Audi បាន​ដាក់​បង្ហាញ​រថយន្ត​ប្រណីត Audi Q5 ស៊េរី​ឆ្នាំ ២០១៥ ដែល​​គ្រោង​មក​ដល់​ទីផ្សារ​ប្រទេស​កម្ពុជា​នៅ​ចុង​ឆ្នាំ​នេះ។ រថយន្ត​នេះ ក្រុមហ៊ុន​អះអាង​ថា​ ត្រូវ​បាន​រចនា​ឡើង​យ៉ាង​ពិសេស ​សម្រាប់​គ្រួសារ​ទាន់​សម័យ។

លោក Laurent Genet នាយក​គ្រប់គ្រង Automotive Asia ឲ្យ​ដឹង​ថា Q5 ត្រូវ​បាន​រចនា​ឡើង​យ៉ាង​ពិសេស​សម្រាប់​​គ្រួសារ​ថ្មីថ្មោង​ ដែល​ត្រូវការ​ប្រភេទ​​រថយន្ត​ដែល​​មាន​​​​ភាព​ទាក់ទាញ និង​ទាន់សម័យ។

Q5 ដំណើរការ​ដោយ ៤ ម៉ាស៊ីន​ប្រើ​សាំង ជាមួយ​បច្ចេកវិទ្យា Direct Fuel injection និង​ប្រព័ន្ធ Turbocharging និង Audi Valve Lift ដែល​ជំរុញ​ការ​បើកបរ​មាន​សន្ទុះ​លឿន​និង​មាន​លំនឹង​ល្អ។ Q5 សន្សំសំចៃ​បំផុត​ដោយ​ ១០០ គីឡូម៉ែត្រ​​ប្រើ​ថាមពល​អស់​ជិត ៨ លីត្រ​ប៉ុណ្ណោះ។

លោក Laurent Genet អះអាង​ថា Q5 ​នឹង​ក្លាយ​ជា​គូប្រជែង​រថយន្ត​ប្រណិត​ដទៃ​ទៀត​​ដូចជា Macan របស់ Porsche, X3 របស់ BMW និង GLK របស់ Mercedez-Benz​ ជា​ដើម។ Audi Q5 ត្រូវ​គេ​បញ្ជាក់​តម្លៃ​លក់​ចាប់​ពី ៨ ម៉ឺន​ដុល្លារ​ដោយ​មាន​ការ​ធានា​រយៈ​ពេល​ពីរ​ឆ្នាំ។ រថយន្ត​នេះ​គ្រោង​​នាំ​មក​លក់​លើ​ទីផ្សារ​ប្រទេស​​កម្ពុជា​នៅ​ចុង​ឆ្នាំ ២០១៤ នេះ។

ព័ត៌មាន​បន្ថែម​អាច​ទាក់ទង​ក្រុមហ៊ុន Automotive Asia ស្ថិត​នៅ​បណ្តោយ​ផ្លូវ​ព្រះមុនីវង្ស សង្កាត់​ទន្លេ​បាសាក់​ ខណ្ឌ​ចំការ​មន ឬ​ទំនាក់ទំនង​តាម​លេខ​ទូរសព្ទ ០២៣ ២២២ ២០៤។

អត្ថបទ៖ ប៊ុណ្ណារ៉ា