ចំណេញតិចពាន់ដុល្លារអី បើសុទ្ធតែទិញ Lexus មួយទឹកទម្លាក់ពីកុងតឺន័រ

2016-06-30 17:16:25
ចំនួនមតិ 0 | ចំនួនចែករំលែក 0

ចន្លោះមិនឃើញ

រាប់ពី Lexus RX 330 និង 350 ស៊េរី ២០០៤ ជាដើម បើទិញនៅហាងលក់រថយន្តផ្ទាល់ តម្លៃមិនក្រោម ៣ម៉ឺនដុល្លារទេ តែបើទៅទិញដល់កន្លែងទម្លាក់ឡានពីកុងតឺន័រតែម្តង អាចចំណេញដល់ទៅខ្ទង់ពាន់ដុល្លារឯណោះ។

រូបតំណាង

រឿងចង់ចំណេញនិងបានរថយន្ត Lexus RX មួយទឹកមានគុណភាពមិនធ្លាប់បុកខ្ទេចខ្ទី លោក លី ដែលជាអ្នកជំនាញផ្នែកមើលរថយន្ត តែងតែទៅទិញ Lexus មួយទឹកនៅកន្លែងទម្លាក់រថយន្តពីកុងតឺន័រតែម្តង។

លោកថា មុនពេលទិញរថយន្ត Lexus មួយទឹកម្តងៗ លោកមិនដែលទៅទិញឡានស្អាត (ឡានជួសជុលនិងបាញ់ថ្នាំរួចរាល់) ចតតាំងផ្ទាល់នៅហ្ការ៉ាស់ឡានទេ ព្រោះមិនដឹងថា រថយន្តទាំងនោះធ្លាប់បុកខ្ទេចកន្លែងណាខ្លះឡើយ។ ដូច្នេះមានតែទៅទិញផ្ទាល់នៅកន្លែងកុងតឺន័រទម្លាក់ឡានរបស់ហ្ការ៉ាស់លក់ឡានមួយ ក្នុងក្រុងភ្នំពេញ រួចសឹមយកយកកែកុនឲ្យស្អាតខ្លួនឯង អស់លុយតិចតួចប៉ុណ្ណោះ។

មុនពេលទិញរថយន្តមួយទឹកឲ្យបងប្អូន លោក លី តែងតែឲ្យបណ្ដាញនៅអាមេរិក ថតរូបរាងឡានចង់ទិញ គ្រប់ផ្នែកផ្ញើឲ្យលោក ដើម្បីពិនិត្យថាតើមានធ្លាប់បុកធ្ងន់ធ្ងរឬទេ។ បើគ្រាន់តែរបកថ្នាំឬប៉ះទង្គិចតិចតួច លោក លី នឹងសម្រេចយក ហើយរង់ចាំទិញយកភ្លាមពេលទម្លាក់មកដល់ខ្មែរ។

រូប៖ autopazar

ជាក់ស្ដែង Lexus RX 330 ស៊េរី ២០០៤ ដែលលោក លី ទើបទិញ ហ្ការ៉ាស់លក់ឡានដែលលោកស្គាល់លក់តម្លៃ ២៧ ០០០ ដុល្លារ ដោយខូចខាតផ្នែកខ្លះប៉ុណ្ណោះ។ បើចំណាយលុយជួសជុល លោក លី ថាអស់តែប្រមាណ ២០០ ទៅ ៣០០ដុល្លារ សរុបអស់ជាង ២៧ ០០០ ដុល្លារ តែបើរង់ចាំទៅទិញឡានស្អាតផ្ទាល់នៅហាង ថ្លៃខ្ទង់ជាង ៣ម៉ឺនដុល្លារ ឯណោះ។

លោក លី ថា ទោះការទៅទិញឡានមួយទឹកនៅកន្លែងទម្លាក់ពីកុងតឺន័រ ចំណេញប្រហែល ២ឬ ៣ពាន់ដុល្លារ តែត្រូវរង់ចាំដល់កន្លះខែទៅមួយខែទម្រាំមកដល់ស្រុកខ្មែរ ហើយត្រូវចំណាយពេលនិងកម្លាំងយកឡានទៅជួសជុលខ្លួនឯង។ ប៉ុន្តែយ៉ាងណា អ្នកទិញអាចដឹងថាឡានទម្លាក់ផ្ទាល់ពីកុងតឺន័រខ្ទេចកន្លែងណា៕

អាន៖ ដឹងហាង លក់ឡាន Lexus 570 មួយគ្រឿងៗ ចំណេញប៉ុន្មានអត់?

អត្ថបទ៖ ប៉ែត ផាន់និត