អ៊ូ ផាវ រំលឹករឿងឈឺចាប់ រងទុក្ខសាងសង់អាងទឹកត្រពាំងថ្ម
- 2016-10-30 16:58:50
- ចំនួនមតិ 0 | ចំនួនចែករំលែក 0
អ៊ូ ផាវ រំលឹករឿងឈឺចាប់ រងទុក្ខសាងសង់អាងទឹកត្រពាំងថ្ម
ចន្លោះមិនឃើញ
ជនរងគ្រោះក្នុងសម័យខ្មែរក្រហម អ្នកស្រី អ៊ូ ផាវ អាយុ ៦១ ឆ្នាំ ដែលបានចូលរួមធ្វើអាងទឹកត្រពាំងថ្ម បានរំលឹករឿងឈឺចាប់ និង ការបង្ខំឲ្យធ្វើការយ៉ាងធ្ងន់ធ្ងរក្នុងអំឡុងឆ្នាំ ១៩៧៧។ មនុស្សដូចស្រមោចបានមកលើកទំនប់ដោយប្រើពេលតែ ៣ ខែប៉ុណ្ណោះ ហើយថ្ងៃចុងក្រោយ គេបង្ខំឲ្យធ្វើការយ៉ាងធ្ងន់ធ្ងរ ហូបមិនគ្រប់ និង ពុំបានងូតទឹករយៈពេល ៥ ថ្ងៃ។ អ៊ុំស្រី អ៊ូ ផាវ រៀបរាប់។
អ្នកស្រី អ៊ូ ផាវ
ក្រោយពីរបបសាធារណរដ្ឋដួលរលំ ជំនួសវិញដោយរបបកម្ពុជាប្រជាធិបតេយ្យ នៅឆ្នាំ ១៩៧៥ អ្នកស្រីអ៊ូ ផាវ ត្រូវបានរបបអាវខ្មៅឲ្យធ្វើការងារជាអ្នកធ្វើស្រែហើយនៅឆ្នាំ១៩៧៦ អ៊ូ ផាវ បានរៀបការដែលផ្សំផ្គុំដោយកម្មាភិបាលខ្មែរក្រហម។ ចូលមកដល់ឆ្នាំ ១៩៧៧ ខ្មែរក្រហមចាប់ផ្ដើមឲ្យធ្វើអាងត្រពាំងថ្ម ស្ថិតនៅភូមិត្រពាំងថ្ម ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ (បច្ចុប្បន្នអាងទឹកត្រពាំងថ្មជារមណីយដ្ឋាន)។
ជាអ្នកលក់ដូរនៅអាងទឹកត្រពាំងថ្ម អ្នកស្រី អ៊ូ ផាវ បានរំលឹកថា "ជិត ៤០ ឆ្នាំហើយ រាល់ពេលខ្ញុំមើលអាងទឹកត្រពាំងថ្មនេះ ខ្ញុំនឹកដល់ការឈឺចាប់ និងមនុស្សដូចស្រមោចកំពុងធ្វើការយ៉ាងធ្ងន់ធ្ងរលើកដីទប់ទំនប់។ នៅថ្ងៃចុងក្រោយនៃការធ្វើទំនប់ពួកគេបង្ខំពួកយើងឲ្យធ្វើការទាំងយប់ទាំងថ្ងៃ និងហូបចុកអត់គ្រប់គ្រាន់ រួមទាំងមិនបានងូតទឹក៥ថ្ងៃ"។
ជនរងគ្រោះនៅក្នុងរបបកម្ពុជាប្រជាធិបតេយ្យរូបនេះ បានរៀបរាប់ទៀតថា ការសាងសង់ទំនប់នេះ គឺបែកជាតំបន់ ជាក្រុម និង ជាពួក ដោយក្នុងមួយពួកមានគ្នា ៣នាក់ មួយក្រុមមានគ្នា ១០នាក់។ ផែនការធ្វើទំនប់ដំបូងគេឲ្យរែកដីក្នុងមួយពួក ១ម៉ែត្រគីប តែយូរៗទៅ ឡើងរហូតដល់ មួយពួក ៥ម៉ែត្រគីប គ្រប់គ្នាធ្វើលែងចង់បាន។ "តែខ្ញុំមិនបានឃើញអ្នកស្លាប់ទេ តែក្រោយថ្ងៃរំដោះខ្ញុំឃើញឆ្អឹងខ្មោចជាច្រើននៅទីនេះ"។
អ៊ូ ផាវ ដែលបានរៀនចប់ត្រឹមថ្នាក់ទី ៩ចាស់ នៅសាលាបឋមសិក្សាត្រពាំងថ្ម ក្នុងអំឡុងឆ្នាំ ១៩៧០ បានរៀបរាប់ទៀតថា សង្គ្រាមបានបង្ខំឲ្យអ្នកស្រីឈប់រៀន និងក្លាយជាអ្នកតម្បាញចន្លោះពីឆ្នាំ ១៩៧០-១៩៧៥។ ក្រោយឆ្នាំ ១៩៧៩ បន្តអាជីពជាអ្នកតម្បាញកន្សែង សូត្រ និង ក្រមា ជាដើម។ លុះមកដល់ឆ្នាំ ២ ០០០ អ្នកស្រីបានចាប់អាជីពជាអ្នកលក់ដូរនៅរមណីយដ្ឋានត្រពាំងថ្ម ទីដែលធ្លាប់រែកដីធ្វើទំនប់។
សព្វថ្ងៃនេះ អ្នកស្រី អ៊ូ ផាវ មានអាយុ ៦១ ឆ្នាំ មានកូនចំនួន ៣នាក់ ក្នុងនោះស្រី ១នាក់ ប្រុស២នាក់។ កូនស្រីទី១ មានឈ្មោះថា រ៉ឺន សារូ កើតនៅឆ្នាំ ១៩៧៨ ជាកូនស្រីច្បងនៅក្នុងគ្រួសារ កូនទី ២ ជាកូនប្រុស ឈ្មោះ រ៉ឺន វីរៈ កើតនៅក្នុងឆ្នាំ ១៩៨២ និង កូនទី ៣ ជាកូនប្រុស ឈ្មោះ រ៉ឺន អក្ខរា កើតនៅឆ្នាំ ១៩៨៤៕
អត្ថបទ៖ ប៊ុណ្ណា