សិស្សក្មេងៗឡើងចុះភ្នំកម្ពស់ ៨០០ម៉ែត្រទៅរៀន នឹងទទួលបានជណ្ដើរថ្មី

2016-06-11 16:34:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយសារព័ត៌មានចិន និងពិភពលោក បានចុះផ្សាយពីការធ្វើដំណើរទៅសាលារៀនសិស្សក្មេងៗចំនួន ១៥នាក់ ដែលចុះឡើងភ្នំកម្ពស់ ៨០០ម៉ែត្រមក អាជ្ញាធរប្រចាំតំបន់បានសន្យាធ្វើជណ្ដើរថ្មីឲ្យពួកគេហើយ។

សិស្សសាលាទាំង១៥នាក់ ត្រូវគេដឹងថាមានអាយុចន្លោះពី ៦ ទៅ ១៥ឆ្នាំ ត្រូវធ្វើដំណើរឡើងចុះតាមជណ្ដើរឈើផ្ដៅចាស់ៗដើម្បីទៅសិក្សា។ ពួកគេត្រូវដើរឡើងចុះ២សប្ដាហ៍ម្ដង ហើយម្ដងៗចំណាយពេលជាង ២ម៉ោង តាមផ្លូវចង្កេះភ្នំ និងឆ្លងទន្លេច្រើនដងថែមទៀត។

ជណ្ដើរធ្វើដំណើរឡើងចុះរបស់ពួកគេមានចំនួន ១៧កន្លែង ដែលសង់ពីឈើចងផ្អោបគ្នា ដែលមើលទៅពិតជាគ្រោះថ្នាក់ខ្លាំងណាស់។ កាសែតចិន Bejing News ផ្សាយថាក្មេងៗបានដើរឆ្លងកាត់កន្លែងធ្លាប់បាក់ដី ជួបពស់ ដើរកាន់ដៃគ្នាតាមរូងភ្នំងងឹតមួយកន្លែងចម្ងាយ ៥០ម៉ែត្រ ដោយប្រើភ្លើងពិលទូរសព្ទរបស់ឪពុកម្ដាយពួកគេ។

លោក Lin Shucheng ប្រធានគ្រប់គ្រងតំបន់ Liangshan Yi ខេត្តស៊ីឈួន សន្យាសង់ជណ្ដើរដែក ជំនួសជណ្ដើរផ្ដៅឲ្យបានឆាប់ៗបំផុតដើម្បីធានាសុវត្ថិភាពអ្នកភូមិ។ ចំណែកមន្ត្រីប្រចាំស្រុក Zhaojue និយាយថា បើសិនគេសង់ផ្លូវភ្ជាប់ភូមិដាច់ស្រយាលទាំងនេះ នឹងត្រូវចំណាយ ៩,១លានដុល្លារ តែពេលនេះគេមានតែជាង ៣ម៉ឺនដុល្លារប៉ុណ្ណោះសម្រាប់គម្រោងនេះ៕