សមាគមសិល្បៈសុវណ្ណភូមិ បដិសេធព័ត៌មានផ្អាកសម្ដែងល្ខោនស្រមោលស្បែកធំ

2016-07-06 17:21:26
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ឃឹម មាឃ តំណាងសមាគមសិល្បៈសុវណ្ណភូមិបានអះអាងថា មិនបានផ្អាកការសម្ដែងទស្សនីយភាពល្ខោនស្រមោលស្បែកធំនោះទេ ហើយនៅតែដំណើរការរៀងរាល់ថ្ងៃសុក្រ-សៅរ៍ចុងសប្ដាហ៍ជាធម្មតា។

“គេយល់ច្រឡំហ្នឹង ប្រហែលមកពីពីថ្ងៃសុក្រកន្លងទៅក្រុមយើងអត់សម្ដែងទេ ដោយសារគ្មានអ្នកទៅមើលសោះតែម្ដង ប៉ុន្តែដល់សៅរ៍បន្ទាប់ មានជនបរទេសទៅមើល ៦ នាក់ដែរ"។ លោកថ្លែងមកកាន់ Sabay ។ សិល្បកររូបនេះបន្ថែមទៀតថា ព័ត៌មានបិទការសម្ដែងល្ខោនស្រមោលស្បែកធំមិនបានចេញពីសមាគមសិល្បៈសុវណ្ណភូមិនោះទេ។

ប៉ុន្តែសិល្បកររូបនេះបានចាប់អារម្មណ៍ឃើញថា សន្ទុះនៃការគាំទ្រសិល្បៈខ្មែររួមមានល្ខោនស្បែកធំជាដើម មានលក្ខណៈដូចភ្លើងចំបើងបានតែដំបូងប៉ុណ្ណោះ ក្រោយមកក៏ស្ងាត់ទៅវិញ។ ប៉ុន្តែលោកអះអាងថា ទោះបីជាយ៉ាងណា សមាគមដែលជាដំបូលជ្រកកោនរបស់លោកមួយនៅតែបន្តសម្ដែងជារៀងរាល់ចុងសប្ដាហ៍ ដើម្បីបានកម្រៃខ្លះសម្រាប់ទ្រទ្រង់ជីវភាពសមាជិកប្រហែល ២០ នាក់ និងចំណាយលើការជួលទីតាំងដាក់សម្ភារៈ។

កន្លងមកលោកគ្រូស្បែកធំ ម៉ាន់ កុសល ធ្លាប់បានឱ្យដឹងថា ការបើកទ្វាសមាគមសិល្បៈសុវណ្ណភូមិឡើងវិញ គឺជាការដឹងគុណចំពោះមហាជនដែលជ្រោមជ្រែងសមាគមរបស់លោកក្នុងពេលមានវិបត្តិសេដ្ឋកិច្ច។ ក្នុងនោះយុវវ័យជំនាន់ក្រោយមួយចំនួន បានបង្ហាញជំហរធានានិរន្តរភាពសមាគមទៀតផង។

កញ្ញា រិទ្ធី លំអងពេជ្រ តំណាងក្រុមភ្លើងគប់ ដែលជាអ្នកធានានិរន្តរភាពសមាគមខាងលើបាននិយាយថា នាងកំពុងប្រកាសស្វែងរកក្រុមការងារស្នូលចូលរួមការងារក្នុងសមាគមសិល្បៈសុវណ្ណភូមិផងដែរ។ ក្នុងនោះរួមមានផ្នែកគណនេយ្យ ទីផ្សារ ប្រធានគម្រោង និងអ្នកទទួលកក់សំបុត្រទស្សនាជាដើម។

យុវតីរូបនេះបន្តថា ការអនុវត្តន៍តាមផែនការខាងលើទើបអាចធ្វើឱ្យសមាគមមានចំណូលជាអចិន្ត្រៃយ៍ និងអាចធានាបាននូវនិរន្តរភាពយូរអង្វែងផងដែរ៕