ការពិតពីក្រោយរូបថតកុមារចងដៃជើង ដែលផ្អើលថាគេចាប់វះយកក្រលៀន

2017-01-31 02:07:47
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅប៉ុន្មានថ្ងៃនេះ រូបថតមួយសន្លឹកបង្ហាញពីកុមារ៣នាក់ ត្រូវគេចងដៃចងជើង មាត់រុំនឹងក្រណាត់ស បានធ្វើឲ្យអ្នកប្រើប្រាស់បណ្ដាញសង្គមហ្វេសប៊ុកខ្មែរមួយចំនួនផ្អើលថា មានគេចាប់ក្មេងវះយកក្រលៀន និងបេះដូងទៅលក់ ប៉ុន្តែវាមិនមែនជារឿងពិតឡើយ។

តាមការស្រាវជ្រាវរកប្រភពព័ត៌មាន យើងបានឃើញសារព័ត៌មានម៉ាឡេស៊ីល្បីឈ្មោះ The Star បានចុះផ្សាយកាលពីថ្ងៃទី២០មករាកន្លងទៅថា នេះជាអំពើទារុណកម្មរបស់ស្ត្រី៤នាក់ទៅលើកុមារ៣នាក់នៅមជ្ឈមណ្ឌលមើលថែក្មេង Bangi ក្នុងប្រទេសម៉ាឡេស៊ី។

ក្នុងចំណោមស្ត្រីជនសង្ស័យទាំង៤នាក់ មានម្នាក់អាយុ៤០ឆ្នាំ ជាប្រធានមជ្ឈមណ្ឌលមើលថែទាំក្មេងតែម្ដង នៅផ្ទះល្វែងមួយកន្លែងក្នុងទីក្រុង Bandar Baru Bangi ប៉ុន្តែគេមិនទាន់ដឹងមូលហេតុធ្វើឲ្យស្ត្រីទាំងនោះធ្វើបាបក្មេងទេ។

បន្ទាប់ពីចាប់ខ្លួនជនសង្ស័យដើម្បីសាកសួរ ប៉ូលិសបាននាំក្មេងរងគ្រោះទៅកាន់មន្ទីរពេទ្យក្បែរនោះដើម្បីពិនិត្យសុខភាពហើយ។ ឯមជ្ឈមណ្ឌលត្រូវបានចាក់សោជាប់មិនអនុញ្ញាតឲ្យនរណាចូលឡើយ។

ក្រោយពីករណីនេះល្បីខ្ទរខ្ទារ រដ្ឋមន្ត្រីអភិវឌ្ឍសហគមន៍ ស្ត្រី និងគ្រួសារ លោកស្រី Datuk Seri Rohani Abdul Karim បានអះអាងថាខាងក្រសួងបានបញ្ជូនមន្ត្រីម្នាក់ទៅស៊ើបអង្កេតករណីនេះផងដែរ៕