គ្រូពេទ្យ ប្រាប់ពីវិធីដោះស្រាយ ចំពោះការមករដូវលើកដំបូង

2016-03-10 17:32:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាធម្មតាក្មេងស្រីចាប់ផ្ដើមមករដូវនៅអាយុចន្លោះអាយុ ១១ និង ១៤ ឆ្នាំ ប៉ុន្តែវាអាចកើតមានឆាប់ត្រឹមតែអាយុ ៩ឆ្នាំ ឬយឺតរហូតដល់ទៅ ១៦ឆ្នាំ។ ការមានរដូវដំបូង (Menarche) គឺជា សញ្ញាថា អ្នកកំពុងលូតលាស់ និងក្លាយជាស្ត្រីពេញវ័យម្នាក់។

លោកវេជ្ជបណ្ឌិត ម៉ែន បញ្ញារតន៍ ស្ថាបនិកមួយរួប នៃវិបសាយសុខភាព www.health.com បាននិយាយថា ការចាប់ផ្តើមមានរដូវរាងកាយរបស់អ្នកក៏ចាប់ផ្លាស់ប្ដូរផងដែរ។ អ្នកចាប់ផ្ដើមមានការវិវឌ្ឍន៍ នៃសុដន់ ដុះរោមនៅខាងលើប្រដាប់ភេទ និងក្លៀកត្រគាក របស់អ្នកចាប់ផ្ដើមរីកធំ។

លោកបានពន្យល់ថា ការមានរដូវដំបូងក៏មានន័យថា ប្រសិនបើអ្នកមានការរួមភេទអ្នកអាចមានគភ៌បាន។អ្នកអាចមានផ្ទៃពោះក្នុងខែមុនពេលចាប់ផ្ដើមរដូវដំបូងរបស់អ្នក។ ដូច្នេះក្មេងស្រីជំទង់ទាំងអស់ត្រូវតែយល់អំពីបញ្ហានេះ ដើម្បីចៀសវាងការមានកូនទាំងអាយុនៅក្មេង ហើយមិនទាន់ត្រៀមខ្លួនរួចរាល់ដើម្បីធ្វើជាម្ដាយម្នាក់។

នៅក្នុងថ្ងៃមុនពេលក្មេងស្រីជំទង់ចាប់ផ្ដើមមករដូវនាងប្រហែលជាមានអារម្មណ៍តឹងតែង។ នាងអាចនឹងកើនទម្ងន់ហើមពោះជាដើម។ នាងអាចមានការឈឺចាប់ ( cramps ) ក្នុងពោះ ខ្នង ឬជើងដែលអាចអូសបន្លាយ ពីរ-បី ម៉ោង ឬច្រើនជាងនេះ។ សុដន់របស់នាងឡើងតឹង ហើយមុខមានឡើងមុន នៅពេលដែលនាងចាប់ផ្ដើមមានរដូវនាងនឹងសម្គាល់ឃើញថា មានឈាមនៅលើខោក្នុង របស់នាង ឬនៅពេលដែលនាងប្រើបន្ទប់ទឹក។ លំហូរនៃឈាមចេញពីទ្វារមាសរបស់នាងជាធម្មតាតិចតួចនៅពេលដំបូងហើយកើនឡើងច្រើនសម្រាប់ ពីរបីថ្ងៃមុនពេលវាបញ្ឈប់។ ឈាមនេះអាចជាឈាមពណ៌ត្នោតនៅពេលដំបូង និងបន្ទាប់មកក្លាយជាពណ៌ក្រហមស្រស់។ ការមករដូវជាធម្មតាមានរយៈពេលពី ៣ ទៅ ៧ថ្ងៃ ក្នុងមួយខែ។

លោក ម៉ែន បញ្ញារតន៍ បានផ្តល់យោបល់ថា ក្មេងស្រីដែលមករដូវលើកដំបូងគួរសាកសួរម្ដាយ ឬវេជ្ជបណ្ឌិត ឬស្ត្រីណាម្នាក់ដែលខ្លួនទុកចិត្តសម្រាប់ដំបូន្មានលើការប្រើប្រាស់ផលិតផលសម្រាប់ការមករដូវដូចជាសំឡីស៊ក (tampons) ឬសំឡីទ្រាប់ ( pads) ។ សំលី (tampon) គឺសម្រាប់ស៊កចូលទៅខាងក្នុងទ្វារមាសហើយវាល្អសម្រាប់ប្រើនៅពេលដែលក្មេងស្រីជំទង់ ហែលទឹក ឬការធ្វើសកម្មភាពផ្នែករាងកាយដទៃទៀត។ សំឡី (Pads) ជាបន្ទះមួយមានជ័រស្អិតជួយអោយជាប់ជាមួយនឹងខោក្នុង។ ក្មេងស្រីជំទង់ចាំបាច់ត្រូវផ្លាស់ប្ដូរ tampons និង pads អោយបានទៀងទាត់។ ការមករដូវមិនរំខានដល់ការធ្វើសកម្មភាពណាមួយនោះទេ។

ប្រសិនបើក្មេងស្រីជំទង់ម្នាក់មានការឈឺចាប់ (cramps) ជាមួយនឹងការមករដូវរបស់នាងនោះការធ្វើលំហាត់ប្រាណអោយបានទៀងទាត់ ស្អំកម្ដៅងូតទឹកក្ដៅឧណ្ណៗអាចជួយកាត់បន្ថយការឈឺចាប់បាន។

ប្រសិនបើការព្យាបាលទាំងនេះ មិនអាចជួយបានទេ ក្មេងស្រីជំទង់ គួរជួបគ្រូពេទ្យដើម្បីទទួលបាននូវវេជ្ជបញ្ជាក្នុងការប្រើប្រាស់ថ្នាំត្រឹមត្រូវ៕

អត្ថបទ៖ CCJ