Rolls-Royce Ghost តម្លៃជាង១លានដុល្លារ ដាក់លក់នៅវៀតណាម

2016-03-30 18:39:23
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញនេះក្រុមហ៊ុន Rolls-Royce Motor Cars ប្រចាំប្រទេសវៀតណាមបានដាក់សម្ពោធនូវរថយន្តម៉ូដែល Rolls-Royce Ghost EWB ជាផលិតផលថ្មី ដែលនឹងដាក់លក់លើទីផ្សារប្រទេសនេះ។

ម៉ូដែល Ghost ប្រភេទ EWB នេះមានការរចនារូបរាងប្រៀបដូចជាប្រភេទធម្មតាដែរ ប៉ុន្តែវាក៏មាននូវចំណុចពិសេសជាច្រើនជាក់ស្ដែងដូចជាទេវរូបនៅខាងមុខឡាន។ ជាធម្មតាទេវរូបនេះផលិតឡើងពីប្លាទីនពណ៌ស និងមាសស្ទើរសុទ្ធ ប៉ុន្តែទេវរូបរបស់ Ghost EWB នេះផលិតពីសារធាតុពិសេសម្យ៉ាងដែលមានពណ៌សថ្លា ពន្លឺចាំងឆ្លុះ។

ប្រៀបនឹងប្រភេទធម្មតា ប្រភេទ EWB នេះមានវិមាត្រធំជាង ពោលមានបណ្ដោយ ៥៥៦៩ម.ម ទទឹង១៩៤៨ម.ម និងមានកម្ពស់១៥៥០ម.ម។

នៅផ្នែកខាងក្នុងរចនាឡើងដោយរំលេចពណ៌ជាច្រើនខុសៗគ្នា ហើយថែមទាំងមានប្រព័ន្ធកម្សាន្តដោយមានរន្ធបំពងសំឡេងចំនួន១៦ និងមាន Hard-Drive ទំហំ១២,៥GB សម្រាប់រក្សាទុកបទចម្រៀង។ ក្រៅពីនេះក៏មានជាអេក្រង់ LCD សម្រាប់បង្ហាញព័ត៌មាន, មានជាប្រព័ន្ធនាំផ្លូវដោយសំឡេង និងមានប្រព័ន្ធ Bluetooth ដើម្បីភ្ជាប់ជាមួយទូរសព្ទ។

បើតាមវិបសាយក្នុងស្រុកបានឲ្យដឹងថាម៉ូដែល Rolls-Royce Ghost EWB នេះមានដាក់លក់លើទីផ្សារក្នុងប្រទេសចាប់ពីថ្ងៃទី០៤ ខែមេសា ក្នុងតម្លៃប្រមាណជា ២៤,១ពាន់លានដុង (ប្រមាណជាង១លានដុល្លារសហរដ្ឋអាមេរិក)៕

ចុចអាន៖ តួស្រី Fast & Furious បើក Jaguar F-Type SVR ក្នុងល្បឿន ៣២៣គីឡូម៉ែត្រក្នុងមួយម៉ោង

ប្រែសម្រួល៖ ហៃ សុខហេង ប្រភព៖ zing