តម្លៃបង្កងធម្មជាតិនៅខេត្តតាកែវ

2016-09-26 20:51:16
ចំនួនមតិ 0 | ចំនួនចែករំលែក 0

ចន្លោះមិនឃើញ

បង្កងធម្មជាតិតាកែវចាប់ផ្តើមត្រូវបណ្តើរៗ។ នៅម្តុំផ្លូវផ្សារណាត់ឃើញមានការដាក់លក់បង្កងធម្មជាតិតាកែវច្រើនកន្លែងជាប់ៗគ្នា។

លោកវណ្ណៈ អ្នកលក់បង្កងមួយរូបនៅម្តុំផ្លូវផ្សារណាត់ប្រាប់ថា បង្កងតាកែវចាប់ផ្ដើមត្រូវបណ្តើរៗ ទោះបីវាមិនទាន់សំបូរខ្លាំងក៏ដោយ។ លោកថា រដូវដែលសំបូរខ្លាំងចាប់ពីខែ ១០ ដល់ខែ ១១។

ទាក់ទងតម្លៃអាជីវកររូបនេះបញ្ជាក់ថា សម្រាប់ប្រភេទលេខ ១ មួយគីឡូតម្លៃ ៣៨ ដុល្លារ ដែលមានចំនួន ៦ ទៅ ៧ បង្កង។ លេខ ២ តម្លៃ ២៧ ដុល្លារដែលមានចំនួន ១៣ ទៅ ១៤ បង្កង និងលេខ ៣ តម្លៃ ២២ ដុល្លារ ដែលមាន ២០ ទៅ ៣០ បង្កង។

ខេត្តតាកែវមានភាពល្បីល្បាញបង្កងធម្មជាតិរសជាតិឆ្ងាញ់។ ភ្ញៀវទេសចរដែលធ្វើដំណើរឆ្លងកាត់ខេត្តមួយនេះ តែងតែមិនរំលងក្នុងការចង់សាករសជាតិបង្កងតាកែវ បើទោះបីវាមានតម្លៃថ្លៃនិងពិបាករកក៏ដោយ។

បង្កងតាកែវជាបង្កងឆ្ងាញ់បំផុត ដែលមានប្រភពមកពីស្រុកពីរនៃខេត្តតាកែវគឺស្រុកអង្គរបុរីនិងបុរីជលសា។

លោកវណ្ណៈដែលមានមុខរបរលក់បង្កងតាកែវជាច្រើនឆ្នាំប្រាប់ថា តម្រូវការទីផ្សារបង្កងតាកែវមានការកើនឡើងជាលំដាប់ ប៉ុន្តែការផ្គត់ផ្គង់មិនគ្រប់គ្រាន់ទេ។ វាប្រែប្រួលតាមរដូវកាលបើសិនទឹកច្រើនក៏សំបូរ ទឹកតិចក៏ខ្សត់តាមហ្នឹងទៅ។ លោកក៏លើកឡើងពីការបារម្ភដែរនៅពេលដែលពីមួយឆ្នាំទៅមួយឆ្នាំបរិមាណបង្កងតាកែវកាន់តែខ្សត់ខ្សោយទៅ។