តារាហុងកុងល្បី Kate Tsui មកលេងអង្គរវត្តស្ងាត់ៗ

2016-06-24 17:06:21
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈការបង្ហោះរូបនិងវីដេអូមួយចំនួនលើបណ្ដាញសង្គម Instagram បញ្ជាក់ថា តារាសម្ដែងសម្ដែងស្រីហុងកុង Kate Tsui បានមកធ្វើដំណើរកម្សាន្តក្នុងប្រទេសកម្ពុជាទឹកដីខេត្តសៀមរាប កាលពីពេលថ្មីៗនេះ។

Kate បានបង្ហោះរូប២សន្លឹក ១ថតកាលពី២ថ្ងៃមុនបង្ហាញពីទេសភាពប្រាសាទអង្គរវត្តពេលថ្ងៃរះនិងសរសេរភ្ជាប់ថា៖"គ្មានអ្វីមករំខានខួបកំណើតលើកនេះទេ"។ ការដែលសរសេរបែបនេះដោយសារតែខួបកំណើតគម្រប់៣៧ឆ្នាំនាង ទើបតែធ្វើកាលពីថ្ងៃ ១៩ ខែ មិថុនាថ្មីៗនេះ ហើយក៏អាចនិយាយបានថាវាជាវិសម្សកាលសម្រាប់ថ្ងៃខួបកំណើតរបស់នាងផងដែរ។

ឯរូបមួយទៀតថតនៅជណ្ដើរឡើងអង្គរវត្ត ដោយសរសេរភ្ជាប់ដោយរំភើបថា៖"មានតែមួយគ្មាន២...អង្គរវត្ត។ នេះគឺជាសំណង់ស្ថាបត្យកម្មមួយក្នុងចំណោមសំណង់ដ៏អស្ចារ្យបំផុតក្នុងលោក! ខ្ញុំពិតជាចង់ណែនាំឲ្យអ្នកគ្រប់គ្នាមកទស្សនាយ៉ាងហោចម្ដងក្នុងមួយជីវិត! ចំណាយពេលនៅទីនេះពិតជាមានន័យ បើទោះជាបែកញើសនិងមូសខាំបន្តិចក៏ដោយ។ ឯខោនេះគឺខ្ញុំទិញនៅផ្សាររាត្រី តែអ្នករស់នៅទីនេះគិតថាខ្ញុំជានារីជប៉ុន?? Huh?”។

លើសពីនេះ Kate Tsui ក៏បានបង្ហោះវីដេអូឡើងនិងចុះលើប្រាសាទអង្គរវត្តក្នុងសំលៀកបំពាក់ពណ៌ខៀវមួយឈុត ហើយវីដេអូ២នោះមានអ្នកចូលមើលរាប់ពាន់នាក់ឯណោះ។ Kate ធ្លាប់សម្ដែងក្នុងរឿងភាគច្រើនដូចជា "Highs and Lows”និង"Lives of Omission” ជាដើម ហើយរឿងទាំងនោះមួយចំនួនក៏ធ្លាប់បានចាក់ផ្សាយលើកញ្ចក់ទូរទស្សន៍នៃប្រទេសកម្ពុជាដែរ៕