ហាត់ការនៅកូរ៉េជាង ១ឆ្នាំ កើតកូនចិត្តចង់អភិវឌ្ឍមធ្យោបាយដឹកជញ្ជូនជឿនលឿនដូចស្រុកគេ

2016-07-22 18:52:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ស ម៉ាយូរ៉ា ចង់អភិវឌ្ឍមធ្យោបាយធ្វើដំណើរនៅប្រទេសកម្ពុជា ដូចប្រទេសកូរ៉េ ខណៈកំពុងហាត់ការផ្នែក Software Developer នៅក្រុមហ៊ុនបច្ចេកវិទ្យាធំមួយ ក្នុងប្រទេសនេះ។

រូបភាព៖ ហ្វេសប៊ុក យូរ៉ា

អតីតនិស្សិតឆ្នើមជំនាន់ទី ១៥ ផ្នែកវិទ្យាសាស្ត្រកុំព្យូទ័រ នៅសាកលវិទ្យាល័យន័រតុនរូបនេះថា ក្រោយជាប់ឈ្មោះទៅហាត់ការនៅកូរ៉េតាមរយៈវិទ្យាស្ថានកូរ៉េ HRD រូបគេត្រូវហាត់ការនៅទីនោះរយៈពេលពីរឆ្នាំ ទើបត្រឡប់មកស្រុកកំណើតវិញ។ ទំនើបភាវូបនីយកម្មខាងផ្នែកមធ្យោបាយដឹកជញ្ជូននៅទីនោះ បានដក់ជាប់ក្នុងចិត្តយូរ៉ា ក្រោយធ្វើការបានជាង ១ឆ្នាំនៅកូរ៉េ។

បើនិយាយពីសេវាកម្មឡានក្រុងនិងរថភ្លើង ដែលជាមធ្យោបាយធ្វើដំណើរទំនើបនៅកូរ៉េ យូរ៉ាថា សុទ្ធតែប្រើប្រព័ន្ធកុំព្យូទ័រទាំងអស់។ ជាក់ស្តែង នៅទីនោះគេប្រើប្រព័ន្ធឆូតកាតលើឡានក្រុងនិងរថភ្លើងដើម្បីគិតប្រាក់ ងាយស្រួលនិងមិនខាតពេល។ ពេលឡើងឡានក្រុងឬរថភ្លើងនៅកូរ៉េ អ្នកធ្វើដំណើរគ្រាន់តែយកកាតធ្វើដំណើរដែលមានទឹកប្រាក់ ហើយឆូតកាត អាចរកកន្លែងអង្គុុយបន្តដំណើរបាន ឯតៃកុងឡានអាចប្រើផែនទីអេឡិចត្រូនិកដើម្បីសម្រួលដល់ការបើកបរឲ្យកាន់តែរលូន។

ឃើញបែបនេះ យូរ៉ា ក៏កើតកូនចិត្តចង់យកជំនាញនិងបទពិសោធន៍បានរៀនសូត្រនិងជួបប្រទះនៅកូរ៉េ មករួមចំណែកយ៉ាងណាឲ្យមធ្យោបាយដឹកជញ្ជូន ពិសេសឡានក្រុងស្រុកខ្មែរ មានការអភិវឌ្ឍ។

បុគ្គលិកហាត់ការរូបនេះ ថា យ៉ាងណាបើចង់បំពាក់ប្រព័ន្ធកុំព្យូទ័រគ្រប់គ្រងលើវិស័យដឹកជញ្ជូននៅកម្ពុជា អាចថាមិនងាយស្រួល តែក៏មិនបានន័យថាមិនអាចទៅរួចដែរ។ ម្យ៉ាងទៀត សម្រាប់ភាពងាយស្រួលក្នុងការប្រើប្រាស់ដល់ពលរដ្ឋ ប្រព័ន្ធកុំព្យូទ័រទាំងអស់ គួរបង្ហាញទិន្នន័យជាភាសាខ្មែរ។

ដើមឆ្នាំក្រោយ យូរ៉ាត្រូវត្រឡប់មកមាតុភូមិវិញ តែត្រូវជាប់កុងត្រាធ្វើការឲ្យក្រុមហ៊ុនក្នុងស្រុកមួយរយៈពេល ៣ ឆ្នាំ។

យូរ៉ាថា ការរួមចំណែកអភិវឌ្ឍលើវិស័យដឹកជញ្ជូនសាធារណៈ ជាកូនចិត្តរបស់គេចង់សម្រេច តែគប្បីមានការរួមសហការពេញដៃជើង។ គោលបំណងមួយទៀតរបស់យូរ៉ា គឺបង្កើតក្រុមហ៊ុនផលិត Software បើមានឱកាសនិងលទ្ធភាពគ្រប់គ្រាន់៕

អត្ថបទ៖ ប៉ែត ផាន់និត