ម្ដាយឪពុកសន្យាអ្វីខ្លះ បើកូនជាប់បាក់ឌុប?

2016-08-23 15:42:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះបាក់ឌុបមិនទាន់ចប់ តែម្ដាយឪពុកបានសន្យាក្នុងចិត្តជាមួយកូនរួចជាស្រេច ដើម្បីលើកទឹកចិត្តកូនឲ្យកាន់តែមានកម្លាំងចិត្តធ្វើចម្លើយកិច្ចការរបស់ខ្លួន។

អ្នកនាង អ៊ុង នី មានកូនមកប្រលងនៅមណ្ឌលព្រះយុគន្ធ បានប្រាប់ថា ទោះជីវភាពមិនធូរធារដូចគេ តែកាដូសម្រាប់កូនពេលប្រលងជាប់គឺត្រូវតែមាន។ ស្ត្រីវ័យប្រមាណ៤០ឆ្នាំបន្តថា៖ "គ្មានអ្វីធុំដុំទេ តែជូនកូនដើរលេងទៅកំពង់សោម។ អោយតែកូនជាប់ ទោះនិទ្ទេសអីក៏អត់សំខាន់ដែរ"។

ស្រដៀងគ្នានេះដែរ លោក សុខ សុវណ្ណ បានប្រាប់ថា កូនជាប់សម្រាប់ការប្រលងតឹងចឹង លោកពិតជាមានអំណោយឲ្យ។ លោកមិនទាន់ច្បាស់ថាត្រូវឲ្យអ្វីនោះទេ តែលោកថាប្រាកដជាសន្សំលុយឲ្យបានសម្រាប់កូន បើកូនជាប់មែននោះ។ លោកថា អាចប្រហែលជាទូរសព្ទថ្មីមួយគ្រឿងអី តែចាំមើលថ្ងៃនោះឲ្យប្រាកដសិន ប៉ុន្តែដឹងតែមានរបស់សំខាន់ឲ្យកូនមិនខាន។

កំពុងអង្គុយលើម៉ូតូពាក់ម៉ាស អ្នកនាង ទុង ធីតា បង្ហាញក្ដីស្រលាញ់ចំពោះកូនថានឹងមានរបស់តិចតួចសម្រាប់កូនក្នុងថ្ងៃប្រកាសលទ្ធផលបាក់ឌុប។ "និយាយតាមត្រង់ មិនសូវមានលុយអីទេ។ តែបើកូនប្រលងជាប់មែន ខ្ញុំដឹងតែនាំវាទៅទិញខោអាវស្អាតពីរបីកំប្លេហើយ ដើម្បីលើកទឹកចិត្តកូន"។

ការប្រលងបាក់ឌុបឆ្នាំ២០១៦នេះ នឹងត្រូវបញ្ចប់នៅល្ងាចថ្ងៃនេះ។ ចំពោះការប្រកាសលទ្ធផលនឹងប្រព្រឹត្តនៅពេលរសៀល ថ្ងៃ១៣ កញ្ញា សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្ដាល។ ដោយឡែកនៅថ្ងៃ១៤កញ្ញា សម្រាប់មណ្ឌលនៅតាមបណ្តាខេត្តនានា៕

អត្ថបទ៖ លឹម សុនា 