នាវាយក្សតម្លៃរាប់រយលានដុល្លារ ត្រៀមបណ្ដែតខ្លួនទៅរកម្ចាស់នៅរុស្ស៊ី

2017-02-07 04:10:54
ចំនួនមតិ 0 | ចំនួនចែករំលែក 0

ចន្លោះមិនឃើញ

នាវាជិះកម្សាន្តលក្ខណៈឯកជនដ៏ធំមហិមាតម្លៃ ៤៥០លានដុល្លារ ត្រូវគេឃើញចាកចេញពីកន្លែងចតកប៉ាល់ Nobiskrug ប្រទេសអាល្លឺម៉ង់ហើយកាលពីល្ងាចម្សិលមិញ និងកំពុងធ្វើដំណើរទៅកាន់ភាគខាងត្បូងអេស្ប៉ាញដើម្បីតេស្ដមើលការបើកបរបន្ថែម មុនប្រគល់ទៅឲ្យម្ចាស់ជាអ្នកមានទ្រព្យជនជាតិរុស្សីម្នាក់។

នាវានេះឈ្មោះ Sailing Yacht A មានប្រវែង១៤២ម៉ែត្រ ជាកម្មសិទ្ធិរបស់មហាសេដ្ឋីរុស្ស៊ី Andrey Igorevich Melnichenko ដែលនឹងត្រូវចេញពីប្រទេសអាល្លឺម៉ង់ ក្រោយតេស្ដជាច្រើនខែ។ Sailing Yacht A មានក្ដោងចំនួន៣ កណ្ដាលគេកម្ពស់ជាង៩១ម៉ែត្រ គឺខ្ពស់ជាងនាឡិកា Big Ben នៅអង់គ្លេសទៅទៀត តែសម្រាប់ផ្ទុកភ្ញៀវ ២០នាក់ និងក្រុមការងារ ៥៤នាក់ប៉ុណ្ណោះ។

លើសពីនេះ វាមានកម្ពស់៨ជាន់ មានកន្លែងផ្ទុកឧទ្ធម្ភាគចក្រមួយ មានបន្ទប់ក្រោមទឹកមួយ និងទម្ងន់១២ ៧០០តោន។ នាវានេះស្ថិតក្នុងចំណោមនាវាជិះកម្សាន្តធំបំផុតមួយក្នុងលោក។

នាវាដ៏អស្ចារ្យខាងលើ រចនារូបរាងឡើងដោយបុរសជនជាតិបារាំងលោក Philippe Starck និងសាងសង់ដោយក្រុមហ៊ុនអាល្លឺម៉ង់ German Naval Yards នៅទីក្រុង Nobiskrug។ មហាសេដ្ឋី Melnichenko ត្រូវគេដឹងថាមានទ្រព្យសម្បត្តិប្រមាណ ១៣,៤ពាន់លានដុល្លារ៕