សមាជិក Camila Cabello ​​​បាន​ដើរ​ចេញ​​ពី​​ក្រុម​ចម្រៀង​​ស្រី​សហរដ្ឋ​អាមេរិក​ដ៏​មាន​ប្រិយភាព Fifth Harmony នៅ​ថ្ងៃ​ទី​១៩​ខែ​ធ្នូ​នេះ។ សម្រាប់​ការ​ចាកចេញ​របស់ Camila Cabello ​ជា​រឿង​មួយ​ចម្លែក​បន្តិច​ត្រង់​ថា​រឿង​​នេះ​​គឺ​ត្រូវ​បាន​ប្រាប់​ត​ពី​អ្នក​ចាត់ការ​របស់​នាង​ប៉ុណ្ណោះ មិនមែន​សាមី​ខ្លួន​អ្នក​ប្រាប់​ផ្ទាល់​ឡើយ ហើយ​មូល​ហេតុ​នៃ​ការ​ចាក​ចេញ​ភ្លាម​ៗ​របស់ Camila Cabello នៅ​មិន​ទាន់​បាន​បង្ហាញ​ជាក់លាក់​នៅ​ឡើយ។

បន្ទាប់​ដឹង​​នូវ​ការ​សម្រេច​ចិត្ត​ដើរ​ចេញ​របស់ Camila Cabello ក្រុម Fifth Harmony ក៏​បាន​ចេញ​សារ​មួយ​នៅ​លើ​គេហទំព័រ Twitter ដែល​មាន​សេចក្ដី​ដូច​តទៅ៖

"បន្ទាប់​ពី​នៅ​ជាមួយ​គ្នា​អស់​រយៈពេល​ជាង​៤​ឆ្នាំ​មក ពួក​យើង​បាន​ទទួល​ដំណឹង​ពី​អ្នក​ចាត់ការ​របស់ Camila Cabello ថា​នាង​បាន​សម្រេច​ចិត្ត​ចាក​ចេញ​ពី​ក្រុម​មួយ​នេះ។ ពួក​យើង​គ្មាន​អ្វី​ក្រៅ​ពី​ពាក្យ​ជូនពរ​សូម​ឲ្យ​នាង​រស់​នៅ​បាន​សុខ។

ចំពោះ​អ្នក​ទាំងអស់​គ្នា​ដែល​បាន​គាំ​ទ្រ​ស្រលាញ់​ពួក​យើង​តាំង​ពី​ដើម​ទី នៅ​ជាមួយ​ពួក​យើង​ជា​និច្ច​ គឺ​ជា​មូលហេតុ​ដែល​ពួក​យើង​អាច​បន្ត​ទៅ​មុខ​បាន។ ពួក​យើង​ទាំងអស់​គ្នា​រីករាយ​នឹង​នៅ​ជាមួយ​អ្នក​ទាំងអស់​គ្នា​ត​ទៅ​មុខ​ទៀត បើ​ទោះ​បី​ជា​នៅ​សល់​តែ​៤​នាក់​យើង​ Ally Brooke, Normani Kordei, Dinah Jane និង Lauren Jauregui ក្ដី ពួក​យើង​ទាំង​៤​នឹង​ប្ដេជ្ញា​បន្ត​ជា​ក្រុម Fifth Harmony ដដែល។ ពួក​យើង​កាន់​ដៃ​អ្នក​ទាំងអស់​គ្នា​មើល​ទៅ​មុខ​សម្រាប់​ឆ្នាំ​ថ្មី​នេះ ពួក​យើង​​ស្រលាញ់​អ្នក​ទាំង​អស់​គ្នា​អស់​ពី​បេះដូង។"

បន្ទាប់​ពី​ឃើញ​សារ​របស់​ក្រុម Fifth Harmony ហើយ អ្នក​គាំ​ទ្រ​ទាំង​ឡាយ​មាន​ភាព​ជ្រួលច្របល់​និង​សោកស្ដាយ​ជា​ខ្លាំង​សម្រាប់​ការ​ចាក​ចេញ​ភ្លាម​ៗ​របស់ Camila Cabello ព្រោះ​ពួក​គេ​ទើប​តែ​ប្រគំ​តន្ត្រី​ជាមួយ​គ្នា​​កាល​ពី​ពេល​ថ្មី​ៗ​កន្លង​ទៅ​នៅ​ឯ​ឆាក Y's100 Jingle Ball ក្នុង​ទីក្រុង Miami ។

​គួរ​រំលឹក​ផង​ដែរ​ថា Fifth Harmony ត្រូវ​បាន​លេច​រូបរាង​ជា​ក្រុម​ចម្រៀង​ឡើង​នៅ​ក្នុង​កម្មវិធី The X Factor រដូវ​កាល​ទី​២ ហើយ​ក្រុម​នេះ​ធ្លាប់​ឈ្នះ​ពាន​រង្វាន់​ MTV Video Music Awards បី​និង​ពាន American Music Award មួយ សម្រាប់​បទ "Work From Home” និង "Bo$$” ៕