ពន្លឺ៖ "ត្រឹមជាប់ជយលាភីលេខ ៣ នៅ DevFest ជាសមិទ្ធផលជោគជ័យដំបូងក្នុងឆាកជីវិត”

2016-11-02 18:47:46
ចំនួនមតិ 0 | ចំនួនចែករំលែក 0

ចន្លោះមិនឃើញ

"ទោះបីជាប់ត្រឹមជយលាភីលេខ ៣ នៅ DevFest តែខ្ញុំរំភើបខ្លាំង ដោយសារវាជាសមិទ្ធផលជោគជ័យដំបូងក្នុងឆាកជីវិត”។ និស្សិតឆ្នាំទី ២ ជំនាញវិទ្យាសាស្ត្រកុំព្យូទ័រនៃសាកលវិទ្យាល័យភូមិន្ទភ្នំពេញ ។

ញ៉េវ ចន្ទពេញពន្លឺ ជាអតីតសិស្សពូកែគណិតវិទ្យា មកពីវិទ្យាល័យជាស៊ីមតាកែវមានក្តីមោទនភាព នៅពេលក្រុមរបស់គេបានចូលរួមការប្រកួតបង្កើត App លើទូរសព្ទដៃលើប្រព័ន្ធប្រតិបត្តិការ Android ដោយទទួលបានចំណាត់លេខ ៣ ទោះមិនបានជាប់ជាក្រុមជើងឯកប្រចាំកម្មវិធី។

"ក្រុមរបស់ខ្ញុំទើបចូលរួមប្រកួតលើកដំបូង ហើយក៏មិនសង្ឃឹមថាជាប់ជយលាភីដែរ ព្រោះ ៦ ក្រុមផ្សេងទៀតដែលចូលរួមប្រកួត សុទ្ធតែជាសិស្សច្បងនិងជាជើងខ្លាំងខាងកូដ ប៉ុន្តែដោយការព្យាយាមក្នុងក្រុម រួមទាំងការធ្វើបទបង្ហាញបានល្អផង ទើបក្រុមអាចជាប់ជយលាភីនេះ"។

ក្នុងពេលប្រកួតក្រុមរបស់ពន្លឺ បានលើកយកគំនិតធ្វើកម្មវិធី Change ដែលហាក់ដូចជាខុសពីគេបន្តិច ដោយកម្មវិធីនេះជារបៀបហ្គេមផ្លាស់ប្តូរ (Challenge) ក្រោមប្រធានបទ “ការផ្លាស់ប្ដូរផ្នត់គំនិតទៅលើដៃគូស្វាមី ឬដៃគូស្និទ្ធស្នាល"។

ពន្លឺប្រាប់ពីរបៀបការលេងហ្គេមនេះ តម្រូវឲ្យមានគ្នាពីរនាក់ ដោយសមាជិកម្នាក់ដើរតួជាប្តី ហើយម្នាក់ទៀតដើរតួជាប្រពន្ធ។ ក្នុងការលេងប្រពន្ធជាអ្នកធ្ចើការជ្រើសរើស Quest ដែលជា Challenge មួយក្នុងចំនោម ៥ ទៅ ១០ ដូចជា (លាងចាន, ដាំបាយ និងមិនពិសារស្រា៥ថ្ងៃជាដើម) ដើម្បីបញ្ចួនទៅឲ្យប្តីធ្វើការអនុវត្ត។ បន្ទាប់ពីប្ដីធ្វើតាមសំណើរួចហើយ ប្រពន្ធនឹងធ្វើការចុចដាក់ពិន្ទុ រួចនឹងធ្វើការបូកសរុបដើម្បីចាត់ជាចំណាត់ថ្នាក់នៅលើ App។

យុវជនរូបនេះបន្តថា កម្មវិធី Change នេះនៅមិនទាន់អាចដាក់ឲ្យទាញយកប្រើបានទេ ប៉ុន្តែទៅថ្ងៃខាងមុខ ពួកគេនឹងប្រឹងប្រែងអភិវឌ្ឍន៍ព្យាយាមបង្កើតកម្មវិធីនេះឲ្យចេញជារូបរាង ដើម្បីរួមចំណែកក្នុងការកាត់បន្ថយអំពើហិង្សាលើស្ត្រី និងជួយកែប្រែផ្នត់គំនិតរបស់ស្វាមីទាំងអស់ឲ្យចេះជួយសម្រាលទុកធុរៈប្រពន្ធ និងគ្រួសារ។

ពន្លឺ ជាបេក្ខជននិងជាអ្នកដឹកនាំក្រុម CDev Group ដែលទទួលបានជយលាភីចំណាត់ថ្នាក់លេខ ៣ នៅក្នុងកម្មវិធី Hack+Marathon ឬហៅកាត់ថា Hackathon (ហែកថុន) ក្នុងព្រឹត្តិការណ៍បច្ចេកវិទ្យាប្រចាំឆ្នាំរបស់ក្រុមហ៊ុន Google (GDG DevFest Phnom Penh 2016)។ កម្មវិធីនេះតម្រូវគ្រប់ក្រុមចូលរួមប្រជែងសមត្ថភាពគ្នាលើការបង្កើត App លើទូរសព្ទដៃដែលដំណើរការលើប្រព័ន្ធប្រតិបត្តិការ Android ក្រោមប្រធានបទ “ការផ្លាស់ប្ដូរផ្នត់គំនិតទៅលើដៃគូស្វាមី ឬដៃគូស្និទ្ធស្នាល"។

ក្រុម CDev Group មានសមាជិកបួនរូបដូចជានិស្សិត ញ៉េវ ចន្ទពេញពន្លឺ(ប្រធានក្រុម) ពូលក្ខ័ ចន្ទរិទ្ធ(អ្នកសរសេរកូដ) ទូច ជ័យរដ្ឋា និងធី ឡែន(អ្នករចនា)៕