បើសម្រេចបានចំណុចទាំងអស់នេះ ភាពយន្តខ្មែរយើងមានផ្លូវ?

2014-11-05 00:05:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ទូរទស្សន៍ CTN បានរៀបចំកិច្ចពិភាក្សាតុមូលថ្មីមួយកាលពីយប់មិញ ដោយមិនមានតំណាងក្រសួងវប្បធម៌ គឺមានតែតំណាងក្រសួងព័ត៌មាន និងតំណាងសិល្បករពីររូបគឺលោក ជា សំណាង តារាសម្ដែង និងលោក ឆាយ បូរ៉ា ផលិតករភាពយន្ត។ កិច្ចពិភាក្សានេះ ដើម្បីរកឲ្យឃើញ ថាតើភាពយន្តខ្មែរពិតជារងផលប៉ះពាល់ដោយការចាក់បញ្ចាំងភាពយន្តភាគថៃលើកញ្ចក់ទូរទស្សន៍ក្នុងស្រុកមែនឬទេ និងកត្តាជំនះបញ្ហា។

ឆ្លងកាត់ការពិភាក្សាជិត១ម៉ោង ឯកឧត្តម អ៊ុក គឹមសេង ទីប្រឹក្សាក្រសួងព័ត៌មាន បានសាទរចំពោះកិច្ចការដែលថា កម្ពុជាគួរតែបង្កើនលើពន្ធនាំចូលភាពយន្តបរទេសចូលមកក្នុងស្រុក ដែលលើកឡើងដោយសិល្បករវាគ្មិន។ ចំណុចផ្សេងទៀត ឯកឧត្តម អះអាងថា នឹងពាំនាំកង្វល់ នឹងការលើកឡើងរបស់សិល្បករទៅជម្រាបជូនឯកឧត្តមរដ្ឋមន្ត្រី ដើម្បីធ្វើរបាយការណ៍បញ្ជូនបន្តទៅនាយករដ្ឋមន្ត្រីពិនិត្យ និងសម្រេច។

នៅក្នុងកិច្ចពិភាក្សាតុមូលយប់មិញនេះ សិល្បករវាគ្មិនកិត្តិយសបានដាក់ចេញនូវចំណុចសំខាន់ៗមួយចំនួនខាងក្រោម៖

លោក ជា សំណាង តារាសម្ដែងរៀមច្បងដ៏ល្បីឈ្មោះមួយរូប៖

-ទូរទស្សន៍នីមួយៗ បើអាចពេលបញ្ចាំងភាពយន្តខ្មែរចប់ គួរតែមានតូបមួយសម្រាប់ដាក់ជួលភាពយន្តខ្មែរ។ លោកថា ធ្វើបែបនេះ ដើម្បីសម្រួលដល់បងប្អូនប្រជាពលរដ្ឋផ្សេងៗដែលខកខានទស្សនាការបញ្ចាំងលើកញ្ចក់ទូរទស្សន៍។

-សម្រាប់ភាពយន្តបរទេសបញ្ចាំងលើកញ្ចក់ទូរទស្សន៍ បើអាចគួរតែកុំបកប្រែខ្មែរ ប៉ុន្តែដាក់ Sub Title ខ្មែរជំនួសវិញ។ លោក អះអាងថា ធ្វើបែបនេះនឹងបានប្រយោជន៍មួយផ្នែកលើការសិក្សាស្រាវជ្រាវភាសាខ្មែរ។

-ចំណុចសំខាន់មួយ លោកស្នើទស្សនិកជនក្នុងស្រុក ចូលរួមគាំទ្រផលិតផលភាពយន្តក្នុងស្រុកជាចាំបាច់។

-ដំឡើងពន្ធភាពយន្តបរទេសនាំចូលក្នុងស្រុកខ្មែរ។

លោក ឆាយ បូរ៉ា សាស្ត្រាចារ្យ និងជាផលិតករល្បីឈ្មោះមួយរូប បានលើកឡើងពីយន្តការលើកទឹកចិត្ត និងបណ្ដុះបណ្ដាលធនធានមនុស្សលើឧស្សាហកម្មភាពយន្តមួយចំនួនដូចខាងក្រោម៖

-ស្វែងរកលទ្ធភាពបង្កើតសាលាបង្រៀនផលិត និងដឹកនាំភាពយន្ត។

-បង្កើតការប្រកួតប្រជែងផ្ដល់ជូនរង្វាន់ សម្រាប់អ្នកសរសេររឿង និងអ្នកដឹកនាំរឿង។

-ថវិកាទ្រទ្រង់៖ លោកអះអាងថា នេះជាចំណុចសំខាន់ ហើយរដ្ឋាភិបាល គួរមានកញ្ចប់ថវិកាសម្រាប់ទ្រទ្រង់រាល់ផលិតផលភាពយន្តខ្មែរ ដើម្បីជួយសម្រាលការខាតបង់ដែលអាចកើតមានចំពោះផលិតករ។ លោក លើកឡើងថា ប្រទេសថៃ អាល្លឺម៉ង់ សិង្ហបុរី សុទ្ធតែមានកញ្ចប់នេះហៅថា Film Foundationហើយវៀតណាមដែលយើងគិតឧស្សាហកម្មភាពយន្តគេមានកម្រិតទាបជាងយើងនោះ ក៏រដ្ឋាភិបាលគេមានកញ្ចប់ថវិកា៤០% សម្រាប់ទ្រទ្រង់ផលិតភាពយន្តរបស់គេដែរ។

-ស្ថានីយទូរទស្សន៍ក្នុងស្រុកទាំងអស់ គួរតែមានឆន្ទៈក្នុងការលើកកម្ពស់ភាពយន្តខ្មែរ និងគប្បីយល់ថាម៉ោងមាស(6:00-9:00PM) គឺជាម៉ោងសម្រាប់អប់រំ សម្រាប់បម្រើប្រជាពលរដ្ឋខ្មែរ។

ជាមួយគ្នានេះដែរ ឯកឧត្តម អ៊ុក គឹមសេង ក៏បានស្នើសុំមួយចំណុចដែរថា សិល្បករគួរតែចេះជួយខ្លួនឯងជាមុនសិន កុំដំឡើងឫកពេលល្បីហើយទារឡើងតម្លៃខ្លួនខ្ពស់ពេក ដែលនាំឲ្យមានការពិបាកដល់ផលិតករលើការចំណាយ។

ការបើកច្រកឲ្យភាពយន្តថៃចូលចរាចរណ៍នៅស្រុកខ្មែរជាថ្មីកាលពីខែមុន បន្ទាប់ពីខកខានជាង ១០ឆ្នាំ បានក្លាយជាប្រធានបទក្ដៅរហូតមកដល់ពេលនេះ ខណៈសិល្បករ ផលិតករមួយចំនួននៅមានកង្វល់ថា ជាឱកាសដែលភាពយន្តខ្មែរអាចដួលសន្លប់ម្ដងទៀត ព្រោះធ្លាប់ជួបបទពិសោធន៍នេះរួចហើយកាលពីជាង១០ឆ្នាំមុន។

ជាមួយនឹងកង្វល់នោះ សិល្បករមួយក្រុមដឹកនាំដោយអ្នកនាង ចន ច័ន្ទលក្ខិណា លោក ហ្វៃ សំអាង និងលោក សុះ ម៉ាច ប្រធានសមាគមសិល្បករខ្មែរ បានចូលជួបជាមួយរដ្ឋមន្ត្រីក្រសួងព័ត៌មាន កាលពីសប្ដាហ៍មុន។ ខ្លឹមសារនៃការចូលជួបនោះ គឺក្រុមសិល្បករមិនបានហាមឃាត់ការនាំចូលភាពយន្តបរទេស ពិសេសភាពយន្តភាគថៃនោះទេ ប៉ុន្តែស្នើសុំឲ្យរក្សាទុកម៉ោងមាស គឺម៉ោង ៦ល្ងាចដល់ម៉ោង ៩យប់ ទុកសម្រាប់តែបញ្ចាំងភាពយន្តក្នុងស្រុកប៉ុណ្ណោះ។

ការកំហិតលើស្ប៉តពាណិជ្ជកម្មនានាគួរតែផលិតនៅកម្ពុជា ផលិតដោយផលិតករ និងសម្ដែងដោយសិល្បករខ្មែរ ក៏ជាអ្វីដែលក្រុមសិល្បករខ្មែរបានលើកឡើងដែរ។ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ភ្លាមៗបានស្វាគមន៍ចំពោះការលើកឡើងរបស់សិល្បករ។ ឯកឧត្តមបញ្ជាក់ថា នឹងធ្វើរបាយការណ៍បញ្ជូនបន្តទៅនាយករដ្ឋមន្ត្រីពិនិត្យ និងសម្រេច។

ដូច្នេះ ប្រសិនបើចំណុចទាំងត្រូវបានដោះស្រាយ ភាពយន្តខ្មែរយើងនឹងបោះជំហានទៅមុខ តើពិតទេ ឬក៏មានអ្វីត្រូវបន្ថែមទៀត?

អត្ថបទ៖ ទារិកា