabay ចូលរួមឧបត្ថម្ភការបណ្ដុះបណ្ដាលនៅទីនោះ ជាអ្វីឲ្យកាន់តែច្បាស់នោះសូមទស្សនាដូចតទៅ៖ http://youtu.be/muVozwu7h1g

អត្ថបទ៖ ប៉ែន សុផាន់ណា វីដេអូ៖ YouTube/Passerelles Numériques Ngo