ភីអិនអិន ប្រកាសដំណើរការកម្មវិធី "មុខរបរខ្ញុំ" រដូវកាលទី២ ជាផ្លូវការ

2016-06-29 23:48:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានីយទូរទស្សន៍ ភីអិនអិន (PNN) បានធ្វើសន្និសីទព័ត៌មានអម្បាញ់មិញនេះ នៅសណ្ឋាគារភ្នំពេញ ដោយប្រកាសដំណើរការកម្មវិធីជីវិតពិត "មុខរបរខ្ញុំ" រដូវកាលទី២ ជាផ្លូវការ។

"មុខរបរខ្ញុំ" នឹងចាប់ដំណើរការរដូវកាលទី២ របស់ខ្លួន ដោយការប្រកួតប្រជែងនឹងកាន់តែតានតឹងខ្លាំងជាងរដូវកាលទី១។ ប្រធានបទប្រកួតប្រជែង នឹងខុសៗគ្នាពីមួយសប្ដាហ៍ទៅមួយសប្ដាហ៍ ពោលគឺខុសគ្នាទាំង ៨ សប្ដាហ៍តែម្ដង។ កម្មវិធីនេះ នឹងចាក់ផ្សាយជូនទស្សនាចាប់ពីថ្ងៃទី៤-កក្កដា តទៅរៀងរាល់ថ្ងៃចន្ទ ដល់សុក្រ វេលាម៉ោង ៨ ដល់ ៨:៣០ យប់។

រដូវកាលទី២នេះ មានបេក្ខជនចូលរួមប្រកួត ១០ រូប ដែលជាសហគ្រិនម្ចាស់ហាងកាហ្វេ ហាងពងមាន់អាំង ហាងនំ អាជីវករនៅផ្សារទួលទំពូង និងនិស្សិតមកពីខេត្ត ដើម្បីក្លាយជាអ្នកជំនួញឆ្នើម។ បេក្ខជនទាំងអស់ ត្រូវតម្រូវឲ្យធ្វើការជាក្រុម ហើយភ្ញៀវកិត្តិយសមកពីវិស័យខុសៗគ្នា ត្រូវបានអញ្ជើញឲ្យចូលរួមនិយាយពីបទពិសោធន៍ជីវិតពិតផងដែរ ខណៈបេក្ខជនទាំងអស់ត្រូវប្រឹងបញ្ចេញសមត្ថភាពការងារប្រកួតប្រជែងគ្នា ដើម្បីឆ្ពោះទៅឈ្នះរង្វាន់ ២០ លានរៀល។

លោក ជីមមី ផលិតករប្រតិបត្តិ ថ្លែងថា "យើងមានអារម្មណ៍ថា កម្មវិធីនេះនឹងទាក់ទាញ ហើយលើកទឹកចិត្តសហគ្រិនវ័យក្មេង ដើម្បីបង្កើតមុខជំនួញផ្ទាល់ខ្លួននៅថ្ងៃណាមួយ។ យើងនឹងអញ្ជើញអ្នកជំនាញមកពីវិស័យខុសៗគ្នាចូលរួមក្នុងកម្មវិធី របស់យើង ដើម្បីជជែកជាមួយបេក្ខជនទាក់ទងនឹងបទពិសោធន៍ជិវិតពិត។ ដូច្នេះយើងនឹងមិនគ្រាន់តែបង្កើតកម្មវិធីដើម្បីកម្សាន្តនោះទេ ប៉ុន្តែយើងចង់ឲ្យអ្នកទស្សនារបស់យើងរៀនពីអ្វីម្យ៉ាងផងដែរ"។

រៀងរាល់សប្ដាហ៍ នឹងមានបេក្ខជនម្នាក់ធ្លាក់ចេញពីកម្មវិធី ដែលការសម្រេចនឹងត្រូវធ្វើឡើងតាមរយៈការបោះឆ្នោតរបស់បេក្ខជនចូលរួមក្នុងកម្មវិធី រហូតដល់សប្ដាហ៍ទី៩ ទើបរកឃើញជយលាភី។