ទិនហ្វី ប្រកាសថ្ងៃចេញរឿងស្ដេចស្វាអ៊ូខុងថ្មី ឲ្យកក្រើកទីផ្សារម្ដងទៀត
- 2016-10-26 21:17:20
- ចំនួនមតិ 0 | ចំនួនចែករំលែក 0
ទិនហ្វី ប្រកាសថ្ងៃចេញរឿងស្ដេចស្វាអ៊ូខុងថ្មី ឲ្យកក្រើកទីផ្សារម្ដងទៀត
ចន្លោះមិនឃើញ
ខ្សែភាពយន្តដែលអ្នកគាំទ្រទន្ទឹងរង់ចាំច្រើនបំផុតនៅប្រទេសចិនសម្រាប់ឆ្នាំក្រោយ រឿង "Journey to the West: Conquering the Demon 2” ដែលជាការសហការផលិតរបស់កំពូលផលិតករភាពយន្តហុងកុងពីររូបគឺ Stephen Chow (ទិនហ្វី) និង Tsui Hark បានប្រកាសកាលបរិច្ឆេទចេញបញ្ចាំងហើយ គឺនៅថ្ងៃចូលឆ្នាំចិនតែម្ដង។
រូបភាពផ្សព្វផ្សាយមួយដែលត្រូវបានបញ្ចេញកាលពីថ្ងៃអាទិត្យបានបង្ហាញថាភាពយន្តនេះនឹងចេញបញ្ចាំងតាមបណ្ដារោងភាពយន្តក្នុងប្រទេសចិនក្នុងឱកាសពិធីបុណ្យចូលឆ្នាំថ្មីចិនដែលត្រូវនឹងថ្ងៃទី១៨ ខែមករា ឆ្នាំ២០១៧។
នេះគឺជាការសហការដ៏ធំលើកដំបូងរវាងស្ដេចកំប្លែងហុងកុង ទិនហ្វី និងកំពូលអ្នកដឹកនាំភាពយន្តក្បាច់គុនសៅលីង Tsui។
ក្នុងភាពយន្តនេះដែរ ទិន ហ្វី មាននាទីជាអ្នកនិពន្ធ និងសហការផលិត ខណៈលោកគ្រូ Tsui Hark គឺជាអ្នកដឹកនាំ។ ផលិតដោយយោងតាមប្រលោមលោកបុរាណ "Journey to the West” រឿងថ្មីនេះមានការចូលរួមសម្ដែងដោយតារាល្បីៗជាច្រើនដូចជាKris Wu, Lin Gengxin, Yao Chen, Lin Yun, Bao Bei'er, Da Peng, Wang Likun, Wang Duo, Zhang Mei'er និងកីឡាករបាល់បោះ Mengke Bateer។
"Journey to the West: Conquering the Demons" វគ្គដំបូងបានចេញកាលពីឆ្នាំ២០១៣ ដែលដឹកនាំដោយ Stephen Chow សម្ដែងដោយ Shu Qi, Huang Bo និង Wen Zhang។ ភាពយន្តនេះរកចំណូលបាន ២០៣,៥លានដុល្លារ និងបានក្លាយជាភាពយន្តមួយក្នុងចំណោមភាពយន្តរកចំណូលបានខ្ពស់បំផុតក្នុងប្រវត្តិសាស្ត្រចិន។ នៅឆ្នាំ២០១៦ Chow បានបញ្ចេញភាពយន្តជាស្នាដៃដឹកនាំរបស់ខ្លួនមួយទៀតគឺរឿង "The Mermaid” ហើយក៏បានបំបែកកំណត់ត្រាក្លាយជាភាពយន្តរកចំណូលបានខ្ពស់ជាងគេក្នុងប្រវត្តិសាស្ត្រភាពយន្តចិន ដោយអាចរកបាន ៥១៧,៣លានដុល្លារ ៕
ប្រែសម្រួល៖ វ៉ាន់ថន ប្រភព៖china.org