ក្រុមកុលសម្ព័ន្ធ រស់នៅក្នុងព្រៃអាម៉ាហ្សូន កាន់ដំបងឈើ ចាំវាយយន្តហោះ

2016-11-18 01:25:14
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតដែលថតពីលើអាកាសជាច្រើនសន្លឹក បានបង្ហាញឲ្យឃើញពីក្រុមកុលសម្ព័ន្ធ ដែលជាជនជាតិភាគតិច រស់នៅក្នុងព្រៃអាម៉ាហ្សូន មានការភ្ញាក់ផ្អើល និងជ្រួលច្របល់ នៅពេលបានឃើញយន្តហោះ ហោះសំកាំងពីលើផ្ទះរបស់ពួកគេ។

រូបថតទាំងនោះ ក៏បានបង្ហាញឲ្យឃើញពីសហគមន៍កុលសម្ព័ន្ធ ដែលមានផ្ទះសម្រាប់មនុស្ស ចំនួនប្រមាណជា ១០០នាក់ នៅក្នុងភូមិមួយ ក្នុងប្រទេសប្រេស៊ីល ដែលនៅតែគ្មានទំនាក់ទំនងជាមួយមនុស្សខាងក្រៅ និងមិនផ្លាស់ប្ដូររបៀបរស់នៅឡើយ រហូតមកដល់សតវត្សទី២១នេះ។

ពួកគេភាគច្រើន ស្លៀកសំលៀកបំពាក់បិទបាំងខ្លួនតិចតួចប៉ុណ្ណោះ ហើយបានកាន់ដំបងឈើ និងឈរសម្លឹងមើលទាំងងឿងឆ្ងល់ នៅពេលអ្នកថតរូប ជិះយន្តហោះសំកាំងពីលើផ្ទះពួកគេ ដើម្បីប្រមាញ់យកទិដ្ឋភាពទាំងនោះ។

គួរបញ្ជាក់ថា ភូមិខាងលើនោះ ស្ថិតនៅក្នុងទឹកដីរបស់ជនជាតិដើមភាគតិច Yanomami នៅភាគខាងជើង នៃប្រទេសប្រេស៊ីល ក្បែរព្រំដែនប្រទេសវេណេហ្ស៊ុយអេឡា។ ជនជាតិភាគតិច Yanomami ប្រមាណជា ២២ ០០០នាក់ រស់នៅទីនោះ ហើយមិនដែលមានទំនាក់ទំនង ជាមួយអ្នករស់នៅខាងក្រៅឡើយ។

ជាមួយគ្នានេះដែរ ជនជាតិភាគតិច Yanomami ប្រមាណជា ១៣ ០០០នាក់ផ្សេងទៀត បានរស់នៅតំបន់ Alto Orinoco លើព្រំដែនប្រទេសវេណេហ្ស៊ុយអេឡា។

យ៉ាងណាមិញ នេះមិនមែនជាលើកទី១ឡើយ ដែលគេប្រមាញ់បានជនជាតិភាគតិច ដែលរស់នៅក្នុងព្រៃអាម៉ាហ្សូនបែបនេះ។ កាលពីឆ្នាំ២០០៨ គេថតបានជនជាតិភាគតិចជាច្រើន ដោយក្នុងដៃមានកាន់លំពែង និងព្រួញភ្លើង តម្រង់មកយន្តហោះ ដែលបានហោះពីលើផ្ទះរបស់ពួកគេ៕