លោកសង្ឃថៃ ប្រាប់មូលហេតុដែលក្រុម Leicester ខ្លាំងរដូវកាលនេះ

2016-03-16 15:44:43
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកសង្ឃថៃព្រះនាម Phra Prommangkalachan បានបង្ហើបប្រាប់មូលហេតុនៅពីក្រោយភាពជោគជ័យរបស់ក្រុម Leicester City នៅលីគកំពូលអង់គ្លេស Premier League រដូវកាលនេះ។

ព្រះអង្គ Phra តែងតែទៅក្លឹប Leicester ជាញឹកញាប់រយៈពេល៣រដូវកាលចុងក្រោយនេះ ដើម្បីប្រោះព្រំទីលាន និងកីឡាករឲ្យមានសំណាងល្អ ហើយព្រះអង្គជឿថា ដំណើរទៅទស្សនកិច្ចរបស់ព្រះអង្គ ក៏ជាមូលហេតុមួយផ្សំ ជួយឲ្យក្រុមកញ្ជ្រោងកំពុងឈរកំពូលតារាង Premier League នាំមុខក្រុមលេខ២ Tottenham ៥ពិន្ទុផងដែរ។

ចៅអធិការរងនៃវត្ត Traimitr Withayaram Woraviharn មានសង្ឃដីកាប្រាប់ដល់ AFP ថា៖ "អាត្មា បានពាក់ខ្សែកថាខ្លះៗលើករបស់ពួកគេ និងឲ្យក្រណាត់យ័ន្តដល់ពួកគេ។ អាត្មា មិនប្រាកដថា ពួកគេយល់ពីអ្វីដែលអាត្មាពន្យល់ទេ ប៉ុន្តែពួកគេដឹងថា វានឹងអាចជួយឲ្យពួកគេមានសំណាងល្អ”។

ព្រះអង្គ បានបញ្ជាក់ទៀតថា ម្ចាស់ក្លឹប Leicester ដែលជាជនជាតិថៃ Vichai Srivaddhanaprabha គឺជាអ្នកនិមន្តព្រះអង្គ និងលោកសង្ឃជាច្រើនអង្គទៀតទៅកីឡដ្ឋាន King Power ហើយព្រះអង្គជឿថា ក្រុមកញ្ជ្រោងនឹងអាចលើកពាន Premier League រដូវកាលនេះ។

“គាត់បាននិមន្តព្រះសង្ឃជាច្រើនអង្គទៅទីនោះ ដើម្បីសូត្រមន្តបួងសួង និងប្រោះព្រំ សូមឲ្យមានសំណាងល្អក្នុងការប្រកួត ដល់ថ្នាក់គ្រប់គ្រង និងសំណាងល្អដល់ក្រុមកីឡាករទាំងអស់។ ប្រាកដណាស់ ក្រុម Leicester នឹងលេខ១ នៅ Premier League រដូវកាលនេះ"។ ព្រះអង្គ មានសង្ឃដីកាបន្ថែម៕

-ចុចអាន៖ Leicester មាន Fans នៅថៃកើនឡើងខ្លាំង មិននឹកស្មានដល់

ប្រែសម្រួល៖ វិន ជីវ័ន្ត ប្រភព៖ goal | bangkokpost