ក្រុម​ធ្វើ​តេស្ត​សមត្ថភាព​ទូរសព្ទ​ AnTuTu បាន​​បញ្ចេញ​តារាង​គួរ​ចាប់​អារម្មណ៍​ចំនួន​ ៣ ​​ដោយ​បង្ហាញ​ពី​​ចំណាត់​ថ្នាក់​ស្មាតហ្វូន​ ១០ មាន​ល្បឿន​ដំណើរ​ការ​ល្អ​ជាង​គេ។

​​​​​តារាង​ដំបូង​គេ​បង្ហាញ​ពី​ស្មាតហ្វូន​ដែល​មាន​ល្បឿន​ដំណើរ​ការ​ល្អ​ជាង​គេ​គិត​ទាំង​ស្មាតហ្វូន​ប្រើ​ប្រព័ន្ធ​ប្រតិបត្តិការ​ iOS និង Android។ តារាង​នេះ​ឃើញ​ថា​ iPhone 7 Plus ដែល​ប្រើ​បន្ទះ​ឈីប​ A10 Fusion ឈរ​នៅ​ចំណាត់​ថ្នាក់​លេខ​មួយ​ជា​មួយ​ពិន្ទុ​ជា​មធ្យម​ ១៨១ ៣១៦ តាម​ពី​ក្រោយ​ដោយ​ iPhone 7 ដែល​មាន​ពិន្ទុ​ ១៧២ ០០១។ ម៉ូដែល​បន្ត​បន្ទាប់​ទៀត​រួម​មាន​ OnePlus 3T, LeEco Le Pro3, Moto Z, OnePlus 3, Xiaomi Mi 5s, Asus Zenfone 3, Xiaomi Mi 5s Plus និង​ចុង​ក្រោយ​គេ ZTE Axon 7។

តារាង​បន្ទាប់​ទៀត​បង្ហាញ​ពី​ស្មាតហ្វូន​ប្រើ​ប្រព័ន្ធ​ប្រតិបត្តិការ​ Android ដែល​មាន​ដំណើរ​ការ​ល្អ​ជាង​គេ​ប្រចាំ​ឆ្នាំ​ ២០១៦ ដោយ​ OnePlus 3T ឈរ​នៅ​តំណែង​លេខ​មួយ​ជា​មួយ​ពិន្ទុ​ ១៦៣ ០១៣ តាម​ពី​ក្រោយ​ដោយ​ស្មាតហ្វូន Android ​ដែល​បង្ហាញ​ខ្លួន​ក្នុង​តារាង​មុន​ដែរ។ ប៉ុន្តែ​តារាង​នេះ​មាន​បន្ថែម​ស្មាតហ្វូន​ Android ថ្មី​ពីរ​ម៉ូដែល​ឈរ​នៅ​លេខ​រៀង​ទី​ ៩ គឺ​ Google Pixel Xl និង លេខ​ ១០ Google Pixel។

តារាង​ចុង​ក្រោយ​បង្ហាញ​ពី​ឧបករណ៍​ប្រើ​ប្រព័ន្ធ​ប្រតិបត្តិការ​ iOS ដែល​មាន​ដំណើរ​ការ​ល្អ​ជាង​គេ​ប្រចាំ​នៅ​ ២០១៦​ ដោយ​ iPad Pro អេក្រង់ ១២,៩ អ៊ីញ​ឈរ​នៅ​លេខ​មួយ​មាន​ពិន្ទុ​ដល់​ ១៩៤ ៨៣៨។ តាម​ពី​ក្រោយ​ដោយ​ iPhone 7 Plus និង ឧបករណ៍​ iDevice ដទៃ​ទៀត​រួម​មាន​ iPad Pro អេក្រង់​​ ៩,៧ អ៊ីញ, iPhone 7, iPhone 6s Plus, iPhone 6s, iPhone SE, iPad Air 2, iPad mini 4 និង ចុង​ក្រោយ​គេ iPhone 6 Plus៕​​​

ប្រភព៖ PhoneArena   ប្រែ​សម្រួល៖ សុខហេង