ផ្នូរប៉ុលពតមានអ្នកថែ តែមិនសូវមានអ្នកទៅមើល
- 2016-11-10 09:21:30
- ចំនួនមតិ 0 | ចំនួនចែករំលែក 0
ផ្នូរប៉ុលពតមានអ្នកថែ តែមិនសូវមានអ្នកទៅមើល
ចន្លោះមិនឃើញ
សាឡុត ស ហៅប៉ុលពត បានស្លាប់នៅក្នុងឆ្នាំ ១៩៩៨ ហើយរហូតមកដល់នឹងពេលនេះផ្នូរមេដឹកនាំសម័យខ្មែរក្រហមបានក្លាយទៅជាតំបន់រមណីយដ្ឋានប្រវត្តិសាស្ត្រមួយនៅភូមិជើងភ្នំ ឃុំត្រពាំងព្រៃ ស្រុកអន្លង់វែង ខេត្តឧត្តរមានជ័យ។ សព្វថ្ងៃនេះមានអ្នកថែផ្នូរពលពត តែអត់សូវមានមនុស្សទៅមើលដូចកាលពី ៦ឆ្នាំមុននោះទេ។
លោក មា ជ្រន អ្នកថែផ្នូរប៉ុលពត បានប្រាប់ក្រុមការងារ "ផ្លូវទៅស្រុក" ថា បច្ចុប្បន្នមិនសូវមានអ្នកមកមើលផ្នូរប៉ុលពត ដូចកាលពីអំឡុងឆ្នាំ ២០០៩-២០១០ ទេ។ "កាលពីមុនបរទេសមកមើលផ្នូរនេះយ៉ាងតិច ២នាក់ក្នុង១ខែ ឥឡូវមានតែ ១ ឬ ២នាក់ប៉ុណ្ណឹង!។"
អ្នកថែផ្នូរមេដឹកនាំកំពូលក្នុងរបបកម្ពុជាប្រជាធិបតេយ្យរូបនេះ បាននិយាយថា ប៉ុលពត បានស្លាប់នៅថ្ងៃទី ១៥ ខែមេសា ឆ្នាំ ១៩៩៨ ដោយសារជំងឺ ហើយផ្នូររបស់គាត់ដីរាបធម្មតាទេ តែក្រោយមកនៅអំឡុងឆ្នាំ ២០០៩-២០១០ ទើបគេធ្វើដំបូល ដូចបានឃើញសព្វថ្ងៃនេះ។
សូមទស្សនាវីដេអូខាងក្រោម
លោក សៀង សុខ ហេង ប្រធានការិយាល័យទេសចរណ៍ស្រុកអន្លង់វែង បានប្រាប់ក្រុមការងារ "ផ្លូវទៅស្រុក" ថា ក្នុងចំណោម ១៤ កន្លែង ផ្នូរប៉ុលពតត្រូវបានដាក់ចូលជារមណីយដ្ឋានប្រវត្តិសាស្រ្ត ដើម្បីទុកឲ្យក្មេងជំនាន់ក្រោយបានមកមើលនិងដឹងអំពីការគ្រប់គ្រងមួយនៅសម័យខ្មែរក្រហម។ ប៉ុន្តែផ្នូរប៉ុលពត មិនសូវមានអ្នកមកមើលប៉ុន្មានទេ ក្រៅតែពីមានសិស្ស និស្សិត ឬអង្គការធ្វើការពាក់ព័ន្ធនឹងការស្រាវជ្រាវសម័យខ្មែរក្រហមទើបគេមកមើល។
ប៉ុលពត ជាឈ្មោះស្ថាបនិក នៃរបបកម្ពុជាប្រជាធិបតេយ្យនាថ្ងៃទី ១៧ មេសា ឆ្នាំ ១៩៧៥ ដល់ថ្ងៃទី ០៧ មករា ឆ្នាំ ១៩៧៩។ ប៉ុលពត មានឈ្មោះដើមថា សាឡុត ស កើតនៅថ្ងៃទី ២៥ ខែមករា ឆ្នាំ ១៩២៥ នៅភូមិព្រែកស្បូវ ខេត្តកំពង់ធំ ជាកូនទី ៨ ក្នុងចំណោមបងប្អូន ៩នាក់ គ្រួសាររបស់គាត់ជាកសិករស្ដុកស្ដម្ភម្នាក់។ នៅសម័យខ្មែរក្រហម ប៉ុលពត មានមុខងារជា លេខាបក្ស សមាជិកគណៈកម្មការមជ្ឈិមបក្ស និងជានាយករដ្ឋមន្ត្រី។ ក្រោយពីថ្ងៃរំដោះ ៧មករា ឆ្នាំ ១៩៧៩ ប៉ុលពត បានស្លាប់នៅផ្ទះរបស់គាត់ដែលស្ថិតនៅស្រុកអន្លង់វែងដោយសាររោគគាំងបេះដូងនៅថ្ងៃទី ១៥ មេសា ឆ្នាំ ១៩៩៨។ ប៉ុន្តែមជ្ឈដ្ឋានមួយចំនួននៅតែដាក់ការសង្ស័យអំពីការស្លាប់របស់ប៉ុលពត ព្រោះតែពេលប៉ុលពតស្លាប់ តាម៉ុក ជាមេទ័ពកំពូលក្នុងសម័យខ្មែរក្រហម មិនអនុញ្ញាតឲ្យគេពិនិត្យសាកសពនោះទេ៕