មើលមហាសេដ្ឋីបច្ចេកវិទ្យាទាំងនេះ បានធ្វើអ្វីខ្លះនៅវ័យ២៥ឆ្នាំ

2016-04-04 21:49:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណើរជីវិតរបស់មនុស្សម្នាក់ៗគឺខុសគ្នា ជាក់ស្ដែងដូចជាបុគ្គលបច្ចេកវិទ្យាល្បីៗខាងក្រោមនេះ នៅវ័យ២៥ឆ្នាំ មានអ្នកខ្លះទទួលបានជោគជ័យក្លាយជាមហាសេដ្ឋីទាំងវ័យក្មេង ឯខ្លះទៀតទើបតែចាប់ផ្ដើមជំនួញរបស់ពួកគេនៅឡើយ។

@លោក Steve Jobs ស្ថាបនិកក្រុមហ៊ុន Apple

ត្រឡប់ទៅកាន់ថ្ងៃជួញដូរលើកដំបូងរបស់ក្រុមហ៊ុន Apple កាលពីខែធ្នូ ឆ្នាំ១៩៨០ ហ៊ុនរបស់ Apple មានតម្លៃសរុប ១,២ពាន់លានដុល្លារ ដែលធ្វើឲ្យស្ថាបនិកក្រុមហ៊ុននេះក្លាយជាអ្នកមាន។ ពេលនោះលោក Steve Jobs ដែលជាស្ថាបនិកមួយរូបទើបតែមានវ័យ២៥ឆ្នាំប៉ុណ្ណោះ។

@លោក Jeff Benoz ស្ថាបនិកនិងនាយកប្រតិបត្តិក្រុមហ៊ុន Amazon

នៅវ័យ២៤ឆ្នាំគាត់បានចូលធ្វើការនៅក្រុមហ៊ុន Bankers Trust ដែលជាក្រុមហ៊ុនបង្កើតកម្មវិធីឲ្យគ្រឹះស្ថានអប់រំផ្នែកធនាគារ។ ពីរឆ្នាំក្រោយមកលោក Jeff ក៏បានក្លាយជាអនុប្រធានវ័យក្មេងជាងគេក្នុងក្រុមហ៊ុន។

@លោក Elon Musk ស្ថាបនិកនិងនាយកប្រតិបត្តិក្រុមហ៊ុន SpaceX

មុនឆ្លងចូលវ័យ២៥ឆ្នាំ លោក Musk បានដកខ្លួនចេញពីការសិក្សាផ្នែកបណ្ឌិតនៃសកលវិទ្យាល័យ Stanford ដើម្បីបង្កើតក្រុមហ៊ុនអ៊ីនធឺណិតដំបូងរបស់ខ្លួន មានឈ្មោះថា Zip2។ បួនឆ្នាំក្រោយមកក្រុមហ៊ុន Compaq បានទិញយក Zip2 ក្នុងតម្លៃ ៣០៧លានដុល្លារ ហើយលោក Musk ក៏ប្រើប្រាស់លុយដែលបានពីលក់ក្រុមហ៊ុន ទៅចាប់ផ្ដើមជំនួញថ្មីគឺបើកក្រុមហ៊ុន PayPal។

@អ្នកស្រី Marissa Mayer ប្រធាននិងនាយកប្រតិបត្តិក្រុមហ៊ុន Yahoo!

នៅវ័យ២៤ឆ្នាំ Marissa បានក្លាយជាបុគ្គលិកទី២០របស់ក្រុមហ៊ុន Google ហើយក៏ជាវិស្វករស្រីដំបូងគេក្នុងក្រុមហ៊ុន។ គាត់បានធ្វើការឲ្យក្រុមហ៊ុននេះរយៈពេល១៣ឆ្នាំ មុននឹងផ្លាស់ទៅកាន់តំណែងបច្ចុប្បន្នជា CEO នៃក្រុមហ៊ុន Yahoo!។

@លោក Mark Zuckerberg ស្ថាបនិកក្រុមហ៊ុន Facebook

លោក Mark បានចំណាយពេលធ្វើការយ៉ាងសស្រាក់សស្រាំជាមួយនឹង Facebook រហូតដល់អាយុ២៥ឆ្នាំ ដែលក្នុងវ័យនោះក្រុមហ៊ុនរបសើលោកទទួលបានការចំណេញជាលើកដំបូង ហើយអ្នកប្រើប្រាស់មានចំនួន៣០០លាននាក់។ ឆ្នាំបន្ទាប់គាត់បានជាប់ឈ្មោះជា "Person of the Year” នៅលើទស្សនាវដ្ដី TIME៕

ចុចអាន៖ ត្រឹមបុគ្គលិកហាត់ការក៏អាចរកមួយខែបានរាប់ពាន់ដុល្លារដែរ នៅក្រុមហ៊ុនបច្ចេកវិទ្យាទាំងនេះ

ប្រែសម្រួល៖ ហៃ សុខហេង ប្រភព៖ BusinessInsider